އެއަރ އިންޑިއާއިން ހުރިހާ ޕައިލެޓުން މަސްތުވާތަކެއްޗަށް ޓެސްޓްކުރަނީ

އެއަރ އިންޑިއާގެ ހުރިހާ ޕައިލެޓުން މަނާ މަސްތުވާތަކެއްޗަށް ޓެސްޓުކުރުމުގެ މަސައްކަތް ވަގުތުން ފެށުމަށް އެ އެއަރލައިނުން ނިންމައިފި އެވެ.

މި ނިންމުން ނިންމާފައިވަނީ މިދިޔަ ހަފުތާގައި ތައިލެންޑުގެ ފުކެޓުން ފުރައިގެން އިންޑިއާގެ ދިއްލީއަށް ދަތުރުކުރި ފްލައިޓެއްގެ އުސްމިން ކުއްލިއަކަށް ދަށްވި ހާދިސާއަކާ ގުޅިގެންނެވެ. އެ ހާދިސާގެ އިބްތިދާއީ ރިޕޯޓުތައް ބުނާގޮތުން، އެ ފްލައިޓުގެ ސީނިއާ ޕައިލެޓް މަސްތުވާތަކެއްޗަށް ކުރި ޓެސްޓުން މަރުވާނާއަށް ޕޮޒިޓިވްވުމާ ގުޅިގެން، އޭނާ އަލުން ޓެސްޓުކުރަން ވަނީ ޖެހިފަ އެވެ.

އެއަރ އިންޑިއާގެ ބަޖެޓް އެއަރލައިން ކަމަށްވާ "އެއަރ އިންޑިއާ އެކްސްޕްރެސް" ގެ ޕައިލެޓުން ވެސް މިދިޔަ ބުރާސްފަތި ދުވަހުން ފެށިގެން މި ޓެސްޓުތައް ހަދަން ޖެހޭނެ އެވެ.

މިހާރު އަމަލުކުރަމުންދާ ގަވާއިދުތައް ބުނާގޮތުން، އެއަރލައިންތަކުން މަދުވެގެން 10 އިންސައްތަ ޕައިލެޓުން ރެންޑަމްކޮށް ޓެސްޓުކުރަން ޖެހެ އެވެ.

މިދިޔަ އޮގަސްޓް މަހުގެ 4 ވަނަ ދުވަހު އެއަރބަސް މަރުކާރުގެ ބޯޓު ފުރިތާ ކުޑަވަގުތުކޮޅެއްގެ ތެރޭގައި، ކުއްލިއަކަށް 300 ފޫޓު (ގާތްގަނޑަކަށް 91 މީޓަރު) ތިރިއަށް ވެއްޓުމުގެ ސަބަބުން، ބޯޓުން ދަތުރުކުރި 17 ފަސިންޖަރުންނާއި ފަޅުވެރިންނަށް އެކިވަރުގެ އަނިޔާތައް ލިބުނެވެ.

މި ހާދިސާ އިންޑިއާގެ ކަމާބެހޭ އިދާރާތަކުން ތަހުގީގު ކުރަމުންދާއިރު، އެއަރބަސް ކުންފުންޏާއި ފްރާންސްގެ އެއަރ ސޭފްޓީ އެޖެންސީން ވެސް ދަނީ މި މަސައްކަތުގައި އެހީތެރިވަމުންނެވެ.

މި މައްސަލައިގެ ތަހުގީގު ނިމެންދެން، އެ ދުވަހު ފްލައިޓް ދުއްވަން ތިބި ދެ ޕައިލެޓުން ވެސް ވަނީ ވަޒީފާގެ މަސްއޫލިއްޔަތުތަކުން ދުރުކޮށްފަ އެވެ.

ބީބީސީ އިން ރިޕޯޓުކުރި ގޮތުގައި، އެއަރ އިންޑިއާގެ މެމޯއެއްގައި ބުނެފައިވަނީ، ޓެސްޓުކުރުމުގެ ކަންކަމުގައި މިހާރަށްވުރެ ހަރުދަނާ ފިޔަވަޅުތަކެއް އެޅުމަކީ މުހިންމު ކަމެއް ކަމަށެވެ. "ގަވާއިދުން ލާޒިމްކުރާ މިންވަރަށްވުރެ ފުޅާކޮށް ފަށާ މި މަސައްކަތަކީ، ސަލާމަތީ ކަންކަމާއި ފަންނީ މިންގަނޑުތައް އެންމެ މަތީ ދަރަޖައިގައި ހިފެހެއްޓުމަށް އަޅުގަނޑުމެން ކުރާ މަސައްކަތެއް. މީގެ ބޭނުމަކީ ފަސިންޖަރުންނާއި، ހިއްސާދާރުން އަދި އާންމު ރައްޔިތުންނަށް އިތުބާރު ހޯދައިދިނުން،" އެ މެމޯގައި ބުނެފައިވެ އެވެ.

2025 ވަނަ އަހަރުގެ ޖޫން މަހު އަހުމަދުއާބާދުން ލަންޑަނަށް ދަތުރުކުރި އެއަރ އިންޑިއާގެ ފްލައިޓެއް ފުރިތާ ކުޑަވަގުތުކޮޅެއްގެ ތެރޭގައި ވެއްޓި، ބޯޓުގައި ތިބި 241 މީހުންނާއި ބިމުގައި ތިބި 19 މީހުން މަރުވި ހާދިސާއާ ގުޅިގެން ވެސް އެ އެއަރލައިނަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. އެ ހާދިސާގައި ސަލާމަތްވީ އެންމެ ފަސިންޖަރެކެވެ.

މަސްތުވާތަކެއްޗާއި އޭވިއޭޝަން ގަވާއިދުތަކުން މަނާކޮށްފައިވާ ބޭސްތަކަށް ޓެސްޓުކުރުމުގެ މަސައްކަތް ކުރިއަށްދާނީ އެއަރ އިންޑިއާގެ އެކަޑަމީގައި ބާއްވާ ތަމްރީނު ސެޝަންތަކުގެ ތެރެއިންނާއި، ބްރީފިން ސެންޓަރުތަކާއި އޮފީސްތައް ހިމެނޭ ގޮތަށެވެ.

މިދިޔަ ހަފުތާގައި އެއަރ އިންޑިއާގެ އާ ޗީފް އެގްޒެކެޓިވް އޮފިސަރުގެ މަގާމާ އިތިއޯޕިއަން އެއަރލައިންސްގެ ކުރީގެ ވެރިޔާ ޓެވޯލްޑޭ ގެބްރެމާރިއަމް ވަނީ ހަވާލުވެފަ އެވެ.