އިންޑިއާގެ ކެރެލާ ސްޓޭޓުގެ ވަޔަނާޑްގައި ހިނގި ބިންގަނޑު ކަނޑައިގެން ދިއުމުގެ ހާދިސާ

އިންޑިއާގެ ކެރެލާ ސްޓޭޓުގެ ވަޔަނާޑަށް ބޯކޮށް ވާރޭވެހި، އެ ސަރަހައްދުގައި ކުރިއަށްދާ ޓަނަލް މަޝްރޫއެއްގެ ސައިޓަށް ބިންގަނޑު ކަނޑައިގެން ދިއުމުގެ ސަބަބުން ފަސް މީހުން މަރުވެއްޖެ އެވެ.

އަނައްކަމްޕޮއިލް-ކައްލާޑީ-މެއްޕާޑީ ކަނޑައިގެންދިޔަ ބިންގަނޑާއެކު ގިނަ އަދަދެއްގެ މަޑާއި ހިލަ ފައިބައިގެން އައި ބިރުވެރި މަންޒަރު ފެންނަ ސީސީޓީވީ ފޫޓޭޖެއް މިހާރު ވަނީ ސޯޝަލް މީޑިއާގައި އާންމުވެފަ އެވެ. މި ވީޑިއޯއިން ފެންނަ ގޮތުގައި، ފަރުބަދަމަތިން ފައިބައިގެން އައި ބޯ މަޑުގަނޑު ސިކުންތުކޮޅެއްގެ ތެރޭގައި މުޅި ސަރަހައްދަށް ފެތުރި، ގަސްތައް މުލުން ލުހެލައިގެން ދިޔައިރު، އެ ސަރަހައްދުގައި ތިބި މީހުން ފުރާނަ ސަލާމަތް ކުރުމަށް ދުވާ މަންޒަރު ފެނެ އެވެ.

މި ހާދިސާގައި ދެ މީހަކު މަރުވެ، އަށް މީހަކަށް އަނިޔާވެފައިވާއިރު، މަދުވެގެން ހަތް މަސައްކަތްތެރިން ވަނީ ގެއްލިފަ އެވެ. މީނާކްޝީ ބްރިޖް ކައިރިއަށް ބިންގަނޑު ކަނޑައިގެން ދިޔައީ އެ ސަރަހައްދަށް މެދުނުކެނޑި ވާރޭ ވެހުމުގެ ސަބަބުންނެވެ. ކެރެލާ ސްޓޭޓް ޑިޒާސްޓާ މެނޭޖްމަންޓް އޮތޯރިޓީން ހާމަކޮށްފައިވާ ގޮތުގައި، ވޭތުވެދިޔަ 24 ގަޑިއިރު ނުވަނީސް އެ ސަރަހައްދަށް ވަނީ 265 މިލިމީޓަރުގެ ވާރޭ ވެހިފަ އެވެ. މިއީ މި ސީޒަނުގައި އެ ސަރަހައްދަށް އެންމެ ގިނައިން ވާރޭވެހުނު ފަހަރެވެ.

މި ހާދިސާ ހިނގި ސައިޓަކީ 2024 ވަނަ އަހަރު ބިންގަނޑު ކަނޑައިގެން ދިއުމުގެ ނުރައްކާތެރި ހާދިސާތަކެއް ހިނގި މުންޑައްކައިއާ ކައިރި ސަރަހައްދެކެވެ. އެ ސަރަހައްދުގައި އާންމުން ދިރިއުޅޭ ގެތަކާއި ހޯމްސްޓޭތައް ހުރުމުން، އިތުރު ބަޔަކު ބިންގަނޑުގެ ދަށުގައި ތާށިވެފައި ތިބެދާނެ ކަމުގެ ބިރު ވަނީ ހީވެފަ އެވެ. ކެރެލާގެ އެގްރިކަލްޗަރ މިނިސްޓަރު ޓީ ސިއްދީގު ވަނީ މިއީ އިންސާނުންގެ އިހުމާލުން ހިނގި ހާދިސާއެއްގެ ގޮތުގައި ސިފަކުރައްވައި، ޓަނަލް މަޝްރޫއު ކުރިއަށްގެންދާ ކޮންކަން ރޭލްވޭ ކޯޕަރޭޝަން ލިމިޓެޑަށް ފާޑުވިދާޅުވެފަ އެވެ.