ފިލިޕީންސްގެ ނައިބު ރައީސް ހައްޔަރުކުރުމަށް ކޯޓުން އަމުރުކޮށްފި

ފިލިޕީންސްގެ ރައީސް ފާޑިނަންޑް މާކޯސް ޖޫނިއާ އަވަހާރަކޮށްލަން ރޭވި ކަމުގެ ތުހުމަތުގައި، އެ ގައުމުގެ ނައިބު ރައީސް ސާރާ ޑުޓާޓޭ ހައްޔަރުކުރުމަށް ފިލިޕީންސްގެ ކޯޓަކުން އަމުރުކޮށްފި އެވެ.

މެނީލާ ކައިރީގައި އޮންނަ ކުއެޒޯން ސިޓީގެ ކޯޓަކުން މި އަމުރު ނެރުނީ ހުކުރު ދުވަހު އެވެ. މި އަމުރު ނެރުނީ، އަމުރު ނެރުން ފަސްކޮށްދިނުމަށް އެދި ސާރާ ޑުޓާޓޭގެ ވަކީލުން ހުށަހެޅި ހުށަހެޅުން ފަނޑިޔާރުން ބޭރުކޮށްލުމަށް ފަހުގަ އެވެ.

ކުރިން ސިޔާސީ ގޮތުން ގާތް ގުޅުމެއް ބޭއްވި ރައީސް ފާޑިނަންޑް މާކޯސް ޖޫނިއާ އާއި، އެމަނިކުފާނުގެ އަނބިކަނބަލުންގެ އިތުރުން ގާނޫނު ހަދާ މަޖިލީހުގެ ތިރީގެ (ހައުސް އޮފް ރެޕްރެޒެންޓެޓިވްސް) ގެ ކުރީގެ ރައީސް މަރާލާނެ ކަމަށް ބުނެ އިންޒާރު ދިން ކަމުގެ ތުހުމަތު ސާރާގެ މައްޗަށް ވަނީ ކުރެވިފަ އެވެ.

ވޭތުވެދިޔަ މަހު ސާރާގެ މައްޗަށް އުފުލާފައިވާ "ބޮޑެތި އިންޒާރުތައް ދިނުމުގެ" ތިން ދައުވާއާ ގުޅިގެން ކޮންމެ ދައުވާއަކަށް 1،900 އެމެރިކާ ޑޮލަރުގެ ކަފާލާތުގެ ފީއެއް ވަނީ ކަނޑައަޅާފަ އެވެ. މިއީ ސިޔާސީ ގޮތުން ކުރިމަތިލާން ޖެހިފައިވާ ގޮންޖެހުންތަކުގެ އިތުރުން، ނައިބު ރައީސް ސާރާއަށް ކުރިމަތިވި ގާނޫނީ އިތުރު މައްސަލައެކެވެ.

މި އިންޒާރުތަކުގެ މައްސަލައަކީ ގާނޫނު ހަދާ މަޖިލީހުގެ މަތީގެ (ސެނެޓް) ގައި ކުރިއަށްދާ ސާރާ މަގާމުން ވަކިކުރުމުގެ (އިމްޕީޗްމަންޓް) ޝަރީއަތުގެ މައިގަނޑު އަސާސެވެ. މި މައްސަލައިގައި އޭނާ ކުށްވެރިވެއްޖެ ނަމަ، މަގާމުން ވަކިވުމުގެ އިތުރުން 2028 ވަނަ އަހަރުގެ ރިޔާސީ އިންތިޚާބުގައި ވާދަކުރުމަށް ކުރާ އުންމީދުތަކަށް ނިމުން އަންނާނެ އެވެ.

މި މައްސަލަ ފެށުނީ 2024 ވަނަ އަހަރުގެ ނޮވެމްބަރު މަހު، ސާރާ ދެއްކެވި ވާހަކަފުޅަކާ ގުޅިގެންނެވެ. އެ ފަހަރު އޭނާ ވިދާޅުވީ، އޭނާ މަރާލައިފި ނަމަ ރައީސް މާކޯސް އާއި، އެމަނިކުފާނުގެ އަނބިކަނބަލުން އަދި ރައީސްގެ ދެބެންގެދެދަރި ބޭފުޅެއް ކަމަށްވާ ހައުސް އޮފް ރެޕްރެޒެންޓެޓިވްސްގެ އޭރުގެ ރައީސް މާޓިން ރޮމުއަލްޑޭޒް މަރާލުމަށް "ހިޓްމަނެއް" ނުވަތަ ގާތިލަކާ ހަވާލުކޮށްފައިވާނެ ކަމަށެވެ.

ނަމަވެސް، ސާރާ ފަހުން ވިދާޅުވީ އެއީ ރައީސާ ދެމެދު އުފެދުނު ޚިޔާލުތަފާތުވުންތަކާ ގުޅިގެން، އަމިއްލަ ސަލާމަތާމެދު ބިރު ހީވުމުން ދެއްކެވި ވާހަކައެއް ކަމަށެވެ.

ސާރާގެ ވަކީލު ޕޯލް ލޯރެންސް ލިމް ނެރުނު ބަޔާނެއްގައި ބުނީ، ގާނޫނުން ރެކުމުގެ އެއްވެސް ގަސްދެއް ސާރާގެ ނެތް ކަމަށާއި، ގާނޫނީ ގޮތުން ލިބިދޭ ހުރިހާ ފުރުސަތެއްގެ ބޭނުން ހިފަމުން ގެންދާނެ ކަމަށެވެ.

ޖަސްޓިސް މިނިސްޓްރީގެ ތަރުޖަމާނު ވަނީ ހައްޔަރުކުރުމުގެ އަމުރު ނެރުނުކަން ކަށަވަރުކޮށްދެއްވާފަ އެވެ. އަދި ސާރާގެ އިމްޕީޗްމަންޓް ޝަރީއަތް ހިނގަމުންދާތީ ޖިނާއީ ދައުވާ ނުކުރެވޭނެ ކަމަށް ބުނެ އޭނާގެ ގާނޫނީ ޓީމުން ދެއްކި އުޒުރުތައް މިނިސްޓްރީން ވަނީ ބޭރުކޮށްލާފަ އެވެ.

މި އަމުރު ނެރުނު ނަމަވެސް، ސާރާ ވަގުތުން ބަންދުކުރާނެ ކަމަކަށް ނުބެލެވެ އެވެ. ކަމާބެހޭ ފަރާތްތަކުން ލަފާކުރާ ގޮތުގައި އޭނާ ވަރަށް އަވަހަށް ކަފާލާތުގެ ދަށުން މިނިވަންވާނެ އެވެ.

މި ޖިނާއީ ދައުވާ ސާބިތުވެއްޖެ ނަމަ އަންނާނެ އެންމެ ބޮޑު އަދަބަކީ ހަ މަސް ދުވަހުގެ ޖަލު ހުކުމެކެވެ. މިއީ އޭނާގެ ސިޔާސީ މުސްތަގުބަލަށް ކުރިމަތިވެފައިވާ ނުރައްކާތަކާ އަޅާބަލާއިރު ކުޑަ އަދަބެކެވެ.

ގާނޫނު ހަދާ މަޖިލީހުގެ ތިރީގެއިން ކުރިއަށްގެންދާ އިމްޕީޗްމަންޓް މައްސަލައިގައި، ސާރާ ނައިބު ރައީސްކަމާއި އޭގެ ކުރިން އެޑިއުކޭޝަން ސެކްރެޓަރީގެ މަގާމުގައި ހުންނެވި ދުވަސްވަރު ހިންގާފައިވާ ކަމަށް ތުހުމަތުކުރެވޭ ކޮރަޕްޝަނާއި، ހޯދި ގޮތް ނޭނގޭ މުއްސަނދިކަމުގެ މައްސަލަތައް ވެސް ހިމެނެ އެވެ.

ސެނެޓުގައި ކުރިއަށްދާ އަޑުއެހުންތަކަށް މިހާރު ނުވަ ހަފުތާ ވެފައިވާއިރު، ސާރާ ގެންދަވަނީ އޭނާގެ މައްޗަށް ކުރެވޭ ހުރިހާ ތުހުމަތުތަކަކަށް އިންކާރު ކުރައްވަމުންނެވެ.

ކުރީގެ ރައީސް ރޮޑްރިގޯ ޑުޓާޓޭގެ ދަރިކަނބަލުން ސާރާ އާއި މިހާރުގެ ރައީސް މާކޯސް 2022 ވަނަ އަހަރުގެ އިންތިޚާބުގައި ވާދަކުރެއްވީ އެކުގަ އެވެ. ނަމަވެސް، ފަހުން އެ ދެ ބޭފުޅުންގެ ގުޅުން ގޯސްވެ، މިހާރު ވަނީ ބޮޑު ދެކޮޅުވެރިކަމަކަށް ބަދަލުވެފަ އެވެ.

ސާރާގެ ބައްޕަ ރޮޑްރިގޯ ޑުޓާޓޭ މިހާރު ހުންނެވީ ދަ ހޭގްގައި ހުންނަ އިންޓަނޭޝަނަލް ކްރިމިނަލް ކޯޓުގެ ބެލުމުގެ ދަށުގަ އެވެ. އެއީ އޭނާގެ ރައީސްކަމުގައި މަސްތުވާތަކެއްޗާ ދެކޮޅަށް ހިންގި ލޭއޮހޮރުވުން ބޮޑު ކެމްޕޭނުގައި އެތައް ހާސް ބަޔަކު މަރުވި މައްސަލައިގެ ޝަރީއަތް ފެށެންދެނެވެ.