ފެލިވަރުގައި ތަރައްގީ ކުރަމުންދާ ކޯލްޑް ސްޓޯރޭޖުގެ މަސައްކަތް މިއަހަރުގެ މަސްވެރިންގެ ދުވަހަށް ނިންމަވާނެ ކަމަށް މިނިސްޓަރު ޝިޔާމް ވިދާޅުވެއްޖެ
1 ސެޕްޓެމްބަރު 2026 | އަންގާރަ 13:41ރާއްޖޭގެ 7 ރަށެއްގައި 11،000 ޓަނުގެ މަސް ރައްކާކުރެވޭނެ ކޯލްޑް ސްޓޯރޭޖް ފެސިލިޓީތައް ގާއިމުކުރުމުގެ މަސައްކަތް ސަރުކާރުން ކުރަމުން އަންނަ ކަމަށް މިނިސްޓަރު ޝިޔާމް ވިދާޅުވެއްޖެ. މީގެ ތެރެއިން އިންޑިއާގެ އެހީގައި ކުރިއަށްގެންދާ ފެލިވަރުގެ 4000 ޓަނުގެ މަޝްރޫއުގެ 82 އިންސައްތަ ނިމިފައިވާއިރު، މިއަހަރުގެ މަސްވެރިންގެ ދުވަހަށް އެތަން ނިންމުމަށް ވަނީ އަމާޒު ހިފާފައި
މިނިސްޓަރު ޝިޔާމް ބޭއްވެވި ނޫސްވެރިންގެ ބައަދަލުވުުގެ ތެރެއިން | ރައީސް އޮފީސް
ފެލިވަރުގައި ތަރައްގީ ކުރަމުންދާ ކޯލްޑް ސްޓޯރޭޖުގެ މަސައްކަތް މިއަހަރުގެ މަސްވެރިންގެ ދުވަހަށް ނިންމަވާނެ ކަމަށް މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެ އެވެ.
އަންގާރަ ދުވަހު މިނިސްޓަރު ޝިޔާމް ބޭއްވެވި ނޫސްވެރިންގެ ބައްދަލުވުމުގައި ވިދާޅުވީ، 7 ރަށެއްގައި 11،000 ޓަނުގެ މަސް ރައްކާކުރެވޭ ކޯލްޑް ސްޓޯރޭޖު ފެސިލިޓީތައް ގާއިމުކުރުމުގެ މަސައްކަތް އެ މިނިސްޓްރީ އިން ކުރަމުންދާ ކަމަށެވެ. އެގޮތުން އެންމެ ބޮޑު މަޝްރޫއަކީ ފެލިވަރުގައި ތަރައްގީ ކުރާ ކޯލްޑް ސްޓޯރޭޖު ފެސިލިޓީ ކަމަށް މިނިސްޓަރު ޝިޔާމް ވިދާޅުވި އެވެ.
އެގޮތުން ފެލިވަރުގެ އިތުރުން ކޫއްޑޫ، ގދ. ތިނަދޫ، ހއ. އިހަވަންދޫ، މ. މުލައް، ކ. ކަނޑުއޮތްގިރި އަދި ތ. ހިރިލަންދޫގައި ކޯލްޑް ސްޓޯރޭޖު ގާއިމުކުރުމުގެ މަސައްކަތް ކުރަމުންދާ ކަމަށް މިނިސްޓަރު ޝިޔާމް ވިދާޅުވި އެވެ.
މަސްވެރިކަމުގެ ސިނާއަތް ތަރައްގީ ކުރަން ކޮންމެހެން ވެސް ކުރަން ޖެހޭ ކަމެއް ކަމުގައި ވާތީއާ އެކީގައި، މި ކޯލްޑް ސްޓޯރޭޖް އިތުރު ކުރުމުގެ މަސައްކަތް ވެސް އަޅުގަނޑުމެން ވަރަށް ސީރިއަސް ކަމެއްގެ ގޮތުގައި ފަށައިގެން މި އުޅެނީ. ފެލިވަރުގައި ކުރިއަށް މިދާ 4000 ޓަނުގެ ކޯލްޑް ސްޓޯރޭޖުގެ މަސައްކަތް އަޅުގަނޑުމެން މި ޑިސެންބަރު މަހު ނިންމަން އަމާޒު ހިފާފާއި ވާތީއާ އެކީގައި އެ މަސައްކަތްތައް އަވަސް ކުރުމަށްޓަކައި މިހާރު އެ މަސައްކަތުގައި ހުރި ގޮންޖެހުންތައް ބަލައި އަދި މަސައްކަތް ގޮސްފައި އޮތް ހިސާބު ބެލުމަށްޓަކައި އަޅުގަނޑު ވާނީ ފެލިވަރަށް ދަތުރުކޮށްފައިއަހުމަދު ޝިޔާމް
ފެލިވަރުގައި ތަރައްގީ ކުރާ ކޯލްޑް ސްޓޯރޭޖުގެ މަސައްކަތުގެ 82 އިންސައްތަ މަސައްކަތް ނިމިފައިވާކަން ފާހަގަ ކުރައްވާ މިނިސްޓަރު ޝިޔާމް ވިދާޅުވީ، މި މަސައްކަތަކީ އިންޑިއާގެ ލައިން އޮފް ކްރެޑިޓުގެ ދަށުން ކުރިއަށްދާ މަޝްރޫއެއް ކަމަށެވެ.
މީގެއިތުރުން ރާއްޖޭގައި މިހާރު ކުރިއަށްދާ ކޯލްޑް ސްޓޯރޭޖު މަޝްރޫއުތަކުގެ މަސައްކަތް ކުރިއަށް ގޮސްފައިވާ އިންސައްތައިގެ ތަފާސްހިސާބުތައް މިއަދުގެ ނޫސްވެރިންގެ ބައްދަލުވުމުގައި އާންމުކޮށްފައިވެ އެވެ. އެގޮތުން، ކޫއްޑޫގައި 53 އިންސައްތަ، ގދ.ތިނަދޫގައި 75 އިންސައްތަ، މ. މުލަކުގައި 25 އިންސައްތަ އަދި ކ. ކަނޑުއޮތްގިރީގައި 15 އިންސައްތަ މަސައްކަތް ނިމިފައިވެ އެވެ. އަދި ހއ. އިހަވަންދޫގެ މަސައްކަތް ކޮންޓްރެކްޓް ކުރެވިފައިވާ ކަމަށާއި ތ. ހިރިލަންދޫގައި ކޮންޓްރެކްޓް ކުރުމުގެ މަސައްކަތް ކުރިއަށްދާ ކަމަށް މިނިސްޓަރު ޝިޔާމް ވިދާޅުވި އެވެ.
މީގެތެރެއިން މ. މުލަކުގައި ތަރައްގީ ކުރާ ކޯލްޑް ސްޓޯރޭޖު މަޝްރޫއަކީ ސައުދީ ފަންޑުގެ ލޯނު އެހީގައި ކުރިއަށްގެންދާ މަޝްރޫއެއް ކަމަށް ވެސް މިނިސްޓަރު ޝިޔާމް ވިދާޅުވި އެވެ.
