ރ. ދުވާފަރުގެ ގެއަކަށް ގަތް ފެލިވަރު މަސްދަޅު ކޭހެއްގެ މަސްދަޅުތަކުން ގިނަ އަދަދަކަށް ކަށި ފެނިއްޖެއެވެ.
މަސްދަޅު ކޭސް ގެނައި ގޭގެ ވެރިފަރާތާ ހަވާލާ ދީ ރާއްޖެއެމްވީ އަށް މައުލޫމާތު ދިން އެރަށު މީހަކު ބުނި ގޮތުގައި އެ މަސްކޭސް އެ ގެއަށް ގެނެސްފައިވަނީ މި ދިޔަ ހަފްތާގެ ތެރޭގައެވެ.
އޭނާ ކިޔާދިން ގޮތުގައި 48 ދަޅު ހިމެނޭ އެ މަސްދަޅު ކޭހުން، ބޭނުން ކުރަން ކަނޑާލި ތިން މަސްދަޅުގައި ވެސް ހުރީ މަހުގެ ބޮޑެތި ކައްޓެވެ. އަދި އެކަމާ ގުޅިގެން ފެލިވަރަށް ގުޅުމުން ކަށި ނުހުންނާނެ ކަމަށް ބުނެފައި ވާކަމަށެވެ. އެހެން މިފްކޯ އިން ބުނިި ނަމަވެސް ފޮޓޯތަކުން ފެންނަ ގޮތުގައި އެކި ވަރުގެ ކަށި މަސްދަޅުތަކުގައިި ހުރިކަން ސާފުކޮށް އެނގެއެވެ.

ސަރުކާރުން ގެންގުޅޭ މަސްވެރިކަމުގެ ދޯދިޔާ ސިޔާސަތުގެ ސަބަބުން ރާއްޖޭގެ ޒަމާންވީ މަސްވެރިކަން އިންތިހާ އަށް ހީނަރުވެފައިވާއިރު، ކުރިއަށް އޮތް ރަމަޟާން މަހު ކޮންމެ ގޭބިސީ އަކަށް ސަރުކާރުން މަސްދަޅު ކޭހެއް ހަދިޔާކުރެއްވުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
ކުރިއަށް އޮތް ރޯދަމަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިއުލާންކުރެއްވީ ސަރުކާރަށް އެއް އަހަރުފުރުމުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
"ކުރިއަށް އޮތް ރަމަޟާން މަހަށް އަޅުގަނޑުމެން ގަސްދުކުރަނީ، އެސްޓީއޯގެ އެމްޑީއަށް އަޅުގަނޑު ދަންނަވައިފިން ކާޑުގެ ބަދަލުގައި ކޮންމެ ގެއަކަށް މަސްދަޅު ކޭހެއް ހިލޭ ދޭން" ރައީސުލްޖުމްހޫރިއްޔާ ވިދާޅުވެފައި ވެއެވެ.

ދުވާފަރުން ވާހަކަ ދެއްކި މީހާ ބުނީ، ކޮންމެ ގޭ ބިސީއަކަށް މަސްދަޅު ކޭސް ދޭން ރައީސް ނިންމަވާފައިވާއިރު، ގޭގެއަށް ފޮނުވާ މަސްދަޅުގައި ކަށި ނުހުންނާނެ ކަން ޔަގީން ކުރުން މުހިންމު ކަމަށެވެ.
މި ކަމާ ބެހޭ ގޮތުން މިފްކޯ ގެ ބަހެއް ލިބޭތޯ ކުރި މަސައްކަތް ކާމިޔާބުވާ ގޮތެއް ނުވިއެވެ.