އިރާގަށް 800 މިލިއަން ޑޮލަރުގެ ހެލިކޮޕްޓަރު ވިއްކުމަށް އެމެރިކާ އިން ހުއްދަ ދީފި
1 ސެޕްޓެމްބަރު 2026 | އަންގާރަ 05:06މި މުއާމަލާމަތުގެ ހުއްދަ ދިނުމާ ގުޅިގެން ނެރުނު ބަޔާނުގައި ބުނެފައިވަނީ، މި މުއާމަލާތަކީ އެމެރިކާގެ ބޭރު ސިޔާސަތާއި ޤައުމީ ސަލާމަތަށް ތާއީދުކުރާ ކަމެއް ކަމަށާއި، މިކަމުގެ ސަބަބުން ސްޓްރެޓީޖިކް ބައިވެރިއެއްގެ ސަލާމަތާއި ރައްކާތެރިކަން ރަނގަޅު ކުރުމަށް އެހީތެރިވެދެވޭނެ ކަމަށް
އެމެރިކާ އިން އިރާގަށް ވިއްކުމަށް ހުއްދަ ދީފައިވާ އަސްކަރީ ހެލިކޮޕްޓަރު | ރޮއިޓާސް
800 މިލިއަން އެމެރިކާާ ޑޮލަރުގެ ބެލް ހެލިކޮޕްޓަރާއި އެއާއި ގުޅުންހުރި ސާމާނު އިރާގަށް ވިއްކުމަށް، އެމެރިކާގެ ސްޓޭޓް ޑިޕާޓްމަންޓް އިން ހުއްދަ ދީފި އެވެ.
އެމެރިކާގެ ސްޓޭޓް ޑިޕާޓްމަންޓް އިން ނެރެފައިވާ ބަޔާނެއްގައި ބުނެފައި ވަނީ، މި މުއާމަލާތުގައި އަސާސީ ކޮންޓްރެކްޓަރުގެ ގޮތުގައި މަސައްކަތް ކުރާނީ ޓެކްސަސްގެ ފޯޓް ވޯތުގައި ހުންނަ ބެލް ޓެކްސްޓްރޮން ކުންފުނި ކަމަށެވެ.
މި މުއާމަލާމަތުގެ ހުއްދަ ދިނުމާ ގުޅިގެން ނެރުނު ބަޔާނުގައި ބުނެފައިވަނީ، މި މުއާމަލާތަކީ އެމެރިކާގެ ބޭރު ސިޔާސަތާއި ޤައުމީ ސަލާމަތަށް ތާއީދުކުރާ ކަމެއް ކަމަށާއި މިކަމުގެ ސަބަބުން ސްޓްރެޓީޖިކް ބައިވެރިއެއްގެ ސަލާމަތާއި ރައްކާތެރިކަން ރަނގަޅު ކުރުމަށް އެހީތެރިވެދެވޭނެ ކަމަށެވެ.
އިރާގަށް މި ހެލިކޮޕްޓަރުތައް ވިއްކުމުގެ ނަތީޖާ އަކަށް ވާނީ އެ ގައުމުގެ ދިފާއީ ގާބިލުކަން އިތުރުވުން ކަމަށް ސްޓޭޓް ޑިޕާޓްމަންޓް އިން ބުނެ އެވެ. މި ބަޔާނުގައި އިތުރަށް ބުނެފައި ވަނީ މި މުއާމަލާތުން އިރާގަށް މިހާރު ކުރިމަތިވެފައިވާ، އަދި ކުރިއަށް އޮތް ތަނުގައި ކުރިމަތިވެދާނެ ނުރައްކާތަކާ ދެކޮޅަށް ހަނގުރާމަވެރި ފިޔަވަޅުތައް އަޅާނެ ގާބިލުކަން ރަނގަޅު ކޮށްދޭނެ ކަމަށެވެ.
މި މުއާމަލާތުގެ ސަބަބުން އިރާގުގެ ރޮޓަރީ ވިންގ ޓްރާންސްޕޯޓް ހިދުމަތްތަކާއި، ރިކޮނަސަންސް އޮޕަރޭޝަންތަކާއި، އެއާ ޓު ސާފޭސް ޓާގެޓިން ގާބިލުކަން ވަރުގަދަވެގެންދާނެ ކަމަށް ސްޓޭޓް ޑިޕާޓްމަންޓް އިން ފާހަގަކުރެ އެވެ.
އެމެރިކާ އިން އިރާގަށް ދެމުންގެންދާ އަސްކަރީ އެހީތެރިކަމުގެ ސިލްސިލާގެ ތެރެއިން މިއީ އެންމެ ފަހުގެ މުއާމަލާތެވެ. މެދުއިރުމަތީގެ ސަރަހައްދުގައި ސަލާމަތާއި ރައްކާތެރިކަން ދެމެހެއްޓުމަށް އިރާގުގެ ދިފާއީ ބާރުތައް ވަރުގަދަ ކުރުމަކީ، އެމެރިކާގެ މުހިންމު އަމާޒެއް ކަމަށް މި ބަޔާނުގައި ފާހަގަކޮށްފައިވެ އެވެ.
މި މުއާމަލާތުގެ ތަފުސީލުތައް ހާމަކޮށްފައިވާ ގޮތުން، މި މުއާމަލާތުގައި ހިމެނެނީ ހެލިކޮޕްޓަރުތަކާއެކު އެކަމަށް ބޭނުންވާ ބައެއް އިތުރު ސާމާނުތަކާއި، ބަދަލުކުރާ ބައިތައް އަދި ޓެކްނިކަލް އެހީތެރިކަމެވެ.
މަސްދަރު: އަލް ޖަޒީރާ
