ރަޝިޔާ އާއި އެމެރިކާ ރައީސުން ޖީ20 ސަމިޓްގައި ދެފަަހަރު ބައްދަލު ކުރެއްވި ކަން ހާމަވެއްޖެ

މި ޖުލައި މަހުގެ ކުރީކޮޅު ޖަރުމަނުގައި ބޭއްވުނު ޖީ20 ސަމިޓްގައި އެމެރިކާގެ ރައީސް ޑޮނަލްޑް ޓްރަމްޕާއި އަދި ރަޝިޔާގެ ރައީސް ވްލަޑީމިއާ ޕޫޓީން ދެވަނަ ފަހަރަށް، ކުރިން ހާމަ ކުރުމަކާއި ނުލާ ސިއްރު ބައްދަލުވުމެއް ބޭއްވި ކަމަށް ވައިޓް ހައުސްގެ އޮފިޝަލުން އަންގާރަ ދުވަހު ކަށަވަރުކޮށްދެއްވައިފިއެވެ.

ދެގައުމުގެ ރައީސުން ފުރަތަމަ ފަހަރަށް ބައްދަލު ކުރެއްވީ ޖީ20 ސަމިޓްގައި ޖުލައި 7 ވަނަ ދުވަހުއެވެ. މި ބައްދަލުވުން ދެގަޑިއިރަށް ދެމިގެން ދިޔައެވެ. އެހެންނަމަވެސް އަންގާރަ ދުވަހު އެނގިގެން ދިޔައީ ފުރަތަމަ ބައްދަލުވުން ބޭއްވި ދުވަހު، އެއަށް ފަހު ހަމަ އެދުވަހު ރޭގަނޑުގެ ފަރީއްކޮޅުގެ ތެރޭގައި ދެގައުމުގެ ވެރިން ބައްދަލު ކުރެއްވިއެވެ. މި ސިއްރު ބައްދަލުވުން މީޑިއާ އަށް ފެންމަތިވުމުން ރައީސް ޓްރަމްޕް ވަނީ ޓްވިޓާގައި އެއީ ދޮގު ރިޕޯޓުތަކެއް ކަމަށް ވިދާޅުވެފައިވެއެވެ. ބައެއް ރިޕޯޓުތައް ބުނާގޮތުން ދެ ރައީސުންގެ ސިއްރު ބައްދަލުވުން ދިޔައީ ގާތްގަނޑަކަށް ގަޑިއެއްހާ އިރަށެވެ. އަދި މަޝްވަރާ ކުރެއްވި ކަންކަމެއް ނޭނގެއެވެ.

ވައިޓް ހައުސްގެ އޮފިޝަލުންނާ ހަވާލާދީ ވީއޯއޭ އިން ބުނީ ދެ ރައީސުން "ދެވަނަ ބައްދަލުވުމެއް ނުބާއްވަވާ ކަމަށާއި ރޭގަނޑުގެ ފަރީއްކޮޅަށް ފަހު ވަރަށް ކުރުކޮށް ވާހަކަފުޅު ދެއްކެވީ ކަމަށެވެ."

މީޑިއާ ރިޕޯޓުތައް ބުނާގޮތުން ރައީސް ޓްރަމްޕާއި ރައީސް ޕޫޓިން އާއި ކުރެއްވި ބައްދަލުވުމުގެ އޮފިޝަލް ރިކޯޑުތަކެއް އެމެރިކާ ސަރުކާރަކު ނެތެވެ. ސަބަބަކީ އެމެރިކާގެ އޮފިޝަލެއް ދެބޭފުޅުންގެ އަރިހު ނެތުމެވެ. ދެ ރައީސުން ބައްދަލު ކުރެއްވީ ވަކިންނެވެ.