އަދާނީގެ މައްޗަށް އުފުލި ޖިނާއީ ދައުވާތައް އެމެރިކާގެ ކޯޓަކުން ބާތިލްކޮށްފި

އިންޑިއާގެ ބިލިއަނަރު ގޯތަމް އަދާނީގެ މައްޗަށް އުފުލާފައިވާ ޖިނާއީ ދައުވާތައް އެމެރިކާގެ ފަނޑިޔާރަކު ހޯމަ ދުވަހު ބާތިލުކުރައްވައިފި އެވެ. ނަމަވެސް، މަކަރާއި ހީލަތް ހެދުމާއި ރިޝްވަތު ދިނުމުގެ މި މައްސަލަ ކުރިއަށް ނުގެންގޮސް ދޫކޮށްލުމަށް އެމެރިކާގެ ޖަސްޓިސް ޑިޕާޓްމަންޓުން ނިންމި ނިންމުމަކީ ކަންބޮޑުވާންޖެހޭ ކަމެއް ކަމަށް ފަނޑިޔާރު ވިދާޅުވި އެވެ.

ބްރޫކްލިންގެ ޔޫއެސް ޑިސްޓްރިކްޓް ފަނޑިޔާރު ނިކޮލަސް ގަރައުފީޒް، ފެޑަރަލް ޕްރޮސިކިއުޓަރުން މި މައްސަލަ އަނބުރާ ގެންދިއުމަށް މަދުން ނޫނީ ނުފެންނަ އެދުމަށް ހުއްދަ ދެއްވީ، އެގޮތަށް ނިންމި ސަބަބުތަކާ ބެހޭގޮތުން ސުވާލުކުރެއްވުމަށްފަހު އެވެ. އޭގެ ތެރޭގައި، 2024 ވަނަ އަހަރުގެ ނޮވެމްބަރު މަހު އެމެރިކާގައި 10 ބިލިއަން ޑޮލަރު އިންވެސްޓްކުރާނެ ކަމަށް އަދާނީ ވެފައިވާ ވައުދަކީ މި ދައުވާތައް ދޫކޮށްލުމަށް ނިންމި ނިންމުމުގައި ބަލާފައިވާ ކަމެއްތޯ ފަނޑިޔާރު ސުވާލު އުފެއްދެވި އެވެ.

ޖަސްޓިސް ޑިޕާޓްމަންޓުގެ މި ނިންމުމަކީ، ރިޕަބްލިކަން ޕާޓީގެ ރައީސް ޑޮނަލްޑް ޓްރަމްޕްގެ ވެރިކަމުގެ ދެވަނަ ދައުރުގައި، މަތީ ފަންތީގެ ކުށްތަކާ ގުޅޭ ބޮޑެތި ޖިނާއީ ދައުވާތައް ފެޑަރަލް ޕްރޮސިކިއުޓަރުން ދޫކޮށްލަން މަސައްކަތްކުރި ފަހުގެ މިސާލެކެވެ.

އަދާނީގެ މައްޗަށް އުފުލާފައިވާ ދައުވާތައް ބާތިލުކުރައްވަމުން ފަނޑިޔާރު ގަރައުފީޒް ވިދާޅުވީ، އިންވެސްޓްމަންޓްގެ ވައުދަކީ ޖަސްޓިސް ޑިޕާޓްމަންޓުގެ ނިންމުމަށް ނުފޫޒު ފޯރުވި ކަމެއް ނޫންކަން ގަބޫލުކުރެއްވޭ ކަމަށެވެ. އަދި ފެޑަރަލް ޕްރޮސިކިއުޓަރުން ދައުވާތައް ދޫކޮށްލުމަށް ނިންމާ ނިންމުންތައް މުރާޖައާކުރުމުގައި ފަނޑިޔާރުންނަށް އޮންނަ އިޚްތިޔާރު ހަނިކަން އޭނާ ފާހަގަކުރެއްވި އެވެ.

ނަމަވެސް، މި މައްސަލަ ތަހުގީގުކުރި ޕްރޮސިކިއުޓަރުންނާއި އޭޖެންޓުންގެ ލަފައެއް ނެތި، ދައުވާތައް ބާތިލުކުރުމަށް ނިންމުމުގައި ޕްރިންސިޕަލް އެސޯސިއޭޓް ޑެޕިއުޓީ އެޓާނީ ޖެނެރަލް ޓްރެންޓް މެކޮޓާ، އަދާނީގެ ދިފާއީ ވަކީލުންނާ ގުޅިގެން މަސައްކަތް ކުރައްވާފައިވާތީ ފަނޑިޔާރު ވަނީ އެކަމަށް ފާޑުވިދާޅުވެފަ އެވެ.

"މި ދައުވާ ބާތިލުކުރުމަށް ނިންމި ނިންމުމުގައި ހުރި އާދަޔާ ހިލާފު ކަންތައްތަކަކީ ކަންބޮޑުވާންޖެހޭ ކަންތައްތަކެއް،" ފަނޑިޔާރު ގަރައުފީޒް ލިޔުއްވާފައިވެ އެވެ.

ޖަސްޓިސް ޑިޕާޓްމަންޓުގެ ތަރުޖަމާނަކު އިޝާރާތް ކުރެއްވީ ޖުލައި 4 ވަނަ ދުވަހު ހުށަހެޅި ލިޔުމަކަށެވެ. އެ ލިޔުމުގައި މެކޮޓާ ވިދާޅުވެފައިވަނީ، ދައުވާތައް ދޫކޮށްލަން ނިންމީ ދިފާއީ ވަކީލުންނާއި ޖަސްޓިސް ޑިޕާޓްމަންޓުގެ އެހެން ވަކީލުންނާ ބައްދަލުކޮށް، އަމިއްލައަށް ދިރާސާކޮށް ތަހުގީގު ކުރުމަށްފަހު ކަމަށެވެ.

އެކްސް (ކުރީގެ ޓްވިޓާ) ގައި އާންމުކުރި ބަޔާނެއްގައި ގޯތަމް އަދާނީ ވިދާޅުވީ، "އެމެރިކާގެ ކޯޓުގެ ނިންމުމަށް ނުހަނު އިހުތިރާމާއެކު މަރުހަބާ ކިޔާ" ކަމަށެވެ.

ފަނޑިޔާރު ލިޔުއްވާފައިވާ ގޮތުގައި، އޭނާ މި މައްސަލަ ބާތިލުކުރުމަކީ ޖަސްޓިސް ޑިޕާޓްމަންޓުގެ ނިންމުމަށް އެއްބަސްވުން ނުވަތަ މައްސަލައިގެ އަސްލާ މެދު ގޮތެއް ނިންމުން ކަމުގައި މާނަކޮށްގެން ނުވާނެ އެވެ. އަދި މި މައްސަލައިގައި ހިމެނޭ އިތުރު މީހުންގެ މައްޗަށް އުފުލާފައިވާ ދައުވާތައް ބާތިލުކުރުމާ މެދު ގޮތެއް ނިންމުމަށްޓަކައި އިތުރު މައުލޫމާތު ހުށަހެޅުމަށް އޭނާ ޖަސްޓިސް ޑިޕާޓްމަންޓުގައި އެދިވަޑައިގަތެވެ.

އަދާނީގެ މައްޗަށް 2024 ވަނަ އަހަރު ދައުވާ އުފުލީ، އޭނާގެ އަދާނީ ގްރޫޕްގެ ސަބްސިޑިއަރީ ކުންފުންޏަކަށް ސޯލާ ހަކަތަ އުފައްދާ ޕްލާންޓެއް ތަރައްގީކުރުމުގެ ހުއްދަ ހޯދުމަށް އިންޑިއާ ސަރުކާރުގެ އޮފިޝަލުންނަށް ރިޝްވަތު ދިނުމަށް އެއްބަސްވި ކަމަށް ތުހުމަތުކޮށެވެ. އަދި އޭގެ ފަހުން ކުންފުނީގެ ކޮރަޕްޝަނާ ދެކޮޅު ސިޔާސަތުތަކާ ބެހޭގޮތުން ދޮގު މައުލޫމާތު ދީގެން އެމެރިކާގެ އިންވެސްޓަރުންނަށް އޮޅުވާލި ކަމަށްވެސް ތުހުމަތުކޮށްފައިވެ އެވެ. އަދާނީ ގްރޫޕުން ވަނީ މި ތުހުމަތުތަކަށް ތަކުރާރުކޮށް އިންކާރުކޮށްފަ އެވެ.

މި ދައުވާތަކަށް ޖަވާބުދާރީވުމަށް އަދާނީ އަމިއްލައަށް އެމެރިކާގެ ކޯޓަކަށް ހާޒިރުވެފައެއް ނުވެ އެވެ.

ޖުލައި 4 ވަނަ ދުވަހު ކޯޓަށް ހުށަހެޅި ލިޔުމުގައި މެކޮޓާ ވިދާޅުވީ، މި މައްސަލައަކީ މައިގަނޑު ގޮތެއްގައި ބޭރު ގައުމަކާ ގުޅުންހުރި، ސާބިތުކުރަން އުނދަގޫ އަދި އެ އިދާރާގެ މިހާރުގެ އިސްކަންދޭ ކަންތައްތަކާ ނުގުޅޭ މައްސަލައެއް ކަމަށެވެ.

އެމެރިކާގެ ސެކިއުރިޓީޒް އެންޑް އެކްސްޗޭންޖް ކޮމިޝަނުން (އެސްއީސީ) ހުށަހެޅި މަދަނީ ދައުވާތަކާ ގުޅިގެން ވެފައިވާ ވަކި އެއްބަސްވުމެއްގެ ދަށުން، ގޯތަމް އަދާނީ 6 މިލިއަން ޑޮލަރު ދެއްކުމަށް އެއްބަސްވެފައިވާއިރު، އޭނާގެ ކޮއްކޮގެ ދަރިފުޅު ސާގަރް އަދާނީ ވަނީ 12 މިލިއަން ޑޮލަރު ދެއްކުމަށް އެއްބަސްވެފަ އެވެ.

މީގެ އިތުރުން، އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ހިލާފުވި ކަމަށް ބުނާ މައްސަލަ ހައްލުކުރުމަށް އަދާނީ އެންޓަޕްރައިސަސް ލިމިޓެޑުން ވަނީ އެމެރިކާގެ ޓްރެޜަރީ ޑިޕާޓްމަންޓަށް 275 މިލިއަން ޑޮލަރު ދެއްކުމަށް ވަކިން އެއްބަސްވެފަ އެވެ.

ކޯޓަށް ހުށަހެޅި ލިޔުމުގައި މެކޮޓާ ވަނީ، އެމެރިކާގައި އިންވެސްޓްކުރާނެ ކަމަށް އަދާނީ ވެފައިވާ ވައުދާ ގުޅިގެން މި މައްސަލަ ދޫކޮށްލަން އުޅޭ ކަމަށް މީޑިއާތަކުން ފަތުރާފައިވާ ޚަބަރުތަކަކީ ދޮގު ޚަބަރުތަކެއް ކަމަށް ބުނެ އެކަން ދޮގުކޮށްފަ އެވެ.

ނަމަވެސް، ޖުލައި 15 ވަނަ ދުވަހު ކޯޓަށް ހުށަހެޅި އިގުރާރެއްގައި އަދާނީ ވަނީ އެމެރިކާގައި 10 ބިލިއަން ޑޮލަރު އިންވެސްޓްކުރާނެ ކަމަށް ކުރިން ވައުދުވެފައިވާނެ ކަމަށް އިއުތިރާފުވެފަ އެވެ. އަދި މި އިންވެސްޓްމަންޓަކީ "މި މައްސަލަތައް ހައްލުކުރުމުގެ ބައެއްގެ ގޮތުގައި ހިމެނިދާނެ" ކަމެއް ކަމަށް އޭނާގެ ވަކީލުން ޖަސްޓިސް ޑިޕާޓްމަންޓުގެ ބައްދަލުވުންތަކުގައި ބުނެފައިވާ ކަމަށްވެސް އަދާނީ ވިދާޅުވި އެވެ.

އަދާނީގެ ވަކީލު ރޮބަޓް ގިއުފްރާ ޖުލައި 15 ގައި ކޯޓަށް ހުށަހެޅި ބަޔާނެއްގައި ބުނެފައިވަނީ، މައްސަލަ ހައްލުކުރުމުގެ ބައެއްގެ ގޮތުން އަދާނީގެ އިންވެސްޓްމަންޓް ވައުދު ފުއްދުމަށް އަދާނީ ގްރޫޕުން "ތައްޔާރަށް" އޮތް ކަމަށް ޖަސްޓިސް ޑިޕާޓްމަންޓަށް އަންގާފައިވާނެ ކަމަށެވެ.

ފަނޑިޔާރު ގަރައުފީޒް ލިޔުއްވާފައިވަނީ، ފައިސާގެ ހުށަހެޅުންތައް މެދުވެރިކޮށް މި ރިޝްވަތުގެ މައްސަލަ ހައްލުކުރުމަށް ގިއުފްރާ ތަކުރާރުކޮށް ކުރެއްވި މަސައްކަތްތަކުގެ ރަނގަޅު ނުބައާއި މެދު އޭނާ ވަކި ގޮތެއް ނުނިންމަވާ ކަމަށެވެ.

"މިފަދަ ހުށަހެޅުންތަކުގެ ސަބަބުން އިންސާފު ގާއިމުކުރުމަށާއި ގާނޫނީ އިމުގެ ތެރެއިން ކަންކަން ހަމަހަމަކޮށް ހިންގުމަށް ކުރާނެ އަސަރަކާ މެދު ގޮތެއް ނިންމާނީ އާންމު ރައްޔިތުން،" ފަނޑިޔާރު ލިޔުއްވާފައިވެ އެވެ.