ފާއިތުވި 6 މަސް ދުވަހު ބަލައިފާސްކުރެވުނު ކޮންމެ 100 އުޅަނދަކުން 51 އުޅަނދު ޖޫރިމަނާ ކޮށްފައިވޭ: ފުލުހުން

ފާއިތުވި 6 މަސް ދުވަހު ބަލައިފާސްކުރެވުނު ކޮންމެ 100 އުޅަނދަކުން 51 އުޅަނދު ޖޫރިމަނާ ކޮށްފައިވާ ކަމަށް މޯލްޑިވްސް ޕޮލިސް ސަރވިސް އިން ބުނެފި އެވެ. 

ހޯމަ ދުވަހު ފުލުހުން ވަނީ، މަގުމަތީގެ ރައްކާތެރިކަން ކަށަވަރު ކުރުމަށް މާލޭ ސިޓީގައި، 1 ޖެނުއަރީ 2026ން 30 ޖޫން 2026  ކުރެވުނު މަސައްކަތުގެ ތަފާސްހިސާބު އާއްމު ކޮށްފަ އެވެ. 

Advertisement

ފުލުހުން ބުނީ، މި މުއްދަތުގެ ތެރޭގައި މާލޭގެ މަގުތަކުގައި ޓްރެފިކް ފުލުހުން 21,354 އުޅަނދު ބަލައިފާސްކޮށް އޭގެ ތެރެއިން 10,878 ފަހަރު ޖޫރިމަނާކޮށް 8,740 ފަހަރު ނަސޭހަތް ދީފައިވާ ކަމަށެވެ. 

މި 181 ދުވަހުގެ ތެރޭގައި ދުވާލެއްގެ މައްޗަށް އެވަރެޖުކޮށް 118 އުޅަނދު ފާސްކޮށް 60 ޖޫރިމަނާ ކުރެވިފައިވެ އެވެ. ބަލައިފާސްކުރެވުނު ކޮންމެ 100 އުޅަނދަކުން ގާތްގަނޑަކަށް 51 އުޅަނދު ޖޫރިމަނާ ކުރެވިފައިވާއިރު، 41 އުޅަނދު ދުއްވި ފަރާތްތަކަށް ނަސޭހަތް ދީފައިވާ ކަމަށް ފުލުހުން ބުނެ އެވެ. 

މަގުމަތީގެ ގަވާއިދުތައް ތަންފީޒުކޮށް އަމާންކަން ކަށަވަރުކުރުމަށްޓަކައި، މި މުއްދަތުގެ ތެރޭގައި 998 ޗެކްޕޮއިންޓެއް ގާއިމުކޮށްފައިވެ އެވެ. މީގެ އިތުރުން، ސްކޫލް ސަރަހައްދުތަކާއި މަގުމަތީގެ ޓްރެފިކް ބެލެހެއްޓުމަށް ޖުމްލަ 10,263 ހަރަކާތެއް ކުރިއަށް ގެންގޮސްފައިވެ އެވެ. މިއީ ދުވާލެއްގެ މައްޗަށް ބަލާއިރު އެވްރެޖްކޮށް 6 ޗެކްޕޮއިންޓާއި، ޓްރެފިކް ބެލެހެއްޓުމުގެ 57 ހަރަކާތް ކަމަށް ފުލުހުން ބުނެ އެވެ.

ޕާކިންގ މައްސަލަތަކަށް ހައްލު ހޯދުމަށް ކުރެވޭ މަސައްކަތްތަކާ ގުޅޭގޮތުން ފުލުހުން ބުނީ، އުޅަނދުތައް ޓޯކުރުމުގެ ބަދަލުގައި އަމިއްލައަށް އެ ތަކެތި ނެގުމަށް އެދުމުގެ ގޮތުން އުޅަނދުތަކުގެ ވެރި ފަރާތްތަކަށް ޖުމްލަ 23,608 ފޯނު ކޯލު ކޮށްފައިވާ ކަމަށެވެ. މިއީ ދުވާލެއްގެ މައްޗަށް އެވްރެޖްކޮށް 130 ކޯލެވެ.

މީގެ އިތުރުން ގަވާއިދާ ހިލާފަށް ޕާކުކޮށްގެން ޖުމްލަ 3,417 އުޅަނދެއް ޓޯކޮށްފައިވާއިރު، އޭގެ ތެރޭގައި ހިމެނެނީ 3,336 ސައިކަލާއި ހަތަރުފުރޮޅުލީ 81 އުޅަނދު ކަމަށެވެ.

މީގެ އިތުރުން، ރަސްމީ އެކި މުނާސަބަތުތަކާ ގުޅިގެން ނޯޓިސް ދިނުމަށްފަހު 1,080 އުޅަނދެއް އެހެން ސަރަހައްދުތަކަށް ބަދަލުކުރެވުނު ކަމަށާއި، މި ތަފާސްހިސާބުތަކަށް ބަލާއިރު، ޓޯކުރުމާއި އެހެން ސަރަހައްދުތަކަށް ބަދަލުކުރުމުގެ ޖުމްލަ 4,497 އަށް އަރާ ކަމަށް ފުލުހުން ބުނެ އެވެ. 

މަގުމަތީގެ ރައްކާތެރިކަން ކަށަވަރު ކުރުމަށް މާލޭ ސިޓީގައި، 1 ޖެނުއަރީ 2026ން 30 ޖޫން 2026 ފުލުހުން ކުރި މަސައްކަތުގެ ތަފާސްހިސާބު | މޯލްޑިވްސް ޕޮލިސް ސާރވިސް

ލައިސަންސް ނެތި އުޅަނދު ދުއްވި 1,052 ފަރާތަކަށް ފިޔަވަޅު އަޅާފައިވާއިރު، މިއީ އެވްރެޖްކޮށް ދުވާލަކު 6 މީހުންނެވެ. މީގެ އިތުރުން، ރަޖިސްޓްރީކޮށްފައިވާ ޒޯން ނޫން އެހެން ޒޯނެއްގައި ދުއްވި 71 އުޅަނދަކާއި، ނުރައްކާތެރިކޮށް ދުއްވުމުގެ 77 މައްސަލައެއް ފާހަގަކުރެވިފައިވާ ކަމަށް ފުލުހުން ބުނެ އެވެ. އަދި ފުލުހުންގެ އެކި ތަހުގީގުތަކާ ގުޅުންހުރި 348 އުޅަނދެއްގެ އިތުރުން، ގަވާއިދާ ހިލާފަށް ބަދަލު ގެނެސްގެން ދުއްވި 32 އުޅަނދަކާމެދު ފިޔަވަޅު އަޅާފައިވާ ކަމަށް ވެސް ފުލުހުން ބުނެ އެވެ. 

ފުލުހުން ބުނީ، ޖޫރިމަނާ ކުރެވުނު ޖުމްލަ 10,878 އަދަދުން ޖޫރިމަނާގެ 59 ބާވަތެއްގެ ކުށަށް ބެހިފައިވާއިރު، އޭގެ ތެރެއިން އެންމެ ގިނައީ އުޅަނދުގެ އަހަރީ ފީ މުއްދަތު ހަމަވެފައިވާ މައްސަލަތައް ކަމަށެވެ.

އެގޮތުން އަހަރީ ފީގެ މައްސަލަތަކުގައި 2,249 ޖޫރިމަނާއެއް ކޮށްފައިވާއިރު، މިއީ ޖުމްލަ ޖޫރިމަނާގެ 20.67 އިންސައްތަ އެވެ. ތަފާސްހިސާބުތަކަށް ބަލާއިރު، އެންމެ ގިނައިން ފާހަގަކުރެވުނު 10 ބާވަތުގެ ކުށަށް އެކަނިވެސް 8,611 ޖޫރިމަނާ ކޮށްފައިވެ އެވެ. މިއީ މުޅި ޖުމްލަ ޖޫރިމަނާގެ 79.16 އިންސައްތަ އެވެ.

ޖޫރިމަނާ ކުރެވުނު މައިގަނޑު ދާއިރާތަކުގެ ތެރޭގައި އަހަރީ ފީގެ އިތުރުން، އިންޝުއަރެންސާއި ރޯޑްވާދިނަސްގެ މުއްދަތު ހަމަވުމާއި، ޑްރައިވިންގ ލައިސަންސް ނެތި ދުއްވުމާއި، ޓްރެފިކް ނިޝާންތަކާ ހިލާފުވުން ހިމެނެ އެވެ. މީގެ އިތުރުން ނަންބަރު ޕްލޭޓްގެ މައްސަލަތަކާއި، ދުއްވަމުން ފޯނު ބޭނުންކުރުމާއި، ގަވާއިދާ ހިލާފަށް ޕާކުކުރުމުގެ އިތުރުން، މުދާ އުފުލުމާއި ޓެކްސީ ކުރުމުގެ ގަވާއިދުތަކާ ހިލާފުވެގެން ކުރެވުނު ޖޫރިމަނާތައް ފާހަގަކުރެވޭ ކަމަށް ފުލުހުން ބުނެ އެވެ.