މިއަހަރުގެ ތެރޭގައި 331 ފުލުހުންނަށް މަޤާމުގެ ކުރިއެރުން ދެނީ
23 އޯގަސްޓު 2026 | އާދީއްތަ 11:03ފުލުހުންގެ ރަސްމީ ވެބްސައިޓުގައި ބުނެފައި ވަނީ މިއަހަރުގެ ތެރޭގައި ދިވެހި ފުލުހުންގެ ޚިދުމަތުގެ ޖުމްލަ 331 އޮފިސަރަކަށް މަޤާމުގެ ކުރިއެރުން ދިނުމަށް ނިންމާފައިވާއިރު، އޭގެ ތެރެއިން ދެބައިކުޅަ އެއްބައި ފުލުހުންނަށް މަޤާމުގެ ކުރިއެރުން އާދީއްތަ ދުވަހު ހަވާލު ކޮށްފައިވާ ކަމަށް
ފުލުހުންނަށް މަޤާމުގެ ކުރިއެރުން ދިނުމަށް ބޭއްވި ރަސްމިއްޔާތުގައި ކޮމިޝަނަރ އޮފް ޕޮލިސް އަހުމަދު މުހައްމަދު | މޯލްޑިވްސް ޕޮލިސް
މިއަހަރުގެ ތެރޭގައި 331 ފުލުހުންނަށް މަގާމުގެ ކުރިއެރުން ދޭން ނިންމައިފި އެވެ.
ފުލުހުންގެ ރަސްމީ ވެބްސައިޓުގައި ބުނެފައި ވަނީ މިއަހަރުގެ ތެރޭގައި ދިވެހި ފުލުހުންގެ ޚިދުމަތުގެ ޖުމްލަ 331 އޮފިސަރަކަށް މަޤާމުގެ ކުރިއެރުން ދިނުމަށް ނިންމާފައިވާއިރު، އޭގެ ތެރެއިން ދެބައިކުޅަ އެއްބައި ފުލުހުންނަށް މަޤާމުގެ ކުރިއެރުން އާދީއްތަ ދުވަހު ހަވާލު ކޮށްފައިވާ ކަމަށެވެ.
އާދީއްތަ ދުވަހުގެ ރަސްމިއްޔާތުގައި ޕްރޮމޯޝަންގެ ލިޔުން ހަވާލު ކޮށްފައި ވަނީ ސީނިއާ ސާޖަންޓް ރޭންކުން ސަބް އިންސްޕެކްޓާ ރޭންކަށް ކުރިއެރުން ލިބުނު 35 ފުލުހުންނާއި ސާޖަންޓް ރޭންކް އިން ސީނިއާ ސާޖަންޓް ރޭންކަށް ކުރިއެރުން ލިބުނު 121 ފުލުނުންނާއި ކޮންސްޓަބަލް ރޭންކް އިން ސާޖަންޓް ރޭންކަށް ކުރިއެރުން ލިބުނު 10 ފުލުހުންނަށެވެ.
އިސްކަންދަރު ބިލްޑިންގައި ބޭއްވި މި ރަސްމިއްޔާތުގައި، މުވައްޒަފުންނަށް ހައްޤުވާ މަޤާމުގެ ކުރިއެރުމާއި، ކުލަ އާއި މެޑަލް ފަދަ ޝަރަފުތައް ދިނުމުގައި ލީޑާޝިޕް އިން ޚާއްސަ އިސްކަމެއް ދީގެން މަސައްކަތް ކުރަމުންދާ ކަމަށް ކޮމިޝަަނަރ އޮފް ޕޮލިސް އަހުމަދު މުހައްމަދު ވިދާޅުވި އެވެ. އެގޮތުން، ކަނޑައެޅިފައިވާ އުސޫލުތަކާއި ޤަވާއިދުތަކުގެ ތެރެއިން ޝަރުތު ހަމަވާ އެއްވެސް މުވައްޒަފެއްގެ ހައްގެއް ނުހިފަހައްޓައި ފޯރުކޮށްދޭނެ ކަމަށް ޕޮލިސް ކޮމިޝަނަރު ވިދާޅުވި އެވެ.
ރަސްމިއްޔާތުގައި ފުލުހުންނާ މުޚާތަބު ކުރައްވައި ޕޮލިސް ކޮމިޝަނަރު ވިދާޅުވީ، ރޭންކެއް ބަދަލު ވެގެން ދިޔުމަކީ އިއްޔެ ކުރި މަސައްކަތަށް ވުރެ ބޮޑަށް ފަރުވާތެރިވެ، އިތުރު ހަރުފަތެއްގެ ޒިންމާ އުފުލަން ޖެހޭ ކަމެއް ކަމަށެވެ. އަދި ޕްރޮމޯޝަނަށް ފަހު މަސައްކަތުގެ މާހައުލަށް ނުކުންނައިރު، ހަވާލު ކުރެވުނު ރޭންކާ އެއްވަރަށް ޚިދުމަތުގެ ފެންވަރު ހިފެހެއްޓޭތޯ ބަލާނެ ފަރާތްތައް ގިނަވާނެކަން ފާހަގަކުރައްވައި، މުއައްސަސާގެ އެތެރެއިންނާއި ބޭރުން ވެސް ސުވާލު ނުއުފެދޭނެ ފަދަ ގޮތަކަށް މަސައްކަތްކޮށް، ނަމޫނާ ދެއްކުމަށް އިލްތިމާސް ކުރެއްވި އެވެ.
މީގެ އިތުރުން ފުލުހުންގެ އަޚުލާޤީ މިންގަނޑުތަކަށް އަލިއަޅުއްވައި ލައްވަމުން ޕޮލިސް ކޮމިޝަނަރު ވިދާޅުވީ، އަޚުލާޤަކީ އިހުތިޔާރީ ކަމެއް ނޫން ކަމަށާއި އެއީ ޤާނޫނު ތަންފީޒު ކުރާ އެންމެ އިސް މުއައްސަސާގެ ކޮންމެ މުވައްޒަފެއްގެ ކިބައިގައި ކޮންމެހެން ހުންނަން ޖެހޭ އަސާސީ ސިފައެއް ކަމަށެވެ.
