މޮރޮކޯގެ ކުރީގެ ކޯޗު ރެގްރަގީ އާއެކު ޤަތަރުގެ އަމީރު ކެފޭއެއްގައި އިންނެވުމުން އެތައް ބައެއްގެ ސަމާލުކަން

މޮރޮކޯގެ ޤައުމީ ޓީމުގެ ކުރީގެ ކޯޗު ވަލީދު ރެގްރަގީ، ޤަތަރުގެ އަމީރު ޝެއިޚް ތަމީމް ބިން ހަމަދު އަލް ޘާނީ އާއެކު ފްރާންސްގެ ވެރި ރަށް ޕެރިހުން ފެނުމާ ގުޅިގެން، އޭނާގެ ކޯޗިން ކެރިއަރުގެ ކުރިމަގާ މެދު ގިނަ ބައެއްގެ މެދުގައި ސުވާލުތަކެއް އުފެދިއްޖެ އެވެ.

ސޯޝަލް މީޑިއާގައި މިހާރު ދައުރުވަމުންދާ ވީޑިއޯ ކްލިޕަކުން ފެންނަ ގޮތުގައި، ރެގްރަގީ އާއި ޤަތަރުގެ އަމީރު ތިއްބެވީ ޕެރިހުގެ ކެފޭއެއްގެ ތެރޭގައި އެވެ. މި މަންޒަރަށް ގިނަ ބައެއްގެ ސަމާލުކަން ހުއްޓިފައި ވަނީ، މޮރޮކޯގެ ކޯޗު ކަމުން ވަކިވި ފަހުން ރެގްރަގީ މިވަގުތު އެއްވެސް ޓީމަކާ ހަވާލު ނުވެ ހުރި ދަނޑިވަޅެއްގައި، މި ބައްދަލުވުން ހިނގާފައިވާތީ އެވެ.

މި ބައްދަލުވުމާ ގުޅިގެން ފުޓުބޯޅަ ސަޕޯޓަރުންނާއި ސޯޝަލް މީޑިއާ ބޭނުންކުރާ ފަރާތްތަކުން އަންނަނީ ރެގްރަގީ ޤަތަރުގެ ޤައުމީ ޓީމާ ނުވަތަ އެ ޤައުމުގެ ފުޓުބޯޅައިގެ އިސް މަޤާމަކާ ހަވާލު ވެދާނެ ކަމަށް ބުނެ ވާހަކަ ދައްކަމުންނެވެ. ނަމަވެސް މިކަމާ ގުޅޭ ގޮތުން މިހާތަނަށް އެއްވެސް ފަރާތަކުން ރަސްމީކޮށް އެއްޗެއް ބުނެފައި ނުވެ އެވެ.

މިފަދަ އަޑުތަކެއް ފެތުރިފައި މިވަނީ ޤަތަރުގެ ޤައުމީ ޓީމުގެ ކަންކަން އަލުން ތަރުތީބު ކުރަން ޖެހިފައިވާ ދަނޑިވަޅެއްގައި އެވެ. އެގޮތުން 2022 ވަނަ އަހަރާއި 2026 ވަނަ އަހަރުގެ ފީފާ ވޯލްޑް ކަޕްގައި ވެސް ޤަތަރަށް ގުރޫޕް ސްޓޭޖުން ކުރިއަށް ދެވިފައި ނުވުމަކީ، މިހާރުގެ ކޯޗު ސްޕެއިންގެ ހޫލެން ލޮޕެޓެގީގެ ބަދަލުގައި އައު ގޮތްތަކެއް ހޯދުމަށް އެ ޤައުމުގެ އޮފިޝަލުންނަށް މަޖުބޫރުވާނެ ކަމެއް ކަމަށް ބެލެވެ އެވެ.

ޕެރިހުގައި ބޭއްވި މި ބައްދަލުވުމަކީ ރަސްމީ މަޝްވަރާތަކެއް ނުވަތަ، ކުޅިވަރުގެ މަޝްރޫއަކާ ގުޅުންހުރި ބައްދަލުވުމެއްކަން ކަށަވަރު ކޮށްދޭ އެއްވެސް ރަސްމީ މައުލޫމާތެއް މިހާތަނަށް ލިބިފައި ނުވެ އެވެ. މިއީ ރެގްރަގީގެ ކުރިމަގާ އެއްވެސް ގުޅުމެއް ނެތް އަމިއްލަ ބައްދަލުވުމަކަށް ވުމަކީ ވެސް އެކަށީގެންވާ ކަމެކެވެ.

ފާހަގަ ކޮށްލެވޭ ގޮތުގައި ޤަތަރުގެ މިހާރުގެ ކޯޗު ލޮޕެޓެގީ އެ ޤައުމާ އެކު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ފެބްރުއަރީ މަހުގެ ނިޔަަލަށެވެ. ޤަތަރުގެ ކޯޗުކަމާ އޭނާ ހަވާލުވެފައި ވަނީ 2025 ވަނަ އަހަރު އެވެ.