ޓްރަބްޒޮންސްޕޯގައި ޞަލާހު ކުޅުނު ފުރަތަމަ މެޗު އެއްވަރުވެއްޖެ

ދާދި ފަހުން ތުރުކީގެ ޓްރަބްޒޮންސްޕޯ އަށް ބަދަލުވި މިޞްރުގެ ފޯވާޑު މުޙައްމަދު ޞަލާހު، އެ ކުލަބުގައި ކުޅުނު ފުރަތަމަ މެޗު އެއްވަރުވެއްޖެ އެވެ. 

ތުރުކީގެ ސުޕަރ ލީގުގެ އައު ސީޒަން ފެށުމުގެ ގޮތުން ކަސިމްޕާސާ އާއި ޓްރަބްޒޮންސްޕޯ ބައްދަލު ކުރި މެޗު ނިމުނީ 1-1 އިން އެއްވަރު ވެގެންނެވެ. މިއީ ލިވަޕޫލް ދޫކޮށްލުމަށް ފަހު، ޓްރަބްޒޮންސްޕޯ އަށް ބަދަލުވި ފަހުން ޞަލާހު އެ ޓީމަށް ކުޅުނު ފުރަތަމަ މެޗެވެ. 

މި މެޗުގެ ފުރަތަމަ ހާފުގައި ނޯއާ ސާވިއޯލޯ ކާމިޔާބުކޮށްދިން ލަނޑާ އެކު ލީޑު ނެގީ ޓްރަބްޒޮންސްޕޯ އިންނެވެ. ނަމަވެސް، މެޗުގެ ދެވަނަ ހާފުގައި ކަސިމްޕާސާގެ އެޑްރިއަން ބެނެޑިޗަކް ވަނީ ޕެނަލްޓީ އަކުން ލަނޑެއް ޖަހައި މެޗުގެ ނަތީޖާ ހަމަހަމަކޮށްފައި އެވެ. ކަސިމްޕާސާ އިން ނަތީޖާ ހަމަހަމަ ކުރިތާ މާގިނައިރުތަކެއް ނުވަނީސް، މެޗުގެ 58 ވަނަ މިނެޓުގައި ޞަލާހު ވަނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުމެފައި އެވެ. 

ލިވަޕޫލްގައި ނުވަ ސީޒަން ހޭދަކުރުމަށް ފަހު، ހިލޭ ޓްރާންސްފާއެއްގައި ޓްރަބްޒޮންސްޕޯއާ ގުޅުނު ޞަލާހު ވަނީ، މެޗުގައި ޓްރަބްޒޮންސްޕޯ އަށް ލަނޑު ޖަހަން ރަނގަޅު ފުރުސަތު ތަކެއް ހޯދައިފަ އެވެ. ނަމަވެސް، މެޗުގައި ޞަލާހު އަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. ކާމިޔާބުކުރުމުގައި އެ ޓީމު ވަނީ ނާކާމިޔާބުވެފައެވެ.

މެޗަށް ފަހު ވާހަކަ ދައްކަމުން ޓްރަބްޒޮންސްޕޯގެ ކޯޗު ފާތިހު ޓެކޭ ބުނީ، މިއީ ވަރަށް ދެރަ ފެށުމެއް ކަމަށާއި، މިއީ އެ ޓީމުން މޮޅުވާން މަޖުބޫރު މެޗަކަށް ވީ ނަމަވެސް، އެކަން ކާމިޔާބު ނުވީ ކަމަށެވެ. މީގެ އިތުރުން އަންނަ އަންގާރަ ދުވަހު ހަންގޭރީގެ ފެރެންކްވަރޯސްއާ ދެކޮޅަށް ކުޅޭ ޔޫރޮޕާ ލީގުގެ ޕްލޭ އޮފް މެޗަކީ ވަރަށް މުހިންމު މެޗެއްކަން ފާހަގަ ކުރަމުން އޭނާ ބުނީ، އެ ޓީމަކީ ޓްރަބްޒޮންސްޕޯ އަށްވުރެ މާ ވަރުގަދަ ޓީމެއް ކަމަށެވެ.

ތުރުކީގެ ލީގު ހަތް ފަހަރު ކާމިޔާބު ކޮށްފައިވާ ޓްރަބްޒޮންސްޕޯ އަކީ މިދިޔަ ސީޒަންގެ ލީގުގެ ތިން ވަނަ ހޯދި އަދި ތުރުކީ ކަޕްގެ ޗެމްޕިއަން ޓީމެވެ. އުމުރުން 34 އަހަރުގެ ޞަލާހު ޓްރަބްޒޮންސްޕޯ އަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ.