އެންމެ މޮޅު ކުޅުންތެރިޔާ އަދި އެންމެ މޮޅު ކޯޗު ހުރީ ރެއާލްގައި: ޕެރޭޒް

ދުނިޔޭގެ އެންމެ މޮޅު ކުޅުންތެރިޔާ އަދި އެންމެ މޮޅު ކޯޗު ހުރީ ރެއާލް މެޑްރިޑްގައި ކަމަށް އެ ކްލަބްގެ ރައީސް ފްލޮރެންޓީނޯ ޕެރޭޒް ބުނެފިއެވެ.

ހޯމަ ދުވަހު 2-0 އިން ރެއާލްއިން އެސްޕަންޔޯލް ބަލިކުރި މެޗުގެ ކުރިން މީޑިއާއާ ވާހަކަ ދައްކަމުން ޕެރޭޒް ބުނެފައި ވަނީ ދުނިޔޭގެ އެންމެ މޮޅު ކުޅުންތެރިޔަކީ ކްރިސްޓިއާނޯ ރޮނާލްޑޯ ކަމަށާއި އޭނާ ރެއާލްއަށް ކުޅުމަކީ އެ ޓީމަށް ލިބޭ ވަރަށް ބޮޑު ފަހުރެއް ކަމަށެވެ. އެގޮތުން އޭނާ ދުނިޔޭގެ އެންމެ މޮޅު ކުޅުންތެރިޔާގެ މަގާމް ހަތަރު ފަހަރު ހޯދާފައިވާ ކަމަށާއި މިއަހަރު ވެސް އެ އެވޯޑު ލިބޭނީ އޭނާއަށް ކަމަށް ޕެރޭޒް ބުނެފައި ވެއެވެ.

ހަމައެހެންމެ ރޮނާލްޑޯއަކީ ރެއާލްގެ ތާރީހުގައި ވެސް އެންމެ ގިނަ ލަނޑު ޖެހި ކުޅުންތެރިޔާކަން ފާހަގަކޮށް އޭނާއަކީ "ރެއާލް މެޑްރިޑް ޑީއެންއޭ" ހުރި ހުނަރުން ފުރިފައިވާ ކުޅުންތެރިޔެއް ކަމަށް ޕެރޭޒް ބުނެފައި ވެއެވެ. ޕެރޭޒް މިހެން ބުނެފައިވާއިރު ރޮނާލްޑޯ ވަނީ ރެއާލްއަށް 13 ތަށި ކާމިޔާބުކޮށްދީފައެވެ. މީގެ ތެރޭގައި ތިން ޗެމްޕިއަންސް ލީގާއި ދެ ލަލީގާ ތަށި ހިމެނެއެވެ.

ޕެރޭޒްވަނީ މިދިޔަ ސީޒަނުގައި ރެއާލްއަށް ޗެމްޕިއަންސް ލީގާއި ލަލީގާ ކާމިޔާބުކޮށްދިން ކޯޗު، ޒައިނުއްދީން ޒިދާންއަށް ވެސް ތައުރީފް ކޮށްފައެވެ. ރެއާލްގައި ކުޅުންތެރިޔެއްގެ ގޮތުގައި ވެސް ގިނަ ކާމިޔާބުތަކެއް ހޯދި ޒިދާން ވަނީ ކޯޗެއްގެ ގޮތުގައި އެ ކްލަބާ ހަވާލުވެ އަނެއްކާ ވެސް ރެއާލްއަކީ ސްޕެއިން އަދި ޔޫރަޕުގެ އެންމެ ގަދަ އެއް ބާރުގެ ގޮތުގައި ހަދައިދީފައެވެ.

ޒިދާންއާ ބެހޭ ގޮތުން ޕެރޭޒް ބުނެފައިވަނީ ޒިދާންއަކީ "މެޑްރިޑްސީމޯ" ގެ ނިޝާނެއް ކަމަށާއި މިދިޔަ ސީޒަނުގައި އެ ކްލަބުން ހޯދި ހުރިހާ ކާމިޔާބެއްގެ ވެސް މޭސްތިރިއަކީ ޒިދާން ކަމަށެވެ. އަދި ޒިދާން ރަމްޒުކޮށްދެނީ ރެއާލް އެ ބިންގަލެއްގެ މައްޗަށް ބިނާވެފައިވާ ބިންގާ ކަމަށް ވެސް ޕެރޭޒް ބުނެފައި ވެއެވެ. އަދި އޭނާ ހޯދަމުންދާ ނަތީޖާތަކުން އޭނާއަކީ ކުޅުންތެރިޔެއްގެ ގޮތުގައި ހޯދި ކާމިޔާބީ، ކޯޗެއްގެ ގޮތުގައި ވެސް ހޯދުމަށް މަސައްކަތްކުރާ މީހެއްކަން އެނގިގެންދާ ކަމަށް ވެސް ޕެރޭޒް ބުނެފައިވެއެވެ.

ނާލްޑޯ އާއި ޒިދާންއަށް ޕެރޭޒް ތައުރީފުގެ ބަސްތަށް އޮއްސާލާފައިވާއިރު ރޮނާލްޑޯ އާއި ޒިދާންއަކީ ވެސް ރެއާލްއަށް ގިނަ ކާމިޔާބީތަކެއް ހޯދައިދީ އެ ކްލަބްގެ ތާރީހުން ޖާގަ ހޯދާފައިވާ ދެ މީހުންނެވެ. އެގޮތުން ޒިދާންވަނީ ކޯޗެއްގެ ގޮތުގަ އާއި ކުޅުންތެރިޔެއްގެ ގޮތުގައި އެ ކްލަބާ އެކު 13 ތަށި ކާމިޔާބުކޮށްފައެވެ. އަދި ރޮނާލްޑޯވަނީ 2009 ވަނަ އަހަރު މެންޗެސްޓާ ޔުނައިޓެޑުން ރެއާލްއަށް ބަދަލުވި ފަހުން އެ ޓީމަށް 268 މެޗު ކުޅެދީ 285 ލަނޑު ޖަހަދީފައެވެ.