ކޮސޯވޯގެ މަޖިލިސް ހޫނުވެ، އިދިކޮޅު މެމްބަރަކު ބޮޑު ވަޒީރުގެ ގަޔަށް ކުކުޅު ބިސް ޖަހައިފި

ކޮސޯވޯގެ ގާނޫނު ހަދާ މަޖިލީހުގެ ޖަލްސާއެއް ކުރިއަށް ދަނިކޮށް، އެ ޤައުމުގެ އިދިކޮޅު މެމްބަރަކު ބޮޑު ވަޒީރު އަލްބިން ކުރުތީގެ ގަޔަށް ކުކުޅު ބިސް ޖަހައިފި އެވެ.

މި ހާދިސާ ހިނގާފައިވަނީ މިދިޔަ ޖޫން މަހު ބޭއްވި އަވަސް އިންތިޚާބަށް ފަހު، އައު މަޖިލިސް އެކުލަވާލުމަށް ބޭއްވި ރަސްމީ ޖަލްސާގެ ތެރެއިންނެވެ.

މަންޒަރު ދުށް ފަރާތް ތަކުން ރިޕޯޓު ކޮށްފައިވާ ގޮތުގައި، ބޮޑު ވަޒީރު އަލްބިން ކުރުތީ މަޖިލީހުގައި ވާހަކަ ދައްކަވަން ހުންނަވަނިކޮށް، އިދިކޮޅު މެމްބަރަކު ވަނީ ކުއްލި ގޮތަކަށް ބޮޑު ވަޒީރާ ދިމާލަށް ބިސް އުކަން ފަށާފައި އެވެ. މި ހަމަލާއާ ގުޅިގެން މަޖިލީހުގެ ތަޅުމުގައި ބޮޑު ހަލަބޮލި ކަމެއް އުފެދި، ޖަލްސާގެ މެދު ތެރެއިން ބޮޑު ވަޒީރުގެ ސަލާމަތީ ކަންކަން ވަރުގަދަ ކުރަން ޖެހުނެވެ.

މި ހާދިސާ ހިނގި ވަގުތަކީ، ކޮސޯވޯގެ ސިޔާސީ މަސްރަހު ވަރަށް ބޮޑަށް ނުތަނަވަސްވެފައިވާ ދަނޑިވަޅެކެވެ. ޚާއްސަކޮށް ޖޫން މަހުގެ އިންތިޚާބަށް ފަހު ސަރުކާރު އެކުލަވާލުމާއި، މަޖިލީހުގެ އިދާރީ އޮނިގަނޑު ކަނޑަ އެޅުމުގެ މަސައްކަތް ކުރިއަށްދާއިރު، ސަރުކާރާއި އިދިކޮޅު އިއްތިހާދާ ދެމެދު ވަނީ ބޮޑެތި ޚިޔާލު ތަފާތުވުން ތަކެއް އުފެދިފައި އެވެ.

ކޮސޯވޯގެ މަޖިލީހުގެ ތެރޭގައި މީގެ ކުރިން ވެސް މިފަދަ ހަމަނުޖެހުންތައް ހިނގާފައިވާކަން ފާހަގަ ކުރެވެ އެވެ. މީގެ ކުރިން ބޭއްވި ބައެއް ޖަލްސާ ތަކުގައި އިދިކޮޅު މެމްބަރުން ވަނީ މަޖިލީހުގެ ތަޅުމުގައި ކަރުނަ ގޭސް ޖަހައި، ޖަލްސާތައް ހުއްޓުވަން ވެސް މަސައްކަތް ކޮށްފައި އެވެ.

ނަމަވެސް، އައު ދައުރެއް ފެށުމަށް ބޭއްވި ފުރަތަމަ ޖަލްސާ ތަކުގެ ތެރެއިން ބޮޑު ވަޒީރަށް އަމާޒުކޮށް މިފަދަ ހަމަލާއެއް ދިނުމަކީ ސިޔާސީ މަސްރަހު އިތުރަށް ގޯސް ވެދާނެ ކަމެއްގެ ގޮތުގައި ތަޖުރިބާކާރުން އަންނަނީ ބުނަމުންނެވެ. 

މި ހާދިސާއާ ގުޅިގެން ސަރުކާރަށް ތާއީދުކުރާ މެމްބަރުން ވަނީ، އެ އަމަލު ވަރަށް ބޮޑަށް ކުށްވެރި ކޮށްފައި އެވެ. އަދި އެއީ ޑިމޮކްރެޓިކް އުސޫލުތަކާ ޚިލާފު، ދަށު ދަރަޖައިގެ އަމަލެއްގެ ގޮތުގައި އެ މެމްބަރުން ސިފަކު ރެއްވި އެވެ. މި ހަމަލާ ދިން މެންބަރާ މެދު ފިޔަވަޅު އެޅުމާ ގުޅޭ ގޮތުން މަޖިލީހުގެ އިދާރާ އިން އަދި ވަކި އެއްޗެއް ހާމަކޮށްފައި ނުވެ އެވެ.