ބިންގަލެއް އަޅާފައި ހުރިއްޔާ މައްޗަށް އަރާނެ، ކުޑަކޮށް ލަސްވެސް ވެދާނެ: މިނިސްޓަރު ޝަހީމް
4 އޯގަސްޓު 2026 | އަންގާރަ 05:13ބިންގާ މައްޗަށް އަރާނެ ކަމަށާއި، އެކަމުގައި އެއްވެސް ޝައްކެއް ނެތް ކަމަށް ވެސް މިނިސްޓަރު ޝަހީމް ވަނީ ވިދާޅުވި. އެހެން ނަމަވެސް، އެކަން ލަސްވުމަށް ދިމާވާ ބައެއް ސަބަބުތައް ހުރެދާނެ ކަމަށާއި، އެހެން ވިޔަސް އެކަން އެއްކޮށް ނެތިގެން ނުދާނެ ކަމަށް ވެސް ޝަހީމް ވިދާޅުވި
އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި އިސްލާމިކް މިނިސްޓަރު ވާހަކަ ދައްކަވަނީ | ޕީޕަލްސް މަޖްލިސް
ސަރުކާރުން މަޝްރޫއެއްގެ ބިންގަލެއް އަޅާފައި ހުރިއްޔާ މައްޗަށް އަރާނެ ކަމަށާއި، ނަމަވެސް ބައެއް ސަބަބުތަކާ ހުރެ ލަސްތަކެއް ވެސް ކުރިމަތި ވެދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން މިނިސްޓަރު ޝަހީމް މިހެން ވިދާޅުވެފައި ވަނީ، ކަނޑިތީމު ދާއިރާގެ މެންބަރު އަމީން ފައިސަލް ކުރެއްވި ސުވާލަށް ޖަވާބު ދެއްވަމުންނެވެ.
މެންބަރު އަމީން ވިދާޅުވީ 2025 ވަނަ އަހަރުގެ އޮކްޓޫބަރު މަހުގެ ތެރޭގައި ރައީސް މުއިއްޒު ށ. އަތޮޅަށް ކުރެއްވި ދަތުރުފުޅުގައި އެ އަތޮޅު ނޫމަރާ އަށް ވަޑައިގެން، މިސްކިތެއްގެ ބިންގާ އަޅުއްވާފައިވާ ކަމަށެވެ. ނަމަވެސް، މިއަދާ ހަމައަށް އައިއިރު އެ މިސްކިތުގެ އަމަލީ އެއްވެސް މަސައްކަތެއް ކުރިއަށް ނުދާ ކަމަށް މެންބަރު ފާހަގަކުރެއްވި އެވެ.
އެހެންކަމުން ނޫމަރާގައި މިސްކިތެއް އިމާރާތް ކުރުމަށް އެޅި ބިންގަލުގެ އަމަލީ މަސައްކަތް ފެށިގެންދާނެ ތާރީހެއް ދެންނެވުމަށް މެންބަރު އަމީން ވަނީ އެދިވަޑައިގެންފައި އެވެ.
އެ ސުވާލަށް ޖަވާބު ދެއްވަމުން މިނިސްޓަރު ޝަހީމް ވިދާޅުވީ، ނޫމަރާ މިސްކިތުގެ މައުލޫމާާތު އެހެން ވަގުތެއްގައި ޖަވާބު ދެއްވާނެ ކަމަށެވެ. އެގޮތުން އެ މަޝްރޫއުގެ ތަފްސީލު ބައްލަވާލެއްވުމަށް ފަހު، ޖަވާބު ދެއްވާނެ ކަމަށް ވެސް މިނިސްޓަރު ޝަހީމް ވިދާޅުވި އެވެ. އެއާ އެކު މިނިސްޓަރު ޝަހީމް ވިދާޅުވީ ނޫމަރާގެ ރައްޔިތުން އަދި ރާއްޖޭގެ ރައްޔިތުންނަށް ދޭން ބޭނުންވާ ޔަޤީންކަމަކީ، ބިންގަލެއް އެޅިފައި ހުރެއްޖެ ނަމަ، އޭގެ މައްޗަށް ބިނާ ވެގެން ދާނެ ކަމަށެވެ. އެހެން ނަމަވެސް، އެކަން ލަސްވުމަށް ދިމާވާ ބައެއް ސަބަބުތައް ހުރެދާނެ ކަމަށާއި، އެހެން ވިޔަސް އެކަން އެއްކޮށް ނެތިގެން ނުދާނެ ކަމަށް ވެސް މިނިސްޓަރު ޝަހީމް ވަނީ ވިދާޅުވެފައި އެވެ.
އެހެން ނަމަވެސް އަޅުގަނޑު ޔަޤީންކަން އަރުވާާލަން ބޭނުންވޭ މެންބަރަށް ވެސް، އަދި އެ ރަށުގެ ލޮބުވެތި ރައްޔިތުންނަށް ވެސް، ބިންގަލެއް އެޅިގައި ހުރިއްޔާމުން އޭގެ މައްޗަށް ބިނާ ވެގެން ދާނެ. އާދެ، ބިންގާ މައްޗަށް އަރާނެ، އެޔަކު އެއްވެސް ޝައްކެއް ނެތް. ދެން އެކަން ލަސްވާން ދިމާވާ ބައެއް ސަބަބުތައް އެބަހުރި، ހުރެދާނެ އެނގޭތޯ. އެހެން ނަމަވެސް، އެކަން އެއްކޮށް ނެތިވެގެން ނުދާނެޑރ. މުހައްމަދު ޝަހީމް އަލީ ސައީދު
ސަރުކާރަށް ތިން އަހަރުވާން ކައިރިވެފައިވާއިރު، ރައީސް މުއިއްޒު އަތޮޅުތެރޭގެ ރަށްތަކަށް ކުރެއްވި ދަތުރުފުޅުތަކުގައި ވަނީ ގިނަ މަޝްރޫއުތަކެއްގެ އެއްބަސްވުމުގައި ސޮއިކޮށް، އަދި ބިންގާ ވެސް އަޅުއްވައިފަ އެވެ. އޭގެ ތެރޭގައި ގިނަ ރަށްތަކެއްގައި މިސްކިތް އެޅުމަށް އެއްބަސްވުމުގައި ސޮއި ކުރުމުގެ އިތުރުން، ބިންގާ ވެސް ވަނީ އަޅުއްވައިފަ އެވެ. ނަމަވެސް، އެ މަޝްރޫއުތަކުގެ އަމަލީ އެއްވެސް މަސައްކަތެއް ކުރިއަށްނުދެ އެވެ.
މީގެ އިތުރުން އަންގާރަ ދުވަހުގެ ޖަލްސާގައި މިނިސްޓަރު ޝަހީމް ވަނީ، ރާއްޖޭގެ އެކި ކަންކޮޅުތަކުގައި ސަރުކާރުން ހަވާލު ކޮށްފައިވާ މިސްކިތްތަކުގެ ވާހަކަ ދައްކަވައިފަ އެވެ. އޭގެ ތެރެއިން ގިނަ މަސައްކަތްތަކުގެ އަމަލީ އެއްވެސް މަސައްކަތެއް މިއަދާ ހަމައަށް ފެށިފައި ނުވާކަން، މިނިސްޓަރު ޝަހީމްގެ ވާހަކަ އިން ވަނީ ސާފުވެފައި އެވެ.
