ކިމް ޖޮންގ ނަމް މަރާލި ކަމުގެ ދަޢުވާ އަށް އިންކާރުކޮށްފި

އުތުރުކޮރެއާގެ ލީޑަރު ކިމް ޖޮންގ އުންގެ އެއްބަފާ ބޭބެ، ކިމް ޖޮންގ ނަމް މަރާލި ކަމަށް ދަޢުވާ ކުރާ ދެ އަންހެނުން، އެމީހުންގެ މައްޗަށް ކުރާ ދަޢުވާ އަށް އިންކާރުކޮށްފި އެވެ.

ކިމް ޖޮންގ ނަމް މަރާލާފައިވަނީ ޗައިނާގެ ބާރުގެ ދަށުގައި އޮންނަ މަކާއޫ އިން އެނބުރި މެލޭޝިއާ އަށް އައިތަނުން، މިދިޔަ ފެބްރުއަރީ މަހުގެ 13ވަނަ ދުވަހު، ކުއަލަ ލަމްޕޫރު އިންޓަރނޭޝަނަލް އެއަރޕޯޓުގެ ތެރޭގައެވެ.

އެއަރޕޯޓުގައި ހަރުކޮށްފައިވާ ސަލާމަތީ ކެމެރާތަކުގެ މަންޒަރުތަކުން ކިމް ޖޮންގ ނަމްގެ ފަހަތަން އައި ދެ އަންހެނަކު، ނަމްގެ މޫނުގައި އަތް އުނގުޅާތަން ފެނެއެވެ. އެ ދެ އަންހެނުންނަކީ އިންޑޮނީޝިއާގެ ރައްޔިތެއް ކަމަށްވާ ސިތީ އައިސިޔާ އަދި ވިއެޓްނާމްގެ ރައްޔިތެއް ކަމަށްވާ ޑޮއަން ތީ ހުއޮންގ ކަމަށް މެލޭޝިއާގެ ސަލާމަތީ ބާރުތަކުން ބުނެ އެވެ.

މެލޭޝިއާގެ ކަމާއިގުޅޭ އިދާރާތަކުން ވަނީ، ވިހަގަދަ ނާރވް އޭޖެންޓެއް ކަމަށްވާ 'ވީއެކްސް' ކިމް ޖޮންގ ނަމްގެ މޫނުގައި އުނގުޅުމަށް އެ ދެއަންހެނުން ތަމްރީންކޮށްފައިވަނީ އުތުރު ކޮރެއާގެ އޭޖެންޓުން ކަމަށް ތުޙުމަތުކޮށްފަ އެވެ.

މެލޭޝިއާގެ ކޯޓެއްގައި ހޯމަ ދުވަހު ބޭއްވި ޝަރީޢަތުގެ އަޑުއެހުމުގައި އެމީހުންގެ ވަކީލުން ވަނީ، އެކަން ދޮގުކޮށްފައެވެ. އަދި އެ ދެމީހުން ލައްވާ ބަޔަކު އެކަން ކުރުވާފައިވަނީ ޕްރޭންކް ޓީވީ ޝޯވ އެއްގެ ބައެއްގެ ގޮތުގައި ދައްކައިގެން ކަމަށް ހުއޮންގ އާއި އައިސިޔަގެ ވަކީލުން ބުނެއެވެ.

ހޯމަ ދުވަހު މެލޭޝިއާގެ ކޯޓެއްގައި ބޭއްވި އަޑުއެހުމަށް ވަޒަން ނާރާ ވެސްޓް ލައިގެން މި ދެ އަންހެނުން ހާޒިރުކުރިއިރު، ގިނަ އަދަދެއްގެ ފުލުހުން އެމީހުންގެ ސަލާމަތީ ކަންކަން ބެލެހެއްޓުމުގައި ހަރަކާތްތެރިވެފައިވެ އެވެ.