އުތުރު ކޮރެއާއާ އެކު މަޝްވަރާކުރަން އުޅުމަކީ ވަގުތު ބޭކާރުކުރުން ކަމަށް ޓްރަމްޕް ޓިލަރސަންއަށް ދަންނަވައިފި

އުތުރުކޮރެއާގެ ނިއުކްލިއަރ ޕްރޮގްރާމްގެ މައްސަލައިގައި މަޝްވަރާ ކުރެއްވުމަށް އެމެރިކާގެ ސެކްރެޓަރީ އޮފް ސްޓޭޓް ކުރައްވާ މަސައްކަތްޕުޅަކީ އެ މަނިކުފާނުގެ ވަގުތު ބޭކާރުކުރެއްވުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

"ހަކަތަ ބޭކާރު ނުކުރައްވާ ރެކްސް،އަޅުގަނޑުމެން ކުރަން ޖެހުނު ކަމެއް ކުރާނީ!" އުތުރުކޮރެ އާއާ އެމެރިކާގެ މަޝްވަރާތަކެއް ކުރެވުނު ކަމަށް އަޑުފެތުރުމުން ޓްރަމްޕް ކުރެއްވި ޓްވީޓެއްގައި ވިދާޅުވެފައި ވެއެވެ.

އުތުރުކޮރެއާގެ މައްސަލައިގައި ލިބިފައިވާ ކުރިއެރުން ރެކްސް ޓިލަރސަން ހޮނިހިރު ދުވަހު ވަނީ ހާމަކުރައްވާފައެވެ. ޓިލަރސަން ވިދާޅުވެފައި ވަނީ މަޝްވަރާކުރުމަށް އުތުރު ކޮރެއާ އިން ކުޑަ ޝައުގުވެރިކަމެއް ހުރި ކަމަށެވެ.

މި ވޭތުވެދިޔަ މަސްތަކުގައި ދެ ގައުމުންވެސް ގެންދިޔައީ އެއްބަޔަކު އަނެއްބަޔަކަށް ރުޅިވެރި ބަސްތައް ރައްދުކުރަމުންނެވެ.

އެމެރިކާއިން ބޭނުންވަނީ އުތުރުކޮރެއާގެ މިސައިލް ޕްރޮގްރާމް ހުއްޓާލުމެވެ. އެ ގައުމުން ގެންދަނީ ތަކުރާރުކޮށް މިސައިލް ޓެސްޓްތައް ކުރަމުންނެވެ. މީގެ އިތުރުން އެ ގައުމުން ވަނީ ދުރުރާސްތާގެ މިސައިލަކާ އެކު ފޮނުވާލެވިދާނެ ފަދަ ހައިޑްރޮޖެން ބޮމެއް ކާމިޔާބުކަމާ އެކު ޓެސްޓްކޮށްފައި ކަމަށް ބުނެފައެވެ.

މި މައްސަލައިގައި މަޝްވަރާގެ ތެރެއަށް ވަނުން ފެނިގެން ދަނީ ރައީސް ޑޮނަލްޑް ޓްރަމްޕް ޒާތީ ގޮތުން ގެންގުޅުއްވާ ވިސްނުންފުޅާ މުޅިން ތަފާތު އަމަލެއް ގޮތުގައެވެ.

އުތުރުކޮރެއާގެ ލީޑަރު ކިމް ޖޮން އުން އަށް ނިސްބަތްކުރައްވައި ރައީސް ޓްރަމްޕް އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ "އަޅުގަނޑު ދަންނަވައިފިން ރެކްސް ޓިލަރސަން، އަޅުގަނޑުމެންގެ ލޮބުވެތި ސެކްރެޓަރީ އޮފް ސްޓޭޓަށް، ކުޑަ ރޮކެޓް މޭންއާ އެއްކޮށް މަޝްވަރާ ކުރެއްވުމަށް ތިޔަ ކުރައްވާ މަސައްކަތަކީ މަނިކުފާނުގެ ވަގުތު ބޭކާރު ކުރެއްވުމޭ."

"އަޅުގަނޑުމެން ކުރަންޖެހޭ ކަމެއް ކުރާނަން" ކަމަށް ވިދާޅުވެފައިވާއިރު އެ ވިދާޅުވި އެއްޗެއް ޓްރަމްޕް ސާފުކޮށްދެއްވާފައެއް ނުވެއެވެ.