ހއ.ދިއްދޫ ދާއިރާގެ މެމްބަރު އަބްދުލް ލަތީފްގެ ނަމުގައި ބާއްވާ ހަތަރުވަނަ "އެއްލައްކަ ކަޕް" ގައި ބައިވެރިވުމުގެ ފުރުސަތު ހުޅުވާލައިފިއެވެ.

މެމްބަރު އަބްދުލް ލަތީފްގެ އޮފީހުން ނެރުނު އިއުލާނެއްގައި ބުނީ މުބާރާތުގައި ބައިވެރިވުމަށް އެދޭ ފޯމް ހއ.ދިއްދޫ ޒުވާނުންގެ މަރުކަޒުން ލިބެން ހުންނާނެ ކަމަށާއި، މުބާރާތުގައި ބައިވެރިވުމަށް 14 އޮކްޓޫބަރުގެ ރެ އާއި ހަމައަށް ފޯމް ހުށަހެޅޭނެ ކަމަށެވެ.

މީގެއިތުރުން ފޯމް ދޫކުރުން 14 އޮކްޓޫބަރުގެ ނިޔަލަށް ކޮންމެ ދުވަހެއްގެ މެންދުރުފަހު 16:00 އިން 17:00 އަށް އަދި ރޭގަނޑު 20:30 އިން 22:00 އަށް ހުޅުވާލެވިފައި އޮންނާނެ ކަމަށް ވެސް އިއުލާނުގައި ވަނީ ބުނެފައެވެ.

މުބާރާތުގައި ބައިވެރިވެވޭނީ މިނިސްޓްރީ އޮފް ހޯމްއެފެއާޒްގައި ރަޖިސްޓްރީކޮށްފައިވާ ހއ.ދިއްދޫގެ ކްލަބް ޖަމިއްޔާތަކަށް ކަމަށްވެސް އިއުލާންގައި ވަނީ ބުނެފައެވެ.

މި މުބާރާތަކީ ދިއްދޫ ދާއިރާގެ މެމްބަރުގެ ކުޅިވަރު ވައުދު ފުއްދުމުގެ ގޮތުން ކޮންމެ އަހަރަކުވެސް ފޯރިއާއިއެކު ކުރިއަށް ގެންދާ މުބާރާތެކެވެ. މި އަހަރުވެސް މުބާރާތުގެ އެއްވަނަ ޓީމަށް އެއްލައްކަ ރުފިޔާގެ ފައިސާގެ އިނާމް ވަނީ ހުށަހަޅާފައެވެ.

ރާއްޖެއެމްވީ އަށް މައުލޫމާތު ދެއްވަމުން ލަތީފް ވިދާޅުވީ، މި މުބާރަތަކީ ރައްޔިތުންގެ މެދުގައި ކުޅިވަރުގެ ރޫހު އާލާކުރުމަށް ބާއްވާ މުބާރާތެއް ކަމަށާއި، މި އަހަރުވެސް މި މުބާރާތް ފޯރިއާއިއެކު ބޭއްވުމަށް މަސައްކަތްކުރަމުން އަންނަ ކަމަށެވެ.

މުބާރާތް ކުރިޔަށްދާނީ އަންނަ ޑިސެމްބަރު މަހުގެ ތިންވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ.