ބީއެމްއެލްއިން ބޭންކިން ނިޒާމު ޒަމާނީކުރަން ފިނާސްޓްރާ އެސެންސް އިޚްތިޔާރުކޮށްފި

މާލީ ޚިދުމަތްތަކަށް ބޭނުންވާ ސޮފްޓްވެއާ އުފެއްދުމުގައި ދުނިޔޭގައި ފާހަގަކުރެވޭ ފިނާސްޓްރާގެ 'ފިނާސްޓްރާ އެސެންސް' (Finastra Essence) ސޮފްޓްވެއާ، ބޭންކް އޮފް މޯލްޑިވްސް (ބީއެމްއެލް) ގެ ކޯ ބޭންކިން ނިޒާމު ޒަމާނީކުރުމަށާއި އެ ބޭންކުގެ ޑިޖިޓަލް ޓްރާންސްފޯމޭޝަން  ބޭނުންކުރުމަށް ނިންމައިފި އެވެ.

މި އެއްބަސްވުމުގެ ސަބަބުން ބޭންކުން އަލަށް ތައާރަފުކުރާ ޚިދުމަތްތައް އަވަސްކުރުމަށާއި، ހިންގުމުގެ ދާއިރާ އިތުރަށް ހަރުދަނާކުރުމުގެ އިތުރުން، އާންމު ބޭންކިން އަދި އިސްލާމިކް ބޭންކިންގެ ޚިދުމަތްތައް އިތުބާރުހުރި ގޮތެއްގައި ކަސްޓަމަރުންނަށް ފޯރުކޮށްދިނުމަށް މަގުފަހިވެގެންދާނެ ކަމަށް ފިނާސްޓްރާ އިން ނެރެފައިވާ ބަޔާނެއްގައި ބުނެފައިވެ އެވެ.

ފިނާސްޓްރާ އެސެންސް ބޭނުންކުރަން ފެށުމުން، ބޭންކް އޮފް މޯލްޑިވްސްއަށް ޒަމާނީ، ހުޅުވާލެވިފައިވާ އަދި ފަސޭހައިން ބަދަލުތައް ގެނެވޭނެ ފަދަ ޕްލެޓްފޯމެއް ލިބިގެންދާނެ އެވެ.

މި ނިޒާމުގެ ސަބަބުން ތިރީގައިވާ ކަންކަމަށް އެހީތެރިވެދޭނެއެވެ:

• އަލަށް ތައާރަފުކުރާ އުފެއްދުންތަކާއި ޚިދުމަތްތައް މާކެޓަށް ނެރުމަށް ހޭދަވާ ވަގުތު ކުޑަވުން.
• އޮޓޮމޭޝަންގެ އެހީގައި މަސައްކަތްތައް އަވަސްވެ، މެދުކެނޑުމެއް ނެތް ޚިދުމަތްތަކާއި 'ސްޓްރެއިޓް-ތްރޫ ޕްރޮސެސިން' މެދުވެރިކޮށް ހިންގުމުގެ ދާއިރާ ހަރުދަނާވުން.
• ކަސްޓަމަރުންގެ ބަދަލުވަމުންދާ ބޭނުންތަކާ އެއްގޮތަށް، އައު އުފެއްދުންތަކާއެކު ރިލޭޝަންޝިޕް މެނޭޖަރުންނަށް ޚިދުމަތް ދިނުމަށް ފަސޭހަވުން.
• އާންމު ބޭންކިން އަދި އިސްލާމިކް ބޭންކިންގެ އުފެއްދުންތައް މެދުކެނޑުމެއް ނެތް ގޮތެއްގައި ފޯރުކޮށްދިނުމަށް މަގުފަހިވުން.

"ބޭންކް އޮފް މޯލްޑިވްސްގެ އިސްތިރާތީޖީ ބިނާވެފައިވަނީ މެދުކެނޑުމެއް ނެތް އައު އީޖާދުތަކަށާއި، އަޅުގަނޑުމެން ޚިދުމަތްދޭ ކަސްޓަމަރުންނާއި މުޖުތަމައުތަކަށް ދެމެހެއްޓެނިވި މަންފާ ހޯދައިދިނުމުގެ މައްޗަށް،" ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑައިރެކްޓަރު މުހައްމަދު ޝަރީފް ވިދާޅުވި އެވެ.

"ފިނާސްޓްރާ އެސެންސްއާއެކު އަޅުގަނޑުމެން މި ފެށި ބައިވެރިވުމަކީ ބޭންކުގެ ޑިޖިޓަލް ޓްރާންސްފޯމޭޝަންގެ ދަތުރުގައި އެޅުނު މުހިންމު ފިޔަވަޅެއް. މީގެ ސަބަބުން އައު އީޖާދުތައް އަވަސްކުރުމަށާއި، ހިންގުމުގެ ދާއިރާގެ ފުރިހަމަކަން ދެމެހެއްޓުމުގެ އިތުރުން، މުޅި ރާއްޖޭގެ ކަސްޓަމަރުންނަށް ދުނިޔޭގެ ފެންވަރުގެ މާލީ ޚިދުމަތްތައް ފޯރުކޮށްދިނުމަށް ބޭނުންވާ ވަރުގަދަ އަދި ޒަމާނީ ބިންގަލެއް ލިބިގެންދާނެ." ކަމަށް ވެސް ޝަރީފް ވިދާޅުވި އެވެ.

"ބޭންކް އޮފް މޯލްޑިވްސްއަކީ ރާއްޖޭގެ މާލީ ދާއިރާގެ އެންމެ މުހިންމު އެއް ތަނބު. އެ ބޭންކުގެ ޚިދުމަތްތައް ޒަމާނީކުރުމުގެ ދަތުރުގައި އެހީތެރިވެދެވޭތީ އަޅުގަނޑުމެން ނުހަނު އުފާކުރަން،" ފިނާސްޓްރާގެ ޔުނިވާސަލް ބޭންކިންގެ އީވީޕީ ސިއޯބަން ވިދާޅުވި އެވެ.

ބޭންކް އޮފް މޯލްޑިވްސްއިން ފިނާސްޓްރާ އެސެންސް އިޚްތިޔާރުކުރީ އެ ސޮފްޓްވެއާގެ ފުރިހަމަ މަސައްކަތްތަކާއި، ކުރިއަރާފައިވާ ޓެކްނޮލޮޖީއާއި، ހުޅުވާލެވިފައިވާ ޕްލެޓްފޯމުގެ ފަސޭހަކަމުގެ އިތުރުން، ފިނާސްޓްރާގެ މަސައްކަތްތަކަށް ބާޒާރުގައި އޮތް އިތުބާރާއި، މިކަން ވަޒަންކުރުމުގެ މަރުހަލާގައި އެ ކުންފުނިން ދެއްކި ހަރަކާތްތެރިކަމަށް ބެލުމަށްފަހުގައި ކަމަށް ރިޕޯޓުކޮށްފައިވެ އެވެ.

މީގެ އިތުރުން، ފިނާސްޓްރާއިން 28 ޖޫން 2026 ގައި އިއުލާނުކޮށްފައިވާ ގޮތުގައި، މޯލްޑިވްސް ޕްރިމިއާ ބޭންކް (އެމްޕީބީ) އިން ވަނީ އެ ބޭންކުގެ ބައިނަލްއަގުވާމީ ބޭންކިން މަސައްކަތްތައް ޒަމާނީ ޑިޖިޓަލް ނިޒާމަކަށް ބަދަލުކުރުމަށްޓަކައި ފިނާސްޓްރާގެ 'ފައިނޭންޝަލް މެސެޖިން އޭޕީއައި' (Financial Messaging API) ސޮލިއުޝަން ވަނީ އިޚުތިޔާރުކޮށްފަ އެވެ.