ހިރިމަރަދޫ ރައްޔިތުންނަށް ބޭނުންވާ ހައުސިންގ އަޅަން ހަނިމާދޫ ކައުންސިލުން އެއްބާރުލުމެއް ނުދޭ: މުއްތަލިބު

ހދ. ހަނިމާދޫގައި ހިރިމަރަދޫ ރައްޔިތުން އާބާދުކުރުމަށް ސަރުކާރުން ކުރަމުންދާ މަސައްކަތުގެ ދަށުން ހަނިމާދޫގައި ހިރިމަރަދޫ ރައްޔިތުންނަށް އިމާރާތް ކުރާ ހައުސިންގ ޔުނިޓްތަކުގެ މަސައްކަތަށް ހަނިމާދޫ ކައުންސިލުން އެއްބާރުލުން ނުދޭ ކަމަށް ހައުސިންގ މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ. 

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާއަށް މިނިސްޓަރު ހާޒިރު ކޮށްފައިވާއިރު ސުވާލު ކުރުމުގެ ވަގުތުގައި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވަނީ ހިރިމަރަދޫ ރައްޔިތުންނަށް ހަނިމާދޫގައި އަޅައިދޭނެ ކަމަށް މި ސަރުކާރުން ވައުދުވެފައިވާ ހައުސިންގ ޔުނިޓްތަކާ ގުޅޭ ގޮތުން ސުވާލު ކުރައްވާފަ އެވެ. 

އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އެކަމުގައި ހަނިމާދޫ ކައުންސިލްގެ ފަރާތުން އެއްބާރުލުން ސަރުކާރަށް ލިބެމުން ނުދާ ކަމަށެވެ. 

ކައުންސިލްގެ ފަރާތުން އަޅުގަނޑުމެންނަކަށް އެއްބާރުލުމެއް ނުލިބޭ، ނުލިބި ދަތިތަކާ ކުރިމަތިވަމުން ދޭ. އަޅުގަނޑުމެން މި ދަންނަވަނީ އަޅުގަނޑުމެން ހަނިމާދޫގެ ރައްޔިތުންނަށް ބޭނުންވާ ބޯހިޔާވަހިކަން އިމާރާތް ކޮށްދޭނަމޭ. އެ ރަށުގެ މަޝްރޫއު ހުއްޓިފަ އޮތީ އޭރުގަ ކޯޓަށް މައްސަލައެއް ލުމާއެކު އެޑްވާންސް ފައިސާ ނަގާފަ އެއްވެސް މަސައްކަތެއް ކުރިއަށް ނުގެންދާތީ. އެހެން ނަމަވެސް އަޅުގަނޑުމެން މި ދަންނަވަނީ ހިރިމަރަދޫ ރައްޔިތުންނަށް މި އަޅާ ބޯހިޔާވަހިކަމާ ހަނިމާދޫ ރައްޔިތުންނަށް މި އަޅާ ބޯހިޔާވަހިކަމާ ގުޅުވާނުލާށޭ. އަޅުގަނޑުމެން ދެ މަޝްރޫއު ވެސް ކުރިއަށް ގެންގޮސްދޭނަމޭ. އެހެންވީމާ ހިރިމަރަދޫ ރައްޔިތުން ބަދަލު ކުރުމަށްޓަކައި އަޅުގަނޑުމެންނަށް އަވަހަށް އެ މަސައްކަތް ފެށިގެން ދިއުމަކީ އެއީ ވަރަށް މުހިއްމުކަމެއް. އެ ރަށެއްގެ، ހަނިމާދޫ އިހުތިސާސްގެ ތެރެއަށް ލާފަ މިހާރު އެ މަސައްކަތް ކުރިއަށް ގެންދަން ޖެހޭ ވީހާ ވެސް ބާރުމިނުގައި. އެކަމުގައި ރަށު ރައްޔިތުންގެ އަދި ރަށު ކައުންސިލްގެ ވަރަށް ބޮޑު އެއްބާރުލުމެއް ބޭނުންވޭ. 

ހައުސިންގ މިނިސްޓަރު ޑރ. އަބްދުﷲ މުއްތަލިބް 

މިނިސްޓަރު އެހެން ވިދާޅުވި އިރު ހަނިމާދޫގައި ހިރިމަރަދޫ ރައްޔިތުން އާބާދުކުރުމަށް ސަރުކާރުން ގެންގުޅޭ ޕްލޭނަކީ ކޮބައިކަން ސާފުނުވާ ކަމަށާއި، އެ މަޝްރޫއު ކުރިއަށްދަނީ ދެފުށް ފެންނަ އުސޫލަކުން ނޫން ކަމަށް ބުނެ ހަނިމާދޫ ކައުންސިލުން ވަނީ ކަންބޮޑުވުން ފާޅު ކޮށްފަ އެވެ. 

ރާއްޖެޓީވީއަށް ދެއްވި އިންޓަވިއުއެއްގައި ހަނިމާދޫ ކައުންސިލްގެ ރައީސް އަލީ އިބްރާހިމް ވިދާޅުވީ، ހިރިމަރަދޫ ރައްޔިތުންނަށް ޚާއްސަކޮށްގެން އަޅާ ގެތަކުގެ މަސައްކަތް 18 މަސް ދުވަހުގެ ތެރޭގައި ނިންމައި ތަޅުދަނޑި ހަވާލުކުރާނެ ކަމަށް ރައީސުލްޖުމްހޫރިއްޔާ ވިދާޅުވެފައިވީ ނަމަވެސް، އެކަމުގެ އަމަލީ މަސައްކަތްތައް ފެންނަނީ ވަރަށް ބޮޑަށް އޮޅުންބޮޅުން ބޮޑުކޮށް ކަމަށެވެ.

އަލީ އިބްރާހިމް ވިދާޅުވީ ހަނިމާދޫގައި 500 ހައުސިންގ ޔުނިޓު އެޅުމަށާއި، އަލަށް ދޫކުރި 200 ގެވަޅު ހިމެނޭ ސަރަޙައްދަށް ފެނާއި ނަރުދަމާ ފޯރުކޮށްދޭނެ ކަމުގެ ޔަޤީންކަން ސަރުކާރުން ދީފައިވާ ކަމަށެވެ. ނަމަވެސް މިހާރު ފެންނަމުންދަނީ ކުރިން ފަށާފައި ހުރި މުހިއްމު މަޝްރޫއުތައް ވެސް ހުއްޓިފައި ހުރި މަންޒަރު ކަމަށާއި، ކައުންސިލްގެ އެންމެ ބޮޑު ޝަކުވާއަކީވެސް އެއީ ކަމަށް އޭނާ ފާހަގަކުރެއްވި އެވެ. ކައުންސިލުން އަބަދުވެސް ބާރުއަޅަމުންދަނީ އަލަށް މަޝްރޫއުތައް ފެށުމުގެ ކުރިން، ފަށާފައި ހުރި މަސައްކަތްތައް ނިންމުމަށް ކަމަށްވެސް އޭނާ ވިދާޅުވި އެވެ.

ހިރިމަރަދޫ ރައްޔިތުން އާބާދުކުރުމަށް ޚާއްސަކުރި ބިން އަނބުރާ ސަރުކާރަށް ނަގަނީ ކައުންސިލުން އެއްބާރުލުން ނުދޭތީ ކަމަށް ދެކެވޭ ވާހަކަތައް ދޮގުކުރައްވަމުން އަލީ އިބްރާހިމް ވިދާޅުވީ، ކައުންސިލުން އެއްބާރުލުން ނުދޭން ކުރި އެއްވެސް ކަމެއް ނޯންނާނެ ކަމަށެވެ.

ހިރިމަރަދޫ ރައްޔިތުންނާ ހަވާލާދީ އަލީ އިބްރާހިމް ވިދާޅުވީ، ރަށެއް ފަޅުކޮށްލާފައި އެހެން ރަށަކަށް ބަދަލުވާއިރު ސަރުކާރުން ގެންގުޅޭ ޕްލޭނެއް އެ ރައްޔިތުންނަށްވެސް ސާފުނުވާ ކަމަށެވެ. ވަކިން ޚާއްސަކޮށް، ސަރުކާރުން ބުނާ 184 ގެއަކީ ކޮން ތަނަކުން ލިބޭނެ ގެތަކެއް ކަމެއް ނުވަތަ އެތަންތަނުގެ ރަޖިސްޓްރީއެއް އޮތްކަމެއްވެސް އެ ރައްޔިތުންނަށް ނޭނގޭ ކަމަށް އޭނާ ވިދާޅުވި އެވެ. 

ހަނިމާދޫ ކައުންސިލުން އަބަދުވެސް މަސައްކަތް ކުރާނީ ހިރިމަރަދޫ ރައްޔިތުންގެ ހައްގުގައި ކަމަށާއި، އެ ރައްޔިތުންނަށް ލިބެންޖެހޭ ޚިދުމަތްތައް ފުރިހަމައަށް ލިބޭތޯ ކަށަވަރު ކުރާނެ ކަމަށްވެސް އަލީ އިބްރާހިމް ވިދާޅުވި އެވެ.