އެމެރިކާގެ ސެނެޓަރު މެކޮނަލްގެ ހާލު ދެރަވެ ހޮސްޕިޓަލްގައި ފަރުވާ ހޯއްދަވައިފި، ވިދާޅުވީ އަދިވެސް މަސައްކަތަށް ދެވޭ ވަރު ނުވާާ ކަމަށް
އުމުރުން 81 އަހަރުގެ މެކޮނަލް އަށް ލިބުނު އަނިޔާ ތަކުގެ ތަފްސީލަށް ބަލާއިރު، އޭނާ ވެއްޓި ވަޑައިގަތުމުގެ ސަބަބުން ބޮލަށް ގެއްލުންވެ، އަދި އަރިކަށީގެ ކަށިގަނޑެއްގައި ރެނދު ލާފައިވާ ކަމަށް މީގެ ކުރިން އޭނާގެ އޮފީހުން ވަނީ މައުލޫމާތު ދީފައި. މި ހާދިސާ ހިނގާފައި ވަނީ އެމެރިކާގެ ވެރި ރަށް ވޮޝިންޓަންގެ ހޮޓަލެއްގައި ބޭއްވި ހަފުލާއެއްގެ ތެރެއިން.
އެމެރިކާގެ ސެނެޓަރުގެ ރިޕަބްލިކަން ޕާޓީގެ ލީޑަރު މިޗް މެކޮނަލް. | ގެޓީ އިމޭޖަސް
އެމެރިކާގެ ސެނެޓަރުގެ ރިޕަބްލިކަން ޕާޓީގެ ލީޑަރު މިޗް މެކޮނަލްގެ ޞިއްޙީ ޙާލު ކޮޅު ދެރަވުމުގެ ސަބަބުން ހޮސްޕިޓަލްގައި ފަރުވާ ހޯއްދަވާފައިވާއިރު، އަދިވެސް ސެނެޓުގެ މަސައްކަތް ތަކަށް އެނބުރި ވަޑައި ނުގެންނެވޭނެ ކަމަށް އޭނާ ހާމަ ކުރައްވައިފި އެވެ.
މިކަން ހާމަ ކޮށްފައި ވަނީ މެކޮނަލް އާދީއްތަ ދުވަހު ނެރުނު ރަސްމީ ބަޔާނެއްގައި އެވެ.
މިދިޔަ ދުވަސް ތަކުގައި ސެނެޓުގެ ޖަލްސާ ތަކުން މެކޮނަލް ފެނިފައި ނުވަނީ، އޭނާ ވެއްޓި ވަޑައިގެން ލިބުނު އަނިޔާ ތަކަކަށް ހޮސްޕިޓަލުގައި އެޑްމިޓް ކޮށްގެން ފަރުވާ ހޯއްދަވަން ޖެހިވަޑައިގަތުމާ ގުޅިގެންނެވެ. އާދީއްތަ ދުވަހު ނެރުއްވި ބަޔާނުގައި މެކޮނަލް ވިދާޅުވީ، ހޮސްޕިޓަލުން ދޫކޮށްލި ނަމަވެސް، ފުރިހަމަ އަށް ރަނގަޅު ވަންދެން އަދިވެސް މަސައްކަތުން ދުރުގައި މަޑު ކުރައްވަން ނިންމަވާފައިވާ ކަމަށެވެ.
އުމުރުން 81 އަހަރުގެ މެކޮނަލް އަށް ލިބުނު އަނިޔާ ތަކުގެ ތަފްސީލަށް ބަލާއިރު، އޭނާ ވެއްޓި ވަޑައިގަތުމުގެ ސަބަބުން ބޮލަށް ގެއްލުންވެ، އަދި އަރިކަށީގެ ކަށިގަނޑެއްގައި ރެނދު ލާފައިވާ ކަމަށް މީގެ ކުރިން އޭނާގެ އޮފީހުން ވަނީ މައުލޫމާތު ދީފައި އެވެ. މި ހާދިސާ ހިނގާފައި ވަނީ އެމެރިކާގެ ވެރި ރަށް ވޮޝިންޓަންގެ ހޮޓަލެއްގައި ބޭއްވި ހަފުލާއެއްގެ ތެރެއިންނެވެ.
މެކޮނަލް ސެނެޓަށް ވަޑައި ނުގެންނެވި ނަމަވެސް، އޭނާ ގެންދަވަނީ ގޭގައި ހުންނަވައިގެން މުހިންމު ސިޔާސީ ކަންކަމުގައި ލަފާ ދެއްވަމުންނެވެ. އެހެން ނަމަވެސް، ސެނެޓުގެ ތަޅުމުގައި ކުރިއަށްދާ ބަހުސް ތަކާއި، ވޯޓުލުން ތަކުގައި އޭނާ ބައިވެރިވެ ވަޑައި ނުގަންނަވަ އެވެ. މިއީ އެމެރިކާގެ ސިޔާސީ މަސްރަހުގައި ނުފޫޒު ގަދަ ލީޑަރަކު މަސައްކަތާ ދުރުގައި ހުންނަވަން ޖެހިވަޑައިގަތް މުހިންމު ދަނޑިވަޅެއް ކަމަށް ބައެއް ފަރާތް ތަކުން ދެކެ އެވެ.
މެކޮނަލްގެ ބަޔާނުގައި އިތުރަށް ވިދާޅުވީ، އޭނާގެ ސިއްހީ ހާލަތު ރަނގަޅު ވަމުން އަންނަ ކަމަށާއި، ޑޮކްޓަރުންގެ އިރުޝާދާ އެކު ވީ އެންމެ އަވަހަކަށް ސެނެޓަށް އެނބުރި ވަޑައިގަތުމަކީ އުންމީދެއް ކަމަށެވެ. ނަމަވެސް، ސީދާ އެނބުރި ވަޑައި ގަންނަވާނެ ތާރީޚެއް އޭނާ ހާމަކުރައްވާފައި ނުވެ އެވެ.
މެކޮނަލް އަކީ އެމެރިކާގެ ތާރީޚުގައި ސެނެޓުގެ ޕާޓީ ލީޑަރުކަން އެންމެ ދިގު މުއްދަތަކަށް ކުރެއްވި ބޭފުޅާ އެވެ. އޭނާ ސެނެޓަށް އެނބުރި ވަޑައިގަތުން ލަސްވަމުން ދާތީ، ރިޕަބްލިކަން ޕާޓީގެ ބައެއް މެންބަރުން ވަނީ ކަންބޮޑުވުން ފާޅު ކޮށްފައި އެވެ. އެހެން ނަމަވެސް، ޕާޓީގެ އިސް ބޭފުޅުން ވިދާޅުވަނީ މެކޮނަލް އަދިވެސް ހުންނެވީ ލީޑަރުގެ މަގާމުގައި ކަމަށާއި، އޭނާގެ ބަދަލުގައި އެހެން ބޭފުޅަކު އައްޔަން ކުރުމުގެ ވިސްނުމެއް ނެތް ކަމަށެވެ.
މަސްދަރު: އަލް ޖަޒީރާ
