އުމުރުން 80 އަހަރުން މަތީގެ މީހުންނަށް ވެރިކަމެއް ނުކުރެވޭނެ: މިޓް ރޮމްނީ
މިހާރު އުމުރުން 79 އަހަރު ވެފައިވާ ރޮމްނީ ވިދާޅުވީ، އުމުރުން 80 އަހަރު ވުމުން އިންސާނާގެ ސިކުނޑި 20 އިންސަތައް ކުޑަވާ ކަމަށް ދިރާސާ ތަކުން ދައްކާ ކަމަށް. އެކަމަށް ބާރު ދެއްވުމުގެ ގޮތުން އޭނާ ވަނީ މަޝްހޫރު ނޫސްވެރިޔާ ބިލް ބްރައިސަން ލިޔެފައިވާ "ދަ ބޮޑީ" ނަމަކަށް ކިޔާ ފޮތުގައިވާ ހޯދުން ތަކަށް ހަވާލާ ދެއްވާފައި.
އެމެރިކާގެ ޔޫޓާގެ ކުރީގެ ސެނެޓަރު މިޓް ރޮމްނީ. | ގެޓީ އިމޭޖަސް
އުމުރުން 80 އަހަރުން މަތީގެ މީހުން ޤައުމު ހިންގުމުގައި އިސް ސަފުގައި ތިބެގެން ނުވާނެ ކަމަށާއި، އެ މީހުންނަށް ވެރިކަން ނުކުރެވޭނެ ކަމަށް އެމެރިކާގެ ޔޫޓާގެ ކުރީގެ ސެނެޓަރު މިޓް ރޮމްނީ ވިދާޅުވެއްޖެ އެވެ.
ދާދި ފަހުން "ޑެޒަރެޓް ނިއުސް" އަށް ދެއްވި އިންޓަވިޔުއެއްގައި ރޮމްނީ ވަނީ، އުމުރުން ދުވަސް ވުމުގެ ސަބަބުން ސިކުނޑީގެ މަސައްކަތް ތަކަށް އަންނަ ބަދަލުތަކުގެ ވާހަަކަ ދައްކަވައިފަ އެވެ. އަދި 2028 ވަނަ އަހަރު އެމެރިކާގައި އޮންނަ ރިޔާސީ އިންތިޚާބުގައި ވާާދަ ނުކުރައްވާނެ ކަމަށް ވެސް އޭނާ ވަނީ އިއުލާން ކުރައްވައިފަ އެވެ.
މިހާރު އުމުރުން 79 އަހަރު ވެފައިވާ ރޮމްނީ ވިދާޅުވީ، އުމުރުން 80 އަހަރު ވުމުން އިންސާނާގެ ސިކުނޑި 20 އިންސަތައް ކުޑަވާ ކަމަށް ދިރާސާ ތަކުން ދައްކާ ކަމަށެވެ. އެކަމަށް ބާރު ދެއްވުމުގެ ގޮތުން އޭނާ ވަނީ މަޝްހޫރު ނޫސްވެރިޔާ ބިލް ބްރައިސަން ލިޔެފައިވާ "ދަ ބޮޑީ" ނަމަކަށް ކިޔާ ފޮތުގައިވާ ހޯދުން ތަކަށް ހަވާލާ ދެއްވައިފަ އެވެ.
އެހެންކަމުން ދުނިޔެ، ނުވަތަ ޤައުމު ހިންގުމުގެ ޒިންމާ އެ އުމުރުގެ ބޭފުޅުން އުފުލެއްވުމަކީ އެންމެ ރަނގަޅު ގޮތް ނޫން ކަމަށް ޤަބޫލު ކުރައްވާ ކަމަށް ވެސް ރޮމްނީ ވިދާޅުވެފައިވެ އެވެ.
އެ އިންޓަވިޔުގައި އަލުން ރިޔާސީ އިންތިޚާބުގައި ވާދަ ކުރައްވަފާނެތޯ ރޮމްނީއާ ސުވާލު ކުރުމުން އޭނާ ވަނީ މަޖާޒީ ޖަވާބެއް ދެއްވައިފަ އެވެ. ރޮމްނީ ވިދާޅުވީ އަލުން އިންތިޚާބުގައި ވާދަ ކުރައްވަން ބޭނުންވާ ކަމަށެވެ. ރޮމްނީ ވިދާޅުވީ ރިޔާސީ އިންތިޚާބުގައި ތިން ވަނަ ފަހަރަށް ވާދަ ކުރައްވައިފި ނަމަ، ކާމިޔާބު ވުމުގެ ފުރުސަތު އޮވެދާނެ ކަމަށެވެ. ނަމަވެސް، 2028 ވަނަ އަހަރުގެ ރިޔާސީ ރޭހުން ނުފެންނާނެ ކަމަށް އޭނާ ވިދާޅުވެފައިވެ އެވެ.
ރޮމްނީގެ މި ވާހަކަ ތަކަކީ އެމެރިކާގެ ސިޔާސީ މަސްރަހުގައި ޒުވާާން ލީޑާޝިޕަކަށް އޮތް ޝައުގު ބޮޑުވަމުންދާ ދަނޑިވަޅެއްގައި ދެއްކެވި ވާހަކަ ތަކެކެވެ. އެންމެ ފަހުން 2024 ވަނަ އަހަރު އޮތް ރިޔާސީ އިންތިޚާބުގައި އޭރުގެ ރައީސް ޖޯ ބައިޑަންގެ އުމުރާ މެދު ބޮޑެތި ސުވާލު ތަކެއް އުފެދުނެވެ. ވަކިން ޚާއްސަކޮށް އެ އަހަރު އޮތް ރިޔާސީ ބަހުސްގައި ޑޮނަލްޑް ޓްރަމްޕް އާއެކު ބޭއްވި ބަހުސްގައި ބައިޑަންގެ ފަރާތުން ފެނުނު ދަށް ޕާފޮމަންސްގެ ސަބަބުން، ބައިޑަން އަށް ވެސް އެތައް ބައެއްގެ ނުރުހުން އަމާޒުވި އެވެ.
މިހާރު އެމެރިކާގެ ރައީސް ކަމުގައި ހުންނެވި ޓްރަމްޕް އަށް އުމުރުން 80 އަހަރުވެފައިވާއިރު، ޓްރަމްޕް އަކީ އެމެރިކާގެ ތާރީޚުގައި ވެރިކަމުގައި ހުންނެވި އެންމެ ދުވަސްވީ ރައީސް އެވެ. ޓްރަމްޕްގެ ޞިއްޙީ ޙާލަތާ މެދު ވެސް ގިނަ ސުވާލު ތަކެއް އުފެދިފައިވާއިރު، އެކި ފަހަރު މަތިން ޓްރަމްޕް ވަނީ ޞިއްޙީ ޓެސްޓު ތަކެއް ހައްދަވާ އޭނާ ގެންދަވަނީ ފުރިހަމަ ސިއްހަތެއްގައި ހުންނެވި ކަމަށް ވިދާޅުވަމުންނެވެ.
މީގެ ކުރިން ރޮމްނީ ވަނީ 2012 ވަނަ އަހަރު އެމެރިކާގެ ރިޔާސީ އިންތިޚާބުގައި ވާދަ ކުރައްވައިފަ އެވެ. ނަމަވެސް، އޭރު ރައީސް އަކަށް ހުންނެވި ބަރަކް އޮބާމާއާ ވާދަ ކުރައްވައި ރޮމްނީ އަށް ވަނީ ނާކާމިޔާބުވެފައި އެވެ. އެ ފަހަރުގެ އިންތިޚާބުގައި ރޮމްނީ ވަނީ 47 އިންސައްތަ ވޯޓު ހޯއްދަވައިފަ އެވެ.
