އެމެރިކާގެ ނުފޫޒު ގަދަ ސެނެޓަރު ލިންޑްސީ ގްރަހަމް ކުއްލި ގޮތަކަށް އަވަހާރަވެއްޖެ
12 ޖުލައި 2026 | އާދީއްތަ 06:34އެމެރިކާގެ ސެނެޓް މެންބަރު ލިންޑްސީ ގްރަހަމް ކުއްލި ގޮތަކަށް އަވަހާރަވީ ކުރު އާލާސްކަންފުޅަކަށް ފަހު ހޮނިހިރު ދުވަހުގެ ހަވީރުގެ ވަގުތެއްގައި. މިކަން ކަށަވަރުކޮށްދީ އޭނާގެ އޮފީހުން އާދިއްތަ ދުވަހު ނެރުނު ބަޔާނުގައި ބުނެފައިވަނީ އޭނާ އަވަހާރަވީ ބަލިހާލަތު ކުއްލިއަކަށް ގޯސްވުމާ ގުޅިގެން ކަމަށް.
ޔޫއެސް ސެނެޓަރު ލިންޑްސީ ގްރަހަމް | ރޮއިޓާސް
އެމެރިކާގެ ސެނެޓްގެ ނުފޫޒުގަދަ މެންބަރެއް ކަމަށްވާ ލިންޑްސީ ގްރަހަމް އަވަހާރަވެއްޖެ އެވެ.
ލިންޑްސީ ގްރަހަމް އަވަހާރަވީ ކުއްލި ގޮތަކަށް ކުރިމަތިވި ކުރު އާލާސްކަންފުޅަކަށް ފަހު، ހޮނިހިރު ދުވަހުގެ ހަވީރުގެ ވަގުތެއްގަ އެވެ. މިކަން ހާމަކޮށްފައިވަނީ އޭނާގެ އޮފީހުގެ ކޮމިއުނިކޭޝަންސް ޑައިރެކްޓަރު އާދިއްތަ ދުވަހުގެ ހެނދުނުގެ ވަގުތެއްގައި އެކްސްގައި ކުރެއްވި ޕޯސްޓެއްގަ އެވެ.
2002 ވަނަ އަހަރު އެމެރިކާގެ ސެނެޓަށް އިންތިޚާބުވެވަޑައިގަތް ސައުތު ކެރޮލައިނާގެ މި ސިޔާސީ ބޭފުޅަކީ، ދިފާއީ އަދި ޚާރިޖީ ސިޔާސަތުތަކުގައި ވޮޝިންގޓަންގައި އެންމެ ނުފޫޒުގަދަ އެއް ބޭފުޅާގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕްގެ އެންމެ އަރިސް އެއް ބައިވެރިޔާއެވެ.
މީގެ އިތުރުން ގްރަހަމް ވަނީ ސެނެޓްގެ ބަޖެޓް ކޮމިޓީގެ މުގައްރިރުކަން ވެސް ކުރައްވާފަ އެވެ.
އޭނާ އަވަހާރަވިއިރު، ދާދި ފަހުން ވަނީ ޔޫކްރެއިންގެ ކީވްއަށް ވަޑައިގެން، މިދިޔަ ހުކުރު ދުވަހު އެ ގައުމުގެ ރައީސް ވޮލޮޑިމީރް ޒެލެންސްކީއާ ބައްދަލުކުރައްވާފަ އެވެ.
ގްރަހަމް އަކީ ޔޫކްރެއިނަށް އެމެރިކާއިން އެހީތެރިކަން ފޯރުކޮށްދިނުމަށް ވަރަށް ބޮޑަށް ވަކާލާތު ކުރެއްވި ބޭފުޅެކެވެ. އެގޮތުން 2023 ވަނަ އަހަރު ބީބީސީއަށް ދެއްވި އިންޓަވިއުއެއްގައި އޭނާ ވިދާޅުވީ، ޕޫޓިން ހަމައެކަނި ޔޫކްރެއިނުން ނުހުއްޓޭނެ ކަމަށެވެ.
އަދި ޔޫކްރެއިންގެ މައްސަލައިގައި ބަލިކަށިވެއްޖެނަމަ، އޭގެ މާނައަކީ ޓައިވާންގެ މައްސަލައިގައި ވެސް ނާކާމިޔާބީއާ ކުރިމަތިލާންޖެހުން ކަމަށް އޭނާ ވިދާޅުވި އެވެ.
