އެމެރިކާގެ މިނިވަން ދުވަސް ފާހަގަ ކުރަނިކޮށް ނިއުޔޯކްގައި ބަޑިޖަހައި 8 މީހަކު ޒަޚަމްކޮށްލައިފި
5 ޖުލައި 2026 | އާދީއްތަ 13:41މި ހާދިސާގައި އަނިޔާވި މީހުންގެ ތެރޭގައި ހަތަރު ކުޑަކުދިން ހިމެނޭއިރު، ޒަޚަމްވި 21 އަހަރުގެ އަންހެނެއްގެ ހާލު ސީރިއަސް ކަމަށް ފުލުހުން މައުލޫމާތުދޭ. ހަމަލާދިން ސަރަހައްދުން ބަޑިއެއް ފެނިފައިވީ ނަމަވެސް، މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވޭ.
ނިއުޔޯކް ސިޓީގެ ކޯނީ އައިލެންޑް ސަރަހައްދުގައި ބަޑިޖަހައި ހަތަރު ކުޑަކުދިން ހިމެނޭހެން މަދުވެގެން އަށް މީހަކު ވަނީ ޒަޚަމްކޮށްލާފައި | ރޮއިޓާސް
އެމެރިކާގެ މިނިވަން ދުވަހުގެ މުނާސަބަތާ ގުޅިގެން ހަރަކާތްތައް ހިނގަމުން ދަނިކޮށް، ނިއުޔޯކް ސިޓީގެ ކޯނީ އައިލެންޑް ސަރަހައްދުގައި ބަޑިޖަހައި އަށް މީހަކު ޒަޚަމްކޮށްލައިފި ކަމަށް ނިއުޔޯކް ސިޓީ ޕޮލިސް ޑިޕާޓްމަންޓް (އެންވައިޕީޑީ) އާ ހަވާލާދީ އޭބީސީ ނިއުސްއިން އާދިއްތަ ދުވަހު ރިޕޯޓްކޮށްފި އެވެ. ޒަޚަމްވި މީހުންގެ ތެރޭގައި ހަތަރު ކުޑަކުދިން ވެސް ހިމެނެ އެވެ.
އެންވައިޕީޑީން އޭބީސީ ނިއުސްއަށް ދީފައިވާ ބަޔާނެއްގައި ބުނެފައިވަނީ، ބްރޫކްލިންގައި ބަޑީގެ ހަމަލާތަކެއް ދެމުންދާ ކަމުގެ ރިޕޯޓް ލިބުމާ ގުޅިގެން، ހޮނިހިރު ދުވަހުގެ ރޭ ގަޑިން ގާތްގަނޑަކަށް 10:37 ހާއިރު ފުލުހުން އެ ސަރަހައްދަށް ގޮސްފައިވާ ކަމަށެވެ.
ޚަބަރު ފަތުރާ ވަސީލަތްތަކުން ރިޕޯޓްކޮށްފައިވާ ގޮތުގައި، މި ހާދިސާގައި ޒަޚަމްވެފައިވަނީ ދެ ފިރިހެނުންނާއި، ދެ އަންހެނުންގެ އިތުރުން 14 އަހަރާއި، 12 އަހަރާއި، 7 އަހަރާއި 6 އަހަރުގެ ހަތަރު ކުޑަކުދިންނެވެ.
އެންވައިޕީޑީއާ ހަވާލާދީ އޭބީސީ ނިއުސްއިން ބުނެފައިވަނީ، އަނިޔާވި ހުރިހާ އެންމެން ވެސް މިހާރު ވަނީ ހޮސްޕިޓަލަށް ގެންގޮސް ފަރުވާދޭން ފަށާފަ އެވެ. މީގެ ތެރެއިން ހަތް މީހެއްގެ ހާލު ރަނގަޅުވަމުން އަންނަ އިރު، 21 އަހަރުގެ އަންހެނެއްގެ ހާލު ސީރިއަސް ކަމަށް ފުލުހުން މައުލޫމާތުދެ އެވެ.
ފުލުހުންނާ ހަވާލާދީ އޭބީސީން ރިޕޯޓްކޮށްފައިވާ ގޮތުގައި، ހަމަލާދިން ސަރަހައްދުން ބަޑިއެއް ފެނިފައިވީ ނަމަވެސް، މިހާތަނަށް މި މައްސަލައާ ގުޅިގެން އެއްވެސް މީހަކު ހައްޔަރުކޮށްފައެއް ނުވެ އެވެ.
މިދިޔަ ހޮނިހިރު ދުވަހަކީ އެމެރިކާގެ މިނިވަންކަމަށް 250 އަހަރު ފުރުނު ތާރީޚީ ދުވަހެވެ.
މަސްދަރު: ރޮއިޓާސް
