މި ސީޒަނުގައި ގިނަ ލަނޑުތަކެއް ޖެހުމަށް ލިބޭ އެންމެ ބޮޑު ހިތްވަރަކީ ޗެލްސީގެ ކޯޗުގެ އިތުބާރު އޮތުން ކަމަށް އެ ޓީމުގެ ފޯވާޑް އަލްވާރޯ މޮރާޓާ ބުނެފިއެވެ.
މި ޓްރާންސްފާ މާކެޓުގައި ރެއާލް މެޑްރިޑްއިން 55 މިލިއަން ޕައުންޑަށް ޗެލްސީއަށް ބަދަލުވުމަށް ފަހު މޮރާޓާ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. ބުދަ ދުވަހުގެ ރޭ އެޓްލެޓިކޯ މެޑްރިޑް އަތުން ޗެލްސީ މޮޅުވި މެޗަށް ފަހު ވާހަކަ ދައްކަމުން މޮރާޓާ ބުނެފައިވަނީ ޗެލްސީއަށް ބަދަލުވީ އެ ޓީމަކީ އޭނާއަށް އިތުބާރު ކުރި ހަމައެކަނި ޓީމު ކަމަށްވެފައި އެ ޓީމުގެ ކޯޗު ކޮންޓޭގެ ފުރިހަމަ އިތުބާރު އޭނާއަށް އޮތްކަން އެގުމުން ކަމަށެވެ.
ހަމައެހެންމެ ސީޒަނުގެ މިހާތަނަށް ކުޅުނު ގިނަ މެޗުގައި ލަނޑު ޖެހިފައި ވަނީ ކޯޗުގެ އިރުޝާދުގެ ދަށުން ކުޅުމުން ކަމަށާއި އޭނާގެ ކުޅުމަކީ ކޮންޓޭ ޗެލްސީގައި ފެންނަން ބޭނުންވާ ވައްތަރުގެ ކުޅުމެއް ކަމަށެވެ. އަދި ޗެލްސީއަށް ކުޅުނު ފުރަތަމަ މެޗުގައި ގޯސް ހެދުނު ކަމަށާއި އެހެނަސް އޭގެ ފަހުންވެސް ކޯޗުގެ އިތުބާރު އޭނާއަށް ނުގެއްލޭ ކަމަށާއި އަދި ހެދުނު ގޯސްތައް ރަނގަޅު ކުރުމަށް ކޯޗު ހިތްވަރު ދިންކަމަށް މޮރާޓާ ބުނެފައިވެއެވެ.
މޮރާޓާ މި ނޫސްވެރިންގެ ބައްދަލުވުމުގަ އިތުރަށް ބުނެފައިވަނީ ކުޅުންތެރިޔެއްގެ ގޮތުގައި ކުރިއެރުމަށް ކޮންޓޭގެ ފަރާތުން ވަރަށް ރަނގަޅު އިރުޝާދު ލިބޭ ކަމަށާއި އޭނާގެ އުއްމީދަކީ މިގޮތުގައި މި ސީޒަންގެ ބާކީ ހުރި މެޗުތަކުގައިވެސް ގޯލު ޖެހުން ކަމަށެވެ. އިނގިރޭސި ޕްރިމިއާ ލީގަކީ ދުނިޔޭގެ އެންމެ އުނދަގޫ ލީގު ކަމަށާއި އެހެނަސް ކޮންޓޭގެ ސަބަބުން މި ލީގުގައި ކުޅެން ވަރަށް ފަސޭހަ ކަމަށް މޮރާޓާ ބުނެފައިވެއެވެ.
މޮރާޓާވަނީ ޗެލްސީއަށް ކުޅެމުން އަންނަ އެޑެން ހަޒާޑަށް ވަރަށް ބޮޑަށް ތައުރީފް ކޮށްފައެވެ. އެގޮތުން އޭނާ ބުނެފައިވަނީ ހަޒާޑްއާއެކު ކުޅެން ވަރަށް ފަސޭހަ ކަމަށާއި ހަޒާޑްއަކީ ދުނިޔޭގެ އެންމެ މޮޅެތި ކުޅުންތެރިންގެ ތެރޭގައި މިހާރު ގުނާލެވޭނެ ކުޅުންތެރިޔެއް ކަމަށެވެ.
މޮރާޓާގެ ފަރާތުން މޮޅު ކުޅުމެއް މިހާތަނަށް ފެނިފައިވާއިރު އޭނާވަނީ މިހާތަނަށް ޗެލްސީއަށް ކުޅުނު ހަތް މެޗުގައި ހަތް ލަނޑު ޖަހާފައެވެ.
