1976 ގެ "އެޕަލް-1" ކޮމްޕިއުޓަރެއް 500،000 ޑޮލަރަށް ނީލަން ކިޔަނީ

އެޕަލް ކުންފުނިން އެންމެ ފުރަތަމަ އުފެއްދި ކޮމްޕިއުޓަރު ކަމަށްވާ، 1976 ވަނަ އަހަރުގެ އެޕަލް-1 ކޮމްޕިއުޓަރެއް ނިއު ޔޯކްގައި އަންނަ ޖުލައި މަހުގެ 15 ވަނަ ދުވަހު ނީލަން ކިޔުމަށް ވަނީ ހަމަޖެހިފަ އެވެ. މި ނީލަމުގައި މި ކޮމްޕިއުޓަރު 300،000 އާއި 500،000 އެމެރިކާ ޑޮލަރާ ދެމެދުގެ އަގަކަށް ވިކޭނެ ކަމަށް ލަފާކުރެވެ އެވެ. މިއީ އެޕަލް އިން އެންމެ ފުރަތަމަ އުފެއްދި 200 ކޮމްޕިއުޓަރުގެ ތެރެއިން، މިހާރުވެސް ބޭނުންކުރެވޭ ހާލަތުގައި ހުރި 20 ޔުނިޓުގެ ތެރޭގައި ހިމެނޭ ޔުނިޓެކެވެ.

އެޕަލް ކުންފުނި އުފެއްދުމުގައި ބައިވެރިވި ސްޓީވް ވޮޒްނިއަކްއާއެކު ސްޓީވް ޖޮބްސް ނަގާފައިވާ ކުރީގެ ފޮޓޯއެއް | ގެޓީ އިމޭޖަސް

އެޕަލް ކުންފުނީގެ އެންމެ ފުރަތަމަ އުފެއްދުން ކަމަށްވާ އެޕަލް-1 ބާޒާރަށް ނެރުނީ 1976 ވަނަ އަހަރުގެ ޖުލައި މަހުގަ އެވެ. މިއީ އެ ކުންފުނި އުފެއްދި އެކަކު ކަމަށްވާ ސްޓީވް ވޮޒްނިއަކް އަމިއްލަ އަތުން ތައްޔާރުކުރި މޮޑެލްއެކެވެ.

އެޕަލް ކުންފުނީގެ ކޯ-ފައުންޑަރ ސްޓީވް ވޮޒްނިއަކް (ކަނާތް) އަދި އެ ކުންފުނީގެ ކުރީގެ މުވައްޒަފެއް ކަމަށްވާ ވެންޑެލް ސޭންޑަރ (ވައަތް)، 2013 ވަނަ އަހަރުގެ ޖޫން މަހުގެ 18 ވަނަ ދުވަހު ހިސްޓްރީ ސެން ހޯޒޭގައި "އެޕަލް 1" ކޮމްޕިއުޓަރާ ބެހޭގޮތުން ވާހަކަދައްކަނީ | ގެޓީ އިމޭޖަސް

ޖުލައި 15 ވަނަ ދުވަހު ބާއްވާ މި ނީލަމަކީ އެ ނީލަން ފިހާރައިގެ "ގީކް ވީކް" ސޭލްސްގެ ބައެކެވެ. މި ނީލަމުގައި، މިހާރުވެސް ބޭނުންކުރެވޭ ހާލަތުގައި ހުރި މި ކޮމްޕިއުޓަރު 300،000 އާއި 500،000 އެމެރިކާ ޑޮލަރާ ދެމެދުގެ އަގަކަށް ވިކޭނެ ކަމަށް ބެލެވެ އެވެ.

ވޭތުވެދިޔަ ފަންސަވީސް އަހަރުގެ ތެރޭގައި ދުނިޔެއަށް ވަނީ ބޮޑެތި ބަދަލުތަކެއް އައިސްފައެވެ. ޒަމާން ބަދަލުވަމުންދާ ވަރަކަށް ޑިޖިޓަލް އާލާތްތަކުގެ ބޭނުންތެރިކަން ކުޑަވި ނަމަވެސް، އެ ތަކެތީގެ އަގު ދަނީ އުފުލެމުންނެވެ. އެންމެ ފުރަތަމަ 666.66 އެމެރިކާ ޑޮލަރަށް ވިއްކި އެޕަލް-1 ކޮމްޕިއުޓަރެއް މިހާރު 500،000 ޑޮލަރަށް ވިކިއްޖެ ނަމަ، އެއީ ވޭތުވެދިޔަ ފަސް ދަހަރުގެ ތެރޭގައި އޭގެ އަސްލު އަގަށް ވުރެ ގާތްގަނޑަކަށް 749 ގުނަ އިތުރު އަދަދެކެވެ.