އެޕަލް ކުންފުނީގެ އާ އައިފޯނުތައް ކަމަށްވާ އައިފޯން 14 އިންޑިއާގައި އުފައްދަން ފަށައިފިއެވެ.

މިއީ ޗައިނާއިން ބޭރުގައި އައިފޯނުގެ އާ ފޯނެެއްް އުފައްދަން ފެށި ފުރަތަމަ ފަހަރެވެ. މި ބަދަލު އެޕަލް ކުންފުނިން ގެނެސްފައިވަނީ ކޮވިޑާ ގުޅިގެން ޗައިނާއިން އަޅާފައިވާ ފިޔަވަޅުތަކާއި އެމެރިކާ އާއި ޗައިނާއާ ދެމެދު އުފެދިފައިވާ ހަމަނުޖެހުންތަކާ ގުޅިގެންނެވެ.

ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި އިންޑިއާގައި އައިފޯން އުފައްދަން ފަށާފައިވަނީ ޗެންނާއީގައެވެ. މި ފޯނުތައް ނެރޭނީ އިންޑިއާ ބާޒާރަށެވެ. މި ފޯނުތަކަކީ މި މަހު ދުނިޔޭގެ ބާޒާރަށް އެޕަލް އިން ނެެރުނު ފޯނުތަކެވެ.

އެޕަލްގެ އާ ފޯނުތަކަކީ އެހެން ފޯނުތަކާ އަޅާބަލާއިރު ކެމެރާގެ ކޮލިޓީ ރަނގަޅުވެފައި ގިނަ ވަގުތަށް ބެޓަރީ ހިފަހައްޓާ އަދި އަވަސް ފޯނެކެވެ. މި ފޯނުތައް ވެސް ނެރެފައިވަނީ މިދިޔަ އަހަރު ނެރުނު އައިފޯން 13ގެ ސީރީޒްގެ އަގުތަކުގައެވެ.

އިންޑިއާއަކީ ފޯނު އުފެއްދުމުގައި ދުނިޔޭގެ ދެވަނައަށް އެންމެ ބޮޑު މާކެޓެވެ. އެއްވަނައިގައި އޮތީ ޗައިނާއެވެ. ޗައިނާ އާއި އެޕަލް ކުންފުނިން ގުޅިގެން އެ ޤައުމުގައި އައިފޯނު އުފައްދަން ފެށީ 2017 ވަނަ އަހަރުއެވެ.

މީގެ ކުރިން ވެސް އައިފޯނުތައް އެހެން ޤައުމުތަކުގައި ވަނީ އުފައްދާފައެވެ. އެގޮތުން، ބްރެޒިލްގައި ވަނީ އެ ކުންފުނީގެ ފޯނުތަކެއް އުފައްދާފައެވެ. ނަމަވެސް އެއީ ކުރީގެ ފޯނުތަކެކެވެ. ކޮންމެ އަހަރަކު ނެރޭ އާ އައިފޯނުތައް މިހާތަނަށް އުފައްދަމުން އައީ ހަމައެކަނި ޗައިނާގައެވެ.

ޖޭޕީ މޯރގަންގެ އެނަލިސްޓުން ލަފާ ކުރާ ގޮތުގައި އެޕަލް އިން މަސައްކަތް ކުރަނީ 2025 އާ ހަމައަށް ޗައިނާގައި އުފައްދާ އައިފޯނުގެ 4 ބައި ކުޅަ އެއްބައި އިންޑިއާގައި އުފެއްދުމަށެވެ. އަދި އެ ކުންފުނީގެ އެހެން އުފެއްދުންތައް ވެސް ޗައިނާއިން ބޭރުގައި އުފެއްދުމަށް އެ ކުންފުނިން މަސައްކަތް ކުރަމުން އަންނަ ކަމަށް އެނަލިސްޓުން ވަނީ ބުނެފައެވެ.

އެޕަލް އިން ޗައިނާގައި ޕްރޮޑަކްޓުތައް އުފެއްދުން މަދުކުރަން ނިންމާފައިވަނީ އެމެރިކާ ސަރުކާރާއި ޗައިނާ ސަރުކާރާ ދެމެދު އޮތް ގުޅުން ހީނަރުވެފައިވާތީއެވެ.