ޣައްޒާ ގަތުލުއާންމު ފެށިފަހުން ފަލަސްތީނުގެ 800 އަށްވުރެ ގިނަ މުދައްރިސުން ޝަހީދުކޮށްލައިފި
5 އޮކްޓޯބަރު 2026 | ހޯމަ 04:57ދުނިޔޭގެ މުދައްރިސުންގެ ދުވަހާ ގުޅިގެން ފަލަސްތީނުގެ ތައުލީމާބެހޭ ވުޒާރާއިން ނެރުނު ބަޔާނުގައި، އިސްރާއީލުގެ އިސްތިއުމާރީ ބާރުތަކުން ތައުލީމީ ދާއިރާއަށް ދެމުންދާ ހަމަލާތަކާއި މުދައްރިސުން ހައްޔަރުކުރުން ހުއްޓުވުމަށް ބައިނަލްއަގްވާމީ މުޖުތަމައަށް ވަނީ ގޮވާލާފައި. މީގެ އިތުރުން، ފަލަސްތީނުގެ ޓެކްސް ފައިސާ އިސްރާއީލުން ހިފެހެއްޓުމުގެ ސަބަބުން މުދައްރިސުންގެ މުސާރަ ނުލިބި، މާލީ އަދި ނަފްސާނީ ބޮޑެތި ގޮންޖެހުންތަކަކާ ކުރިމަތިލާންޖެހިފައިވާކަން އެ ވުޒާރާއިން ފާހަގަކޮށްފައިވޭ
ފަލަސްތީނުގެ މުދައްރިސެއް މަދަރުސާއެއްގައި ކުލާހެއް ނަގައިދެނީ | އަނަދޮލު އޭޖެންސީ
2023 އޮކްޓޫބަރުގައި އިސްރާއީލުން ޣައްޒާގައި ގަތުލުއާންމެއް ފެށި ފަހުން ފަލަސްތީނުގެ 800 އަށްވުރެ ގިނަ މުދައްރިސުން ޝަހީދުކޮށްލައި، 3,300 އަށްވުރެ ގިނަ މުދައްރިސުން ޒަޚަމްކޮށްލާފައިވާ ކަމަށް ފަލަސްތީނުގެ ތައުލީމާބެހޭ ވުޒާރާއިން ހާމަކޮށްފި އެވެ.
ކޮންމެ އަހަރެއްގެ އޮކްޓޫބަރު 5 ވަނަ ދުވަހު ފާހަގަކުރާ ދުނިޔޭގެ މުދައްރިސުންގެ ދުވަހާ ގުޅިގެން ނެރުނު ބަޔާނެއްގައި އެ ވުޒާރާއިން ބުނީ، އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ސަރަހައްދުތަކުގައި ތައުލީމު ދޭ ފަރާތްތަކުން ތައުލީމު އުނގެނުމުގެ ހައްގު ހިމާޔަތްކުރުމަށް ޓަކައި ކުރަމުންދަނީ "ދިރިހުރުމަށް ޓަކައި ކުރާ ހަގީގީ ހަނގުރާމައެއް" ކަމަށެވެ.
ޣައްޒާގައި އިސްރާއީލުން ފަށާފައިވާ ގަތުލުއާންމަށްފަހު، ޣައްޒާއާއި ހުޅަނގު އައްސޭރީގެ ތައުލީމީ ދާއިރާއަށް "ޝާމިލް ގަތުލުއާންމެއް" ކުރިމަތިވެފައިވާ ކަމަށް އެ ވުޒާރާއިން ބުނެފައިވެ އެވެ. މީގެ އިތުރުން، 170 އަށްވުރެ ގިނަ މުދައްރިސުން "އިންތިހާއަށް ދަތި ހާލަތްތަކުގައި" އަދިވެސް ހައްޔަރުކޮށްފައި ތިބި ކަމަށް އެ ވުޒާރާއިން ބުނެފައިވެ އެވެ.
އެތައް ސަތޭކަ ޗެކްޕޮއިންޓްތަކެއްގައި ދަތުރުފަތުރުކުރުމަށް އަޅާފައިވާ ހުރަސްތަކާއި ކުރިމަތިކުރުވާ ފުރައްސާރަތަކުގެ ސަބަބުން މުދައްރިސުންގެ ދުވަހީ ތަކުލީފުތައް އިތުރުވެފައިވާ ކަމަށާއި، ޚާއްސަކޮށް އަލް-ޚަލީލްގެ ދެކުނުން އޮންނަ މަސާފިރް ޔައްތާއާއި، މެދުތެރޭ ހުޅަނގު އައްސޭރީގެ އަލް-މުޣައްޔިރް އަވަށާއި، އުރުދުން ވާދީގެ އިތުރުން އޭރިއާ ސީ ގެ ގޮތުގައި ކަނޑައަޅާފައިވާ ސަރަހައްދުތަކުގައި މިކަން ބޮޑު ކަމަށް އެ ވުޒާރާއިން ބުނެފައިވެ އެވެ.
1995 ވަނަ އަހަރުގެ އޮސްލޯގެ ދެވަނަ އެއްބަސްވުމުގެ ދަށުން، ވަގުތީ އިންތިޒާމެއްގެ ގޮތުގައި ހުޅަނގު އައްސޭރި ވަނީ އޭރިއާ އޭ، ބީ، އަދި ސީ އަށް ބަހާލާފައި އެވެ. އޭރިއާ އޭ އޮންނަނީ ފަލަސްތީނުގެ މަދަނީ އަދި ސަލާމަތީ ބާރުގެ ދަށުގައި އެވެ. އޭރިއާ ބީ އޮންނަނީ ފަލަސްތީނުގެ މަދަނީ އިދާރާގެ ދަށުގައި ނަމަވެސް ސަލާމަތީ ކަންކަން ބަލަހައްޓަނީ އިސްރާއީލުންނެވެ. ހުޅަނގު އައްސޭރީގެ ގާތްގަނޑަކަށް %60 ހިއްސާކުރާ އޭރިއާ ސީ، އޮތީ އިސްރާއީލުގެ ފުރިހަމަ ކޮންޓްރޯލްގެ ދަށުގަ އެވެ.
މީގެ އިތުރުން، އިސްރާއީލުން ފަލަސްތީނުގެ ޓެކްސް އާމްދަނީ ހިފަހައްޓަމުން ދިއުމާއެކު، ފަލަސްތީނުގެ މުދައްރިސުންނަށް ކުރިމަތިވަމުންދާ އަނިޔާތަކާ ގުޅިގެން މާލީ ބޮޑެތި ދަތިތަކާ ކުރިމަތިލާންޖެހި، އެ މީހުންގެ މާއްދީ އަދި ނަފްސާނީ ހަމަޖެހުމަށް ބުރޫއަރާފައިވާ ކަމަށް ވުޒާރާއިން ބުނެފައިވެ އެވެ. 'ކްލިއަރެންސް ރެވެނިއު' ގެ ގޮތުގައި މަޝްހޫރުވެފައިވާ މި ފައިސާއަކީ، 1994 ވަނަ އަހަރުގެ ޕެރިސް ޕްރޮޓޮކޯލްގެ ދަށުން ފަލަސްތީނު އިދާރީ ސަރުކާރުގެ ނަމުގައި އިމްޕޯޓުކުރާ މުދަލުން އިސްރާއީލުން ނަގާ ޓެކްސް ފައިސާ އެވެ.
2019 ވަނަ އަހަރުން ފެށިގެން އިސްރާއީލުން ވަނީ މި އާމްދަނީން ބައެއް އުނިކުރަން ފަށާފައި އެވެ. އަދި، ފަހުން މި ފައިސާ ފަލަސްތީނާ ހަވާލުކުރުން ހުއްޓާލުމުގެ ސަބަބުން ފަލަސްތީނު ސަރުކާރުގެ މާލީ ކާރިސާ އިތުރަށް ގޯސްވެ، ސަރުކާރު މުވައްޒަފުންގެ މުސާރަ ފުރިހަމައަށް ދިނުމަށް ވަނީ ގޮންޖެހުންތަކެއް ކުރިމަތިވެފަ އެވެ. ފަލަސްތީނުގެ އާންމު އާމްދަނީގެ ގާތްގަނޑަކަށް %56 ހިއްސާކުރަނީ ކްލިއަރެންސް ރެވެނިއު ކަމަށްވާއިރު، މި ފައިސާ ހިފެހެއްޓުމަކީ މުސާރަ ދިނުމަށާއި، އާންމު ޚިދުމަތްތައް ފޯރުކޮށްދިނުމަށާއި، ސަރުކާރުގެ ޒިންމާތައް އަދާކުރުމަށް އޮތް ވަރަށް ބޮޑު ހުރަހެކެވެ.
މީގެ އިތުރުން، މި އަމަލުތައް ހުއްޓުވުމަށާއި، ދަރިވަރުންނާއި ތައުލީމީ ދާއިރާގެ މުވައްޒަފުންނަށް ބައިނަލްއަގްވާމީ ރައްކާތެރިކަން ފޯރުކޮށްދިނުމަށް އަވަސް ފިޔަވަޅުތަކެއް އެޅުމަށް ބައިނަލްއަގްވާމީ މުޖުތަމައާއި، އދ. އާއި، ތައުލީމީ އަދި އިންސާނީ ހައްގުތަކާބެހޭ ޖަމުއިއްޔާތަކަށް ފަލަސްތީނުގެ ތައުލީމާބެހޭ ވުޒާރާއިން ވަނީ ގޮވާލާފަ އެވެ.
ހަމަމިއާއެކު، ހައްޔަރުކޮށްފައިވާ މުދައްރިސުން މިނިވަންކުރުމަށާއި، ހިފަހައްޓާފައިވާ މާލީ ހައްގުތައް ދޫކޮށްލުމަށް ބާރުއެޅުމަށް ދުނިޔޭގެ އެކި ކަންކޮޅުތަކުގައިވާ ޔޫނިއަންތަކަށް ވެސް ވުޒާރާއިން ވަނީ ގޮވާލާފަ އެވެ. މިއީ، މުދައްރިސުންނަށް އަބުރުވެރިކަމާއެކު ދިރިއުޅެވޭނެ މަގު ތަނަވަސްކޮށްދިނުމަށް ކޮންމެހެން މުހިންމު ކަމެއް ކަމަށް ވެސް އެ ވުޒާރާއިން ފާހަގަކުރި އެވެ.
މަސްދަރު: އަނަދޮލު އޭޖެންސީ
