"ނޭދެން ވަކިވާކަށް" އޮލިމްޕަހުގައި ދައްކަން ފަށައިފި

މުހައްމަދު އަބޫބަކުރު )މާއެނބޫ( ޑައިރެކްޓް ކޮށްފައިވާ "ނޭދެން ވަކިވާކަށް" ރޭ އޮލިމްޕަހުގައި އަޅުވައިފިއެވެ.

އޭނާ ބުނީ "ނޭދެން ވަކިވާކަށް" ގެ ޓިކެޓް ވިއްކާނީ އޮލިމްޕަހުން ކަމަށެވެ. ހުރިހާ ޝޯއެއްގެ ޓިކެޓް ވެސް ވިއްކާނީ 100ރ. އަށް ކަމަށް މާއެނބޫ ބުންޏެވެ.

މި ފިލްމުގެ ސްކްރީންޕްލޭ ލިޔެފައިވަނީ މަހުދީ އަހުމަދެވެ. މިފިލްމަކީ ލޯބީގެ އަސަރުގަދަ ވާހަކައެއްގެ މައްޗަށް ބިނާކޮށް ހަދާފައިވާ ފިލްމެކެވެ. މާއެނބޫ ބުނީ ފިލްމު ޕްރިމިއާ ކުރުމަށް ޝްވެކް ސިނަމާ ހޯދުމުގެ މަސައްކަތް ކުރަމުންދާ ކަމަށެވެ.

"ނޭދެން ވަކިވާކަށް" ގައި އެކްޓް ކޮށްފައިވާ ތަރިންގެ ތެރޭގައި އަލަށް ފެނިގެންދާ ފެޝަން ޑިޒައިނަރު/ނެށުންތެރިޔާ ޖާދުﷲ އިސްމާއީލް (ޖާދު) އާއި ފާތުމަތު އާޒިފާ (އަޒޫ) ގެ އިތުރުން ޔޫސުފް ޝަފީއު (ޔޫއްޕެ) އެވެ. މި ފިލްމުގެ މަންޒަރުތައް ނަގާފައިވަނީ އއ.ތޮއްޑޫއާއި މާލޭގައެވެ.

"ނޭދެން ވަކިވާކަށް" އަކީ މިއަހަރު ނެރޭނެ ދިވެހި ފިލްމުގެ ތެރެއިން 7 ވަނަ ފިލްމެވެ.

މާއެނބޫ ބުނީ އޮލިމްޕަހުގައި މި ފިލްމުގެ 10 ޝޯ މެދުނުކެނޑި ދައްކާނެ ކަމަށާއި މާލެ އާއި ހުޅުމާލޭ ޝްވެކް ސިނަމާގައި މެދުނުކެނޑި 3 ޝޯ ދައްކާނެ ކަމަށެވެ. އަދި މެދުކެނޑުމަށްފަހުގައިވެސް ތަރުހީބު ލިބޭ ވަރަކުން ޝޯ ތައް ދައްކާނެކަމަށާއި ރާއްޖޭގެ އެކި ރަށްރަށުގައިވެސް މި ފިލްމު ތަރުހީބު ލިބޭވަރަކުން އަޅުވާނެކަމަށް މާއެނބޫ ބުންޏެވެ.