ވިމްބަލްޑަން ޓެނިސް މުބާރާތުގައިދޭ އިނާމު ފައިސާ ކުޑަވެގެން ދުނިޔޭގެ އެންމެ މަތީ ފަންތީގެ ބައެއް ކުޅުންތެރިން އިހުތިޖާޖު ކުރުމަށް ނިންމައިފި

މިއަހަރުގެ ވިމްބަލްޑަން ޓެނިސް މުބާރާތުގައި ދޭ އިނާމު ފައިސާއާ މެދު ހިތްހަމަނުޖެހުން ފާޅުކުރުމުގެ ގޮތުން، ދުނިޔޭގެ އެންމެ މަތީ ފަންތީގެ ބައެއް ކުޅުންތެރިން އިހުތިޖާޖު ކުރުމަށް ނިންމައިފިއެވެ.

މި އިހުތިޖާޖުގައި ބައިވެރިވާ ފިރިހެން އަދި އަންހެން ކުޅުންތެރިން ވަނީ، މުބާރާތުގެ ތެރޭގައި މީޑިއާއަށް ދޭންޖެހޭ ވަގުތު 15 މިނެޓަށް މަދުކުރުމަށް ނިންމާފައެވެ. މިއީ ވިމްބަލްޑަންއަށް ލިބޭ އާމްދަނީގެ ތެރެއިން ކުޅުންތެރިންނަށް އިނާމު ފައިސާގެ ގޮތުގައި ދެނީ 15 އިންސައްތައަށްވުރެ ކުޑަ މިންވަރެއްކަން ރަމްޒުކޮށްދިނުމުގެ ގޮތުން ނިންމި ނިންމުމެކެވެ. މި އިހުތިޖާޖު މުބާރާތުގެ ފުރަތަމަ ހަފުތާގެ ނިޔަލަށް ކުރިއަށްދާނެއެވެ.

މިކަމާ ގުޅިގެން ވިމްބަލްޑަން އިންތިޒާމުކުރާ ފަރާތްތަކުން ބުނެފައިވަނީ، ކުޅުންތެރިންގެ މި ނިންމުމުގެ ސަބަބުން "ހައިރާންކަމާއި މާޔޫސްކަން" ލިބިފައިވާ ކަމަށެވެ.

ދެ ޓުއާގެ ކުޅުންތެރިންނާ އެކު ކުރެވުނު ފުޅާ މަޝްވަރާތަކަށްފަހު، ކުޅުންތެރިންގެ މަންދޫބުން ވަނީ މި އިހުތިޖާޖު ކުރިއަށްގެންދާނެކަން ލިޔުމުން ވިމްބަލްޑަންގެ އިސްވެރިންނަށް އަންގާފައެވެ. އެ ސިޓީގައި، މިދިޔަ އަހަރާ އަޅާބަލާއިރު މިއަހަރު އިނާމު ފައިސާ 20 އިންސައްތަ އިތުރުކޮށްފައިވާތީ އެކަން ފާހަގަކޮށްފައިވެއެވެ.

ޕެރިހުގައި މިހާރު ކުރިއަށްދާ ފްރެންޗް އޯޕަން މުބާރާތުގެ ތެރެއިން، ދުނިޔޭގެ އަންހެން ނަންބަރު އެކެއް އެރީނާ ސަބަލެންކާ ވަނީ ގްރޭންޑް ސްލޭމް މުބާރާތްތަކުގައި ދޭ އިނާމު ފައިސާއާ މެދު ހިތްހަމަނުޖެހުން ފާޅުކުރުމުގެ ގޮތުން އޭނާގެ ނޫސްވެރިންގެ ބައްދަލުވުން ކުރުކޮށްލާފައެވެ.

ސަބަލެންކާގެ އިތުރުން، ފިރިހެން ނަންބަރު އެކެއް ޔަނިކް ސިނާ އަދި ކޯކޯ ގޯފް ވެސް ވަނީ ގްރޭންޑް ސްލޭމް މުބާރާތްތަކުން ލިބޭ އާމްދަނީން ކުޅުންތެރިންނަށް ކަނޑައަޅާފައިވާ އިންސައްތަ ކުޑަވުމުން އެކަމާ މެދު ހިތްހަމަނުޖެހުން ފާޅުކޮށްފައެވެ. ބައެއް ކުޅުންތެރިން މީޑިއާގެ ކަންކަމަށް ހޭދަކުރާ ވަގުތު 15 މިނެޓަށް މަދުކުރީ، އާމްދަނީގެ ތެރެއިން އެމީހުންނަށް ލިބޭ 14.4 އިންސައްތަ ރަމްޒުކޮށްދިނުމަށެވެ.

ވޭތުވެދިޔަ 10 އަހަރު ދުވަހުގެ ތެރޭގައި މުބާރާތުގެ އާމްދަނީ 280 މިލިއަން ޕައުންޑަށް އިތުރުވެފައިވީ ނަމަވެސް، ކުޅުންތެރިންނަށް ލިބޭ އިންސައްތަ ވަނީ މީގެ 10 އަހަރު ކުރިން ހުރި 14.9 އިންސައްތައަށްވުރެ ވެސް ދަށަށް ގޮސްފައެވެ.

މިއަހަރުގެ މުބާރާތުގެ ޖުމްލަ އިނާމު ފައިސާއަކީ 64.2 މިލިއަން ޕައުންޑެވެ. މި ފައިސާ ބަހާލެވޭނީ މުބާރާތުގައި ބައިވެރިވާ 128 ފިރިހެން ކުޅުންތެރިންނާއި 128 އަންހެން ކުޅުންތެރިންގެ މެދުގައެވެ.

މުބާރާތުގެ ފުރަތަމަ ބުރުން ބަލިވާ ކުޅުންތެރިއަކަށް 80،000 ޕައުންޑް ލިބޭއިރު، މުބާރާތުގެ ޗެމްޕިއަންކަން ހޯދާ ކުޅުންތެރިއަކަށް 3.6 މިލިއަން ޕައުންޑް ލިބޭނެއެވެ. މިއީ މިދިޔަ އަހަރު ޗެމްޕިއަނުންނަށް ދިން 3 މިލިއަން ޕައުންޑަށްވުރެ 600،000 ޕައުންޑް އިތުރު އަދަދެކެވެ.

"މިއީ ހަމައެކަނި އަހަރެންގެ ވާހަކައެއް ނޫން. މިއީ ރޭންކިންގެ ފަހަތުގައި ތިބި، ދަތިތަކާ ކުރިމަތިލާންޖެހިފައިވާ ކުޅުންތެރިންގެ ހައްގުގައި ކުރާ ކަމެއް،" ސަބަލެންކާ ބުންޏެވެ.

އޭނާ އިތުރަށް ބުނީ، ދުނިޔޭގެ ނަންބަރު އެކެއްގެ ހައިސިއްޔަތުން އެހެން ކުޅުންތެރިންގެ ހައްގުގައި ތެދުވެ ވަކާލާތު ކުރަންޖެހޭނެ ކަމަށް ގަބޫލުކުރާ ކަމަށެވެ.

އޯލް އިންގްލެންޑް ކްލަބުގެ ތަރުޖަމާނަކު ޕްރެސް އެސޯސިއޭޝަނަށް މައުލޫމާތު ދެމުން ބުނީ، ކުޅުންތެރިންގެ މި އަމަލުގެ ސަބަބުން ހައިރާންކަމާއި މާޔޫސްކަން ލިބިފައިވާ ކަމަށެވެ.

"ވިމްބަލްޑަންގެ ހުރިހާ ނިންމުމެއްގައި ވެސް އެންމެ ބޮޑު އިސްކަމެއް ދެނީ ކުޅުންތެރިންނަށް. އަދި ކޮންމެ އަހަރަކު ވެސް ކުޅުންތެރިންނަށްޓަކައި ބޮޑެތި ހޭދަތަކެއް ކުރަން. މިއަހަރުގެ ޖުމްލަ އިނާމު ފައިސާ ވަނީ 20 އިންސައްތަ އިތުރުކޮށް 64.2 މިލިއަން ޕައުންޑަށް މަތިކޮށްފައި. މިއީ މި މުބާރާތުގެ ތާރީޚުގައި ވެސް އިނާމު ފައިސާ އެންމެ ބޮޑަށް އިތުރުކުރި ފަހަރު،" ތަރުޖަމާނު ބުންޏެވެ.

މީގެ އިތުރުން، ކުޅުންތެރިންނަށް ދޭ ޚިދުމަތްތައް ދުނިޔޭގެ ފެންވަރަށް ތަރައްގީކުރުމަށް ފަށާފައިވާ ތިން އަހަރުގެ މަޝްރޫއުގެ ދަށުން، ވަސީލަތްތައް އިތުރުކުރުމަށް އެތައް މިލިއަން ޕައުންޑެއް ހޭދަކުރަމުންދާކަން ވެސް އެ ކްލަބުން ފާހަގަކުރިއެވެ.