އަނަންތަރާ މޯލްޑިވްސް ރިސޯޓުން ތްރީ-ޑީ ޕްރިންޓެޑް ފަރެއް ހައްދަނީ
ސްވިޒަލޭންޑްގެ "rrreefs" ކުންފުންޏާއި އަނަންތަރާ ދިގު ރިސޯޓު ގުޅިގެން ކުރިއަށްގެންދާ މި މަޝްރޫއަކީ 3D ޕްރިންޓްކޮށްފައިވާ ޓެރަކޮޓާ މަށި ބޭނުންކޮށްގެން މުރަކަ އާލާކުރުމަށް ފެށި އާދަޔާޚިލާފު މަސައްކަތެއް. "ތޭރަ މާ" ގެ ނަމުން ނަންދީފައިވާ މި އާޓިފިޝަލް ފަރުތައް ފަރުމާކޮށްފައިވަނީ މުރަކައިގެ ލާވާ ހަރުލުމަށާއި ކަނޑުގެ ދިރުންތަކަށް ރައްކާތެރި މާހައުލެއް ފޯރުކޮށްދިނުމަށް މަގުފަހިވާނެ ގޮތަށް. ފަތުރުވެރިކަމުގެ ސިނާއަތާއި ތިމާވެށީގެ މާހިރުން ގުޅިގެން ހިންގާ މި މަޝްރޫއަކީ، ޒަމާނީ ޓެކްނޮލޮޖީގެ އެހީގައި ރާއްޖޭގެ ފަރުތައް ދިރުވައި އަންނަން އޮތް ޖީލުތަކަށް ރައްކާތެރިކޮށްދިނުމަށް އެޅުނު މުހިންމު ފިޔަވަޅެއް.
މަސްނޫއީ ފަރު އާލާކުރުމުގެ މަސައްކަތް ފެށުމުގެ ގޮތުން، މަށިން ހަދާފައިވާ އެތައް ސަތޭކަ ރީފް މޮޑިއުލްތަކެއް ފަޅުތެރޭގައި އަތުރަން ތައްޔާރުވަނީ. | މައިނަރ ހޮޓެލްސް
ދެކުނު މާލެ އަތޮޅުގައި ހިންގަމުން އަންނަ އަނަންތަރާ މޯލްޑިވްސް ރިސޯޓުން، އެ ރިސޯޓުގެ ފަޅުތެރޭގައި، ތްރީ-ޑީ (3D) ޕްރިންޓެޑް 13 އާޓިފިޝަލް ރީފް ސްޓްރަކްޗަރ ބަހައްޓައިފިއެވެ. ސްވިޒަލޭންޑްގެ ފަރުތައް އާލާކުރާ ކުންފުންޏެއް ކަމަށްވާ، "ރީފްސް" "rrreefs" އާ ގުޅިގެން ކުރިއަށްގެންދާ މި މަޝްރޫއަކީ، މަރުވަމުންދާ ފަރުތައް އަލުން ދިރުވުމަށް ކުރެވޭ މަސައްކަތެއް ކަމަށް އެފަރާތުން ބުނެއެވެ.
"ތޭރަ މާ" ގެ ނަމުން ނަންދީފައިވާ މި އާޓިފިޝަލް ފަރުތައް ބިނާކޮށްފައިވަނީ ތްރީޑީ (3D) ޕްރިންޓްކޮށްފައިވާ ޓެރަކޮޓާ މަށި ބޭނުންކޮށްގެންނެވެ. މި ތަކެތި ފަރުމާކޮށްފައިވަނީ މައިކްރޯސްކޯޕިކް ފެންވަރުގައި ދިރާސާކުރުމަށްފަހު، މުރަކައިގެ ލާވާ އެތަނުގައި ހަރުލުމަށާއި، ދިރުންތައް އިތުރުވުމަށާއި، އަދި ފައިދާހުރި ބަޔޯފިލްމްތައް އުފެދުމަށް މަގުފަހިވާނެ ގޮތަށް ކަމަށް ވެސް ބުނެފައިވެއެވެ.
މި އާޓިފިޝަލް ފަރުތައް ވަރުގަދަކުރުމަށްޓަކައި ދަގަނޑާއި ކޮންކްރީޓްގެ މިންވަރެއް ބޭނުންކޮށްފައިވީ ނަމަވެސް، އޭގެ ބަޔޮލޮޖިކަލް މަސައްކަތްތައް ބިނާވެފައިވަނީ މަށިން ހަދާފައިވާ ބައިތަކުގެ ބައްޓަމާއި އޭގައި ހުންނަ ކުދި ލޯވަޅުތަކުގެ މައްޗަށެވެ.
"މި ފަރުމާގެ ކޮންމެ ބަޔަކީވެސް މުރަކަ ހެދުމަށް އެހީތެރިވެދޭނެ ގޮތަށް ވަރަށް ބޮޑަށް ވިސްނައިގެން ތައްޔާރުކޮށްފައިވާ ބައިތަކެއް. ސްޓްރަކްޗަރތައް ފަރުމާކޮށްފައިވާ ގޮތުން، އޭގެ ވަށައިގެން އޮއިވަރު ދައުރުވާ ގޮތް މަޑުޖައްސާލައި، މުރަކައިގެ ލާވާ އެތަނުގައި ހަރުލުމަށް ފަސޭހަވެގެންދޭ. އަދި ތްރީޑީ ޕްރިންޓްކޮށްފައިވާ މަށީގެ ފަށަލަތަކުގެ ދެމެދުގައި ހުންނަ ކުދި ހުސްތަންތަނުގެ ސަބަބުން، މަސްމަހާމެހީގެ ކިބައިން ކުދި މުރަކަތައް ރައްކާތެރިވެ ތިބެ، ޅަ މުރަކަތަކަށް ހެދިބޮޑުވުމުގެ ފުރުސަތު ލިބިގެންދޭ،" ރީފްސް ކުންފުނީގެ ހެޑް އޮފް ޕްރޮޑަކްޝަން މައުރޯ ބިޝޮފް ވިދާޅުވިއެވެ.
މި މަޝްރޫއު ކުރިއަށްގެންގޮސްފައިވަނީ އެކި ދާއިރާތަކުގެ މާހިރުން ހިމެނޭ ޓީމަކުންނެވެ. އޭގެ ތެރޭގައި ރީފްސް ގެ ކޯ-ފައުންޑަރ ޖޯސެފިން ގްރާފް އާއި، މެރިން އިކޮލޮޖިސްޓް ޑރ. ޖޫލިއާ ސްޕޭޓްގެ އިތުރުން މިއުނިކްގެ ލުޑްވިގް މެކްސިމިލިއަން ޔުނިވަރސިޓީގެ ރިސާޗް ފެލޯ ޑރ. ގެރިޓް ނަނިންގާ ހިމެނެއެވެ.
"ތޭރަ މާ" މަޝްރޫއަކީ ހަމައެކަނި ސައިންޓިފިކް މަސައްކަތެއް ނޫނެވެ. މިއީ ރީފްސް ކުންފުނިން ވިޔަފާރި އުސޫލުން ހިންގާ ރިސޯޓަކާ ގުޅިގެން މިފަދަ މަސައްކަތެއް ކުރި ފުރަތަމަ ފަހަރެވެ. މި މަޝްރޫއަށް ފަންޑުކޮށްފައިވަނީ ލުފްތަންސާ ގްރޫޕްގައި ހިމެނޭ އެޑެލްވައިސް އެއާ އަދި "ހެލްޕް އެލަޔަންސް" ގެ އެހީތެރިކަމާއެކުގައި ކަމަށް ވެސް ހާމަކޮށްފައިވެއެވެ.
އަނަންތަރާ ދިގު ރިސޯޓުގެ ރެސިޑެންޓް މެރިން ބަޔޮލޮޖިސްޓް އޮރިއާނާ މިގްލިއާޗިއޯ ވިދާޅުވި ގޮތުގައި، މިފަދަ ގުޅުންތަކަކީ މި ސިނާއަތުގައި އަދިވެސް މަދު ކަންކަމެވެ. "މިފަދަ ފުރުސަތުތަކަކީ އަދިވެސް ވަރަށް މަދުން ނޫނީ ނުލިބޭ ފުރުސަތުތަކެއް. މުރަކައިގެ ފަރުތައް އާލާކުރުމަށާއި، އަންނަން އޮތް ޖީލުތަކަށްޓަކައި އަޅުގަނޑުމެންގެ އައްސޭރިފަށުގެ ދިރުންތައް ވަރުގަދަކުރުމަށް "ރީފްސް" އާއި އެހެނިހެން ބައިވެރިންނާއެކު މަސައްކަތް ކުރަން ލިބުމަކީ އަޅުގަނޑުމެން ފަޚުރުވެރިވާ ކަމެއް،" އޭނާ ވިދާޅުވިއެވެ.
މި މަޝްރޫއުގައި ބޭނުންކޮށްފައިވާ "އެޑިޓިވް މެނުފެކްޗަރިންގ" ނުވަތަ ތްރީޑީ ޕްރިންޓިންގ އަކީ ކަނޑުގެ ދިރުންތައް ރައްކާތެރިކުރުމަށް މިހާރު ދުނިޔޭގައި އިތުރުވަމުން އަންނަ ޓެކްނޮލޮޖީ އެކެވެ. މީގެ ސަބަބުން، އާންމުކޮށް ތަކެތި އުފައްދާ ގޮތްތަކުން ނުހެދޭ ފަދަ، ގުދުރަތީ ބައްޓަންތަކާ އެއްގޮތް ފަރުމާތައް އުފެއްދުމުގެ ފުރުސަތު ލިބިގެންދެއެވެ.
ދުނިޔޭގެ އެހެން ސަރަހައްދުތަކުގައިވެސް މިފަދަ މަސައްކަތްތައް އަންނަނީ ފުޅާވަމުންނެވެ. އެގޮތުން އަބޫދާބީގެ އެންވަޔަރަންމަންޓް އެޖެންސީން ވަނީ "Archireef" ކުންފުންޏާއެކު ގުދުރަތީ ތަކެތި ބޭނުންކޮށްގެން ތްރީޑީ ޕްރިންޓްކުރި ފަރުތައް ބޭނުންކުރުމަށް އެއްބަސްވުމެއްގައި ސޮއިކޮށްފައެވެ. އަދި އުރުދުންގައިވެސް، އަގަބާ ޑިވެލޮޕްމަންޓް ކޯޕަރޭޝަނާއި އެހެނިހެން ކުންފުނިތައް ގުޅިގެން، ކޮންކްރީޓުން ތްރީޑީ ޕްރިންޓްކޮށްފައިވާ ފަރުތައް ވަނީ ބަހައްޓާފައެވެ. މި މަޝްރޫއު ވަނީ 2025 ވަނަ އަހަރު ފްރާންސްގެ ނީސްގައި ބާއްވާ އދ. ގެ ކަނޑުތަކާބެހޭ ކޮންފަރެންސްގައިވެސް ދައްކާލާފައެވެ.
"ތޭރަ މާ" މަޝްރޫއު ތަފާތުވަނީ އޭގައި ބޭނުންކުރާ ޓެކްނޮލޮޖީގެ ސަބަބުން އެކަންޏެއް ނޫނެވެ. މިއީ ހަމައެކަނި ދިރާސާ ފެންވަރުގައި ކުރެވޭ މަސައްކަތެއްގެ ބަދަލުގައި، ރިސޯޓެއްގެ ތެރޭގައި ވިޔަފާރި އުސޫލުން ހިންގާ މަޝްރޫއަކަށް ވުމުން، ފަތުރުވެރިންނަށް މިކަން ތަޖުރިބާކޮށްލުމުގެ ފުރުސަތު ލިބި، ފަންޑު ހޯދުމަށާއި ހޭލުންތެރިކަން އިތުރުކުރުމަށް އާ މަގުތަކެއް ހުޅުވިގެންދޭ.
