އަމާން ދޯދި ޓަވަރެއްގެ ދެ ވަނަ ފަންގިފިލާ އިން 16 އަހަރުގެ ކުއްޖަކު ވެއްޓިއްޖެ

ހުޅުމާލޭ ފޭސް ދޭއްގައި ހުންނަ އަމާން ދޯދި ފަސް ވަނަ ޓަވަރުން ކުޑަ ކުއްޖަކު ވެއްޓިއްޖެ އެވެ.

ދިވެހި ފުލުހުންގެ ޚިދުމަތުގެ ފަރާތުން މީޑިއާ ތަކަށް ފޮނުވާފައިވާ މެސެޖެއްގައި ބުނެފައި ވަނީ، އަމާން ދޯދި ފަސް ވަނަ ޓަވަރުން ކުއްޖަކު ވެއްޓިފައިވާ ކަމުގެ މައުލޫމާތު ހޯމަ ދުވަހުގެ ރޭ 23:14 ހާއިރު ލިބިފައިވާ ކަމަށެވެ. ފުލުހުން ބުނެފައި ވަނީ ވެއްޓުނީ 16 އަހަރުގެ ފިރިހެން ކުއްޖެއް ކަމަށާއި، އެ ކުއްޖާ ވެއްޓުނީ ދެ ވަނަ ފަންގިފިލާ އިން ކަމަށެވެ.

މީގެ އިތުރުން ފުލުހުން ބުނެފައި ވަނީ އެ ކުއްޖާ ހުޅުމާލޭ ހޮސްޕިޓަލް އަށް ގެންގޮސް ފަރުވާ ދެމުން އަންނަ ކަމަށެވެ. އަދި މި މައްސަލަ ފުލުހުން އިތުރަށް ތަހުގީގު ކުރަމުން އަންނަ ކަމަށް ވެސް ބުނެފައިވެ އެވެ.

މީގެ ކުރިން ވެސް މާލެ އާއި ހުޅުމާލާގެ އެކި ސަރަހައްދު ތަކުގައި މިފަދަ ހާދިސާތައް ހިނގާފައިވެ އެވެ.