މި ސަރުކާރަށް ފޯނުގެ އަތްގަނޑު ވެސް ހިއްލާ ނުލެވޭ..

ހާމަކަން ބޮޑުކުރުމަކީ ހެޔޮވެރިކަމެއްގެ އެންމެ މުހިންމު އެއް އަސާސް ކަމުގައި ގިނަ ބަޔަކު ގަބޫލުކުރެއެވެ. ނަމަވެސް، ހާމަކަން ބޮޑުކުރުމަކީ ހަމައެކަނި އިދާރާއަކުން ބޭނުންވާ ވަކި މައުލޫމާތުތަކެއް އާންމުކުރުން ނުވަތަ މުއާމަލާތްކުރާނެ ރަސްމީ ވަސީލަތްތަކެއް ހުރުމެއް ނޫނެވެ.

ހާމަކަން ބޮޑުވުމަކީ ދައުލަތުގެ މުއައްސަސާތަކުން މަސައްކަތްކުރާ ގޮތާއި ނިންމުންތައް ނިންމާ ގޮތް އާންމުންނަށް ސާފުކޮށް އެނގޭނެހެން، މެދުކެނޑުމެއް ނެތި، އިސްނަގައިގެން އެކަން ކުރުމެވެ.

ދިވެހިރާއްޖޭގައި ސަރުކާރުގެ އެކި އިދާރާތަކުގެ ހާމަކަން ހުރި މިންވަރާ މެދު މިއަދު ބޮޑެތި ކަންބޮޑުވުންތަކެއް އެބަހުއްޓެވެ. އެންމެ ބޮޑު މައްސަލައަކަށް ވަނީ އިސްނަގައިގެން މައުލޫމާތު ހާމަކުރުމުގެ ސަގާފަތެއް ނެތުމެވެ. ނުވިތާކަށް ގުޅައިގެން މައުލޫމާތު ހޯދަން ކުރާ މަސައްކަތް ވެސް ފަނުފުލުން ދިއުމެވެ.

މި ދައްކަނީ ވަކި ވުޒާރާއެއްގެ ވާހަކައެއް ނޫނެވެ. ޖުމުލަކޮށް ދައުލަތުގެ ހުރިހާ ވުޒާރާއަކަށް ބެލިނަމަވެސް، ފެންނަން އޮތީ މި މަންޒަރެވެ.

މައުލޫމާތު ހާމަކުރުން އެއް ފަރާތުގައި ބާއްވާށެވެ. އެންމެ ކުޑަމިނުން ފޯނުގެ އަތްގަނޑު ހިއްލާލެވެނީ ވެސް ދައުލަތުގެ މަދު ވުޒާރާއަކަށެވެ.

ދައުލަތުގެ ޚަރަދުތަކާއި، ސިޔާސަތުތައް ތަންފީޒުކުރާ ގޮތާއި، މަޝްރޫއުތައް ކުރިއަށްދާ މިންވަރާއި، ޕްރޮކިއުމަންޓް ނިންމުންތަކުގެ އިތުރުން މުއައްސަސާތަކުގެ މަސައްކަތުގެ ފެންވަރާ ގުޅޭ މުހިންމު މައުލޫމާތުތައް، ސުވާލު ނުއުފައްދާހާ ހިނދަކު އާންމުކޮށް ހާމައެއް ނުކުރެއެވެ. ސުވާލު އުފެއްދުމުން ދެން ފެނިގެންދަނީ މައުލޫމާތު ހޯދަން ހުރި ހުރަސްތަކާއި، މައުލޫމާތު ހިފަހައްޓަން ސަރުކާރުން އުޅޭ މިންވަރެވެ.

މައުލޫމާތު ހޯދަން އެދުމުން އެތައް ދުވަހެއް ވަންދެން ޖަވާބު ނުލިބި ހުރުމާއި، ޚަބަރުގެ މުހިންމުކަން ކެނޑޭ ފަހުން ޖަވާބު ލިބުމާއި، އަދި އާންމު މަސްލަހަތާ ގުޅުންހުރި ކަންކަމުގައި އިދާރާތަކުން އެންމެ ސައްޙަނޫން މައުލޫމާތު ހިއްސާކުރުމަކީ މިއަދު އާންމު ކަމެކެވެ.

ހަގީގަތުގައި ސަރުކާރު މި ހިނގަމުންދަނީ މައުލޫމާތު ދިނުމާއި ހާމަ ކުރުން އަދި ވެރިކަން ހިންގުމުގެ ޤަވާއިދުތަކާ ވެސް ޚިލާފަށްކަމަށް ދެންނެވިދާނެއެވެ. ސަބަބަކީ މައުލޫމާތަށް އެދެންދެން މަޑުކުރުމުގެ ބަދަލުގައި، އާންމު މަސްލަހަތު ހިމެނޭ މައުލޫމާތުތައް މުއައްސަސާތަކުން ގަވާއިދުން ޝާއިއުކުރަން ޤާނޫނުން ވެސް ލާޒިމު ކުރާއިރު، އެކަން ކުރާ މުއައްސަސާއެއް ނެތޭ ދެންނެވުމަކީވެސް ކުށަކަށް ނުވާނެއެވެ.

 މައުލޫމާތު ހާމަކުރުމުގެ ސަގާފަތް ބިނާކުރުމަކީ ދައުލަތުގެ މުއައްސަސާތަކުން މިހާރުން މިހާރަށް ކުރަންޖެހޭ މުހިންމު ކަމެކެވެ. އާންމު ރައްޔިތުންގެ ފައިސާ ޚަރަދުކުރާ ގޮތާއި ސިޔާސަތުތައް ތަންފީޒުކުރާ ގޮތް ރައްޔިތުންނަށް އެނގުމަކީ އެމީހުންގެ ހައްގެކެވެ.