ހުޅުމާލެއިން އިތުރު ގޯއްޗަކާއި އިންނަމާދޫ އިން 3 ގޯތި ގަތްކަމަށް ފަލާހު ވިދާޅުވެއްޖެ

އިނގުރައިދޫ ދާއިރާގެ މެންބަރު އިބްރާހިމް ފަލާހު މާލީ ބަޔާނުގައި ފެންނަން ނެތް އެހެން ނަމަވެސް އިތުރު 4 ގޯއްޗެއް ގަނެފައިވާކަމަށް އޭނާ ވިދާޅުވެއްޖެއެވެ.

މިކަން ހާމަކުރެއްވީ މަޖިލީހުގެ މެންބަރުންގެ މާލީ ބަޔާން އާންމު ކުރުމުން އެކަމާއި ގުޅިގެން ނޫސްތަކަށް އަރާފައިވާ ސުރުހީއަކާ ގުޅިގެންނެވެ. ފަލާހުގެ މާލީ ބަޔާނުގައިވާ ގޮތުން ގެދޮރު ކުއްޔަށްދީގެން އަހަރެއްގެ މައްޗަށް 3 މިިލިއަނަށްވުރެ ގިނަ ރުފިޔާ ލިބެ އެވެ.

Advertisement

މި ހަބަރުތައް ނޫސްތަކަށް އެރުމާއެކު ފަލާހު އެކްސްގައި ކުރި ޕޯސްޓެއްގައި ވިދާޅުވީ ޢިންޝާﷲ މިއަންނަ އަހަރު އަދި މިއަށްވުރެ ޢާއްމުދަނީ އިތުރުވާނެ ކަމަށެވެ. އަދި އިންނަމާދޫ އިން ގަނެފައި ރެޖިސްޓްރީ ބަދަލުވުމުގެ މަރްހަލާގައި 3 ގޯއްޗާއި ހުޅުމާލެ އިން ގަތް ގޯތި ވެސް އުޅެނީ ރެޖިސްޓުރީ ބަދަލުކުރުމުގެ މަރުހަލާގައި ކަމަށް ފަލާހު ވިދާޅުވިއެވެ.

ނޫސްތަކުގައި ލިޔެފައިވާ ހަބަރާއެކު ޖެއްސުމުގެ ރާގަކުން ފަލާހު ވިދާޅުވީ މިފަހަރުގެ މާލީބަޔާނަށް ލެވޭވަރަށް ރަޖިސްޓްރީ ނިންމާލެވޭތޯ ބެއްލެވި ކަމަށާއި ނަމަވެސް ވާގޮތެއްނުވި ކަމަށެވެ.

ފަލާހު ވިދާޅުވީ "މިވާހަކަތައް މިހާކުރިން ހިއްސާމިކޮށްލީ ފަހަރެއްގައި ﷲގެ ރަހްމަތްފުޅުން ދުނިޔޭގައިހުރެ މިއަންނަ އަހަރު މާލީބަޔާންނެރޭއިރު ނޫސްވެރިއަކު ފަހަރެއްގައި އާޝޯޚްވެގެން ކަނޑަށްވެޓިދާނެތި!" ކަމަށެވެ.

މޭ 28، 2024 އިން ފެށިގެން މި އަހަރުގެ މޭ 27 އަށްވާ އެއް އަހަރު ދުވަހުގެ މާލީ ބަޔާނުގައި ޕީއެންސީ ޕީޖީ ލީޑަރު އިބްރާހިމް ފަލާހުގެ ނަމުގައިވާ ޖުމްލަ 4 ބިމުން ކުލީގެ ގޮތުގައި އަހަރެއްގެ މައްޗަށް 3،276،000 ރުފިޔާ ވަނީ ލިބިފަ އެވެ.

އޭގެ އިތުރުން ފަލާހު ވަނީ މާލެއިން، މާފަންނު "އަލް ހަދީދް" ނަމަކަށް ކިޔާ ގޯއްޗެއް ހަތަރު މިލިއަން ރުފިޔާއަށް ބައްލަވައިގެންފައެވެ. އަދި އެގޯތީގެ މިލްކުވެރިކަމުގެ މައްސަލަ ސިވިލް ކޯޓުން ނިންމައި ކުރި ހުކުމުގައި ވާގޮތުން ފަލާހު ބައްލަވައިގަތީ މާލޭ ދަފްތަރު ނަންބަރު 1458 އަހުމަދު ރަޝީދުގެ ނަމުގައި ރަޖިސްޓްރީކޮށްފައިވާ މާފަންނު "އަލްހަދީދު"ނަމަކަށް ކިޔާ ގޯއްޗެވެ. އެއީ 1000 އަކަފޫޓުގެ ގޯއްޗެކެވެ.

ފަލާހުގެ މާލީ ބަޔާނުން އެނގޭ ގޮތުގައި ރ. އިންނަމާދުގައި 3 ބިމާއި މާލޭގައި 1 ބިން އޮވެ އެވެ. އަދި އާމްދަނީގެ ގޮތުގައި ޖުމުލަ 5،166،000 ރުފިޔާ ވަނީ ލިބިފައެވެ. އެއީ ރައްޔިތުން މަޖިލީހުގެ މެންބަރަކަށް ލިބޭ 990،000 ރުފިޔާއާއި ވިޔަފާރީގެ ނަފާގެ ގޮތުގައި ލިބޭ 900،000 ރުފިޔާގެ އިތުރުން ގެދޮރު ކުއްޔަށް ދީގެން ކުލީގެ ގޮތުގައި ލިބޭ 3،276،000 ރުފިޔާ އެވެ.

މީގެ އިތުރުން ވެސް މާލީ ބަޔާން ތާރީހާ ހަމައަށް ބޭންކް ތަކުގައިވެސް ޖުމުލަ 111،074.84 ރުފިޔާއާއި 300.75 އެމެރިކާ ޑޮލަރު ހުރިކަމަށް މާލީބަޔާނުން އެނގެ އެވެ. އަދި މި އަހަރުގެ ފެބްރުއަރި މަހުގެ ވިހި ވަނަ ދުވަހު 15،727،0000 ރުފިޔާގެ ލޯނެއް ބޭންކް އޮފް މޯލްޑިވްސް އިން ނަގާފައިވާކަން ވެސް ހާމަވެ އެވެ.

ފަލާހުގެ މާލީ ބަޔާނަށް އިތުރަށް ބަލައިލާއިރު ވަރަށް ބޮޑު ދަރަންޏެއް އޭނާގެ އޮތްކަމަށް ދައްކަ އެވެ. އެގޮތުން އޭނާ ނަގާފައިވާ ލޯނަށް މިހާރުވެސް 15 މިލިއަނަށްވުރެ ގިނަ ރުފިޔާ ނުދައްކާ އޮތްކަން ފާހަގަ ވެއެވެ.