ރައީސުލްޖުމްހޫރިއްޔާގެ އަނބިކަނބަލުން، މިއާންޒް ކޮލެޖަށް 20 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައިފި
މިއާންޒް ކޮލެޖުގެ 20 ވަނަ އަހަރީ ދުވަހުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވަނީ، އެ ކޮލެޖަކީ ކުރު މުއްދަތެއްގައި ބޮޑު ކާމިޔާބީއެއް ހޯދާފައިވާ މުއައްސަސާއެއްކަން ފާހަގަކުރައްވާފައި. ތަޢުލީމަކީ އިންސާނާ ތަރައްޤީކޮށްދޭ ވަސީލަތެއްކަން ފާހަގަކުރައްވައި، ދީނާއި ޤައުމަށް ވަފާތެރި އަދި އަޚްލާޤީ ގޮތުން ހަރުދަނާ ދަރިވަރުންތަކަކަށް ވުމަށް އެކަމަނާ އިލްތިމާސްކުރެއްވި. މި ރަސްމިއްޔާތުގައި އެ ކޮލެޖަށް ގިނަ ދުވަހު ޚިދުމަތްކުރެއްވި މުވައްޒަފުންގެ އަގުވަޒަންކޮށް ހަނދާނީ ފިލާ ދިނުމުގެ އިތުރުން، ކޮލެޖުގެ ރަސްމީ ލަވަވެސް ވަނީ އިފްތިތާޙްކޮށްފައި.
ރައީސުލްޖުމްހޫރިއްޔާގެ އަނބިކަނބަލުން، މިއާންޒް ކޮލެޖަށް 20 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައިފި | ރައީސް އޮފީސް
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، މިއާންޒް ކޮލެޖަށް 20 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައިފިއެވެ.
ޢިމާދުއްދީން ސްކޫލުގައި މިރޭ އޮތް މި ރަސްމިއްޔާތުގައި އެކަމަނާ ވަނީ މިއާންޒް ކޮލެޖަށް 15 އަހަރަށް ވުރެ ގިނަ ދުވަހު ޚިދުމަތްކުރެއްވި ބޭފުޅުންގެ އަގުވަޒަންކުރުމުގެ ގޮތުން އެ ކޮލެޖުން ދެއްވާ ހަނދާނީ ފިލާ، އެބޭފުޅުންނާ ޙަވާލުކޮށްދެއްވާފައެވެ.
މިރޭގެ ރަސްމިއްޔާތުގައި އެކަމަނާ ދެއްކެވި ވާހަކަފުޅުގައި، މިއާންޒް ކޮލެޖަކީ ކުރުމުއްދަތެއްގައި، ހަލުވި ދުވެލީގައި ކާމީޔާބީއަށް ވާޞިލުވި މުއައްސަސާއެއްކަން ފާހަގަކުރައްވައި، ޤައުމީ ފެންވަރެއްގައި ރަނގަޅު ތަރުބަވީ އާޖީލެއްގެ ބިންގާ އެޅުނީތީ މުޅި ދައުލަތްވެސް އުފާކުރާކަމުގައި ވިދާޅުވިއެވެ.
ތަރައްޤީއަކީ އިންސާނާއަށް އަންނަ ބަދަލަކަށް ކިޔާ ނަމެއްކަމަށާއި، ތަޢުލީމަކީ އިންސާނާ ތަރައްޤީކޮށްދޭ ވަސީލަތެއްކަން ސިފަކުރައްވައި، ވާހަކަފުޅު ކުރިއަށްގެންދަވަމުން ރައީސުލްޖުމްހޫރިއްޔާގެ އަނބިކަނބަލުން ވަނީ، ތަޢުލީމު ލިބިފައިވާ މީހާގެ ކިބައިން ފާޅުވާ ހަރުދަނާ އަޚްލާޤުތަކެއް ހުންނަކަން ހަނދާންކޮށްދެއްވާފައެވެ. މިމޭރުމުން ވާހަކަފުޅު ކުރިއަށް ގެންދަވަމުން އެކަމަނާ ވަނީ، ދީނަށް ތެދުވެރި، ޤައުމަށް ވަފާތެރި، މަސައްކަތުގައި ފަރުވާތެރި ފަޚްރުވެރި ދިވެހިދަރިޔަކަށްވުމަށް، ދަރިވަރުންގެ ކިބައިން އެދިވަޑައިގެންފައެވެ.
މިރޭގެ ރަސްމިއްޔާތުގައި މިއާންޒް ކޮލެޖުގެ ފަރާތުން، ރައީސުލްޖުމްހޫރިއްޔާގެ އަނބިކަނބަލުންނަށް ހަނދާނީ ހަދިޔާއެއް އަރުވާފައިވެއެވެ. މިއާންޒް ކޮލެޖުގެ ފަރާތުން އެކަމަނާއަށް ހަނދާނީ ހަދިޔާ ހަވާލުކޮށްދެއްވީ، އެ ކޮލެޖުގެ ފައުންޑަރ އަދި ޗެއަރމަން، އަޙްމަދު މުއްތަކީއެވެ.
މީގެ އިތުރުން، މިއާންޒް ކޮލެޖުގެ "ސްޓޫޑަންޓް އެސޯސިއޭޝަން އެގްޒެކެޓިވް ކޮމިޓީ" އިޢުލާންކުރުމާއި، "މިއާންޒް"ގެ ރަސްމީ ލަވަ އިފްތިތާޙްކުރުންވެސް މިރޭގެ ރަސްމިއްޔާތުގައި އޮތެވެ. އަދި މިއާންޒް ކޮލެޖަށް 5 އަހަރަށް ވުރެން ގިނަ ދުވަހު ޚިދުމަތްކުރެއްވި ބޭފުޅުންނާއި، 10 އަހަރަށް ވުރެން ގިނަ ދުވަހު ޚިދުމަތް ކުރެއްވި ބޭފުޅުންނަށް، އެ ބޭފުޅުންގެ ޚިދުމަތުގެ އަގު ވަޒަންކުރުމުގެ ގޮތުން ހަނދާނީ ފިލާ ހަވާލުކުރުންވެސް މި ރަސްމިއްޔާތުގައި އޮތެވެ.
މިއާންޒް ކޮލެޖަށް 20 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި، ދަޢުލަތުގެ އިސްވެރިންނާއި، ބޭރު ޤައުމުތަކުގެ ޑިޕްލޮމެޓުންނާއި، ކޮލެޖުގެ އިސްވެރިންނާއި މުވައްޒަފުންނާއި ދަރިވަރުން ބައިވެރިވެވަޑައިގަތެވެ.
މަސްދަރު: ރައީސް އޮފީސް
