ދިއްދޫ އެއަރޕޯޓު އެޅުމަށް ހިއްކި ބިން ހިމާޔަތް ނުކޮށް ބޭއްވުމުން ގިރާތީ، ރައްޔިތުން ކަންބޮޑުވުމެއްގެ ތެރޭގައި!
ދިއްދޫގެ އެއަރޕޯޓު އެޅުމަށްޓަކައި ހިއްކާފައިވާ ބިން ހިމާޔަތްކުރުމުގެ މަސައްކަތް ސަރުކާރުން ނުކުރާތީ، އެ ސަރަހައްދު ގިރަމުންދާ މައްސަލައިގައި އެ ދާއިރާގެ ކުރީގެ މެންބަރު ވަހީދު ވަނީ ކަންބޮޑުވުން ފާޅު ކުރައްވާފައި. ރައީސް މުއިއްޒުގެ ވައުދުފުޅާ އެއްގޮތަށް 112 ހެކްޓަރުގެ ބިން ހިއްކާފައިވީ ނަމަވެސް، ރަށުގެ ތަރައްގީގެ މަޝްރޫއުތައް ހުއްޓިފައިވާތީ އެކަމުގެ ޝަކުވާ ރައްޔިތުން ދަނީ ކުރަމުން.
ހއ. ދިއްދޫ އެއަރޕޯޓު އެޅުމަށް ހިއްކި ސަރަހައްދު. މި ސަރަހައްދު ހިއްކީ އެމްއޭސީއެލުން. | އެމްއޭސީއެލް
ހއ. ދިއްދޫ އެއަރޕޯޓު އެޅުމަށް ބޭނުންވާ ބިން ހިއްކި ނަމަވެސް އެސަރަހައްދު ގިރާ މައްސަލަ ބޮޑުވެއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި އެދާއިރާގެ ރައްޔިތުން މަޖިލީހުގެ ކުރީގެ މެންބަރު އަބްދުﷲ ވަހީދު ވަނީ ދިއްދޫގެ ތަރައްގީގެ މަޝްރޫއުތައް ހުއްޓިފައިވާތީ އެކަމުގެ ކަންބޮޑުވުންފާޅު ކުރައްވާފަ އެވެ. އަދި ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފަށާފައިވާ މަޝްރޫއުތައް ވެސް ކުރިއަށް ނުދާ ކަމަށެވެ.
ދިއްދޫގެ އެއަރޕޯޓުގެ މަޝްރޫއަށް އިޝާރަތް ކުރައްވައި ވަހީދު ވިދާޅުވީ، އެއީ ރައްޔިތުންގެ ވިންދާ ގުޅިފައިވާ މުހިންމު މަޝްރޫއެއް ކަމަށާއި، އެއަރޕޯޓެއް ބޭނުންވާ ކަމަށެވެ. ނަމަވެސް އެެއަރޕޯޓެއް ގާއިމް ކުރުމަށްޓަކައި ހިއްކި ބިން މިހާރު ގިރަމުންދާ ކަމަށާއި، އެއީ ރައްޔިތުން ކަންބޮޑުވާ ބޮޑު މައްސަލައެއް ކަމަށެވެ.
ނަމަވެސް ހިއްކި ސަރަހައްދު ހިމާޔަތް ކުރުމަށްޓަކައި ސަރުކާރުން އެއްވެސް މަސައްކަތެއް ނުކުރާ ކަމަށް އޭނާ ވިދާޅުވި އެވެ.
ދެން އެންމެ ބޮޑަށް އެމަނިކުފާނު ވައުދުވެގެން ދިޔައީ އެއަރޕޯޓުގެ ވައުދު. އެއާ ގުޅިގެން ރަށުގެ ފަޅު އެއްކޮށް ހިއްކުމަށްފަހުގައި އެ ހިއްކި ސަރަހައްދު ރަނގަޅު ގޮތުގައި ހިމާޔަތެއް ނުކުރެވޭ. މިއަދު ހިއްކި ސަރަހައްދު ގިރަމުންދާތީ އެޝަކުވާ ރައްޔިތުން އެބަ ކުރޭ. އެސަރަހައްދު ހިމާޔަތް ކުރުމަށްޓަކައި އެ އުޅުނު ގޮތް ފެނިފައި މިއަދު ރައްޔިތުން ކަންބޮޑުވޭ. އެއަށް ބޮޑު ބިން ގިރާގެން މިއަދު ދާއިރުގަ އެކަމަށް އެކަށީގެންވާ ހައްލެއް ނުލިބޭދިއްދޫ ދާއިރާގެ ރައްޔިތުން މަޖިލީހުގެ ކުރީގެ މެންބަރު އަބްދުﷲ ވަހީދު
ދިއްދޫގައި ބިންހިއްކައި އެ ރަށުގައި އެއަރޕޯޓެއް އެޅުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ރަށުގެ ރައްޔިތުންނަށް 2023 ވަނަ އަހަރު ރިޔާސީ އިންތިޚާބުގައި ވެވަޑައިގެންފައިވާ ވައުދުފުޅެކެވެ.
އެއަރޕޯޓެއް ތަރައްގީ ކުރުމަށާއި ބޯހިޔާވަހިކަމާއި އެ ނޫން ވެސް ޚިދުމަތްތައް ގާއިމްކުރުމަށް ދިއްދޫ އިންް 112 ހެކްޓަރު ހިއްކައި ނިންމާލާފައިވަނީ 23 ފެބްރުވަރީ 2026 ގަ އެވެ. އަދި 50 ދުވަހުން ހިއްކި މިސަރަހައްދު ހިމާޔަތް ކުރުމަށް މިހާތަނަށް އެއްވެސް މަސައްކަތެއް ކޮށްފައިނުވެ އެވެ.
