ބޮލީވިއާގައި ކުއްލި ނުރައްކަލުގެ ހާލަތު އިއުލާނު ކޮށްފި

ބޮލީވިއާގެ ރައީސް ރޮޑްރިގޯ ޕާޒް ހޮނިހިރު ދުވަހު ކުއްލި ނުރައްކަލުގެ ހާލަތު އިއުލާނު ކުރައްވައި، މަގުތައް ބަންދު ކޮށްފައިވާ ހިސާބުތައް ސާފުކޮށް ނިޒާމު އަލުން ގާއިމު ކުރުމަށް ސިފައިންގެ ބާރުތައް ފުޅާ ކުރައްވައިފި އެވެ.

މިއީ ފަންސާސް ދުވަހަށް ވުރެ ދިގު މުއްދަތަކަށް ކުރިއަށްދާ މުޒާހަރާ ތަކުގެ ސަބަބުން ޤައުމުގެ އިޤްތިޞާދު ހުއްޓުމަކަށް އައިސްފައިވާ ދަނޑިވަޅެއްގައި ބޮލީވިއާގެ ރައީސް ނިންމެވި ނިންމުމެކެވެ. 

ކުއްލި ނުރައްކަލުގެ ހާލަތު އިއުލާން ކުރުމުން ރައީސް ޕާޒް އަށް ދުސްތޫރީ ގޮތުން ފުޅާ ބާރު ތަކެއް ލިބިގެންދެ އެވެ. މިގޮތުން މަގުތައް ބަންދު ކޮށްފައިވާ ހިސާބުތައް ސާފު ކުރުމަށް ސިފައިން ފޮނުވުމުގެ ބާރު ލިބިގެންދެ އެވެ. މި ހުކުމް ވަގުތުން ފެށިގެންދާއިރު، ރައީސް ވަނީ ހުކުމް ނެރުއްވި ފަހުން 24 ގަޑިއިރުގެ ތެރޭގައި ކޮންގްރެސް އަށް އަންގަވަން ޖެހޭނެ ކަމަށް ވިދާޅުވެފައި އެވެ. އަދި ކޮންގްރެސް އަށް އެކަން ބަލައި ފާސްކުރުމަށް ނުވަތަ ބާތިލު ކުރުމަށް 72 ގަޑިއިރުގެ މުއްދަތެއް ވެސް ލިބިގެން ދާނެ އެވެ.

ވާތު ފިކުރުގެ ކުރީގެ ރައީސް އީވޯ މޮރާލެސްއާ ގުޅުން ހުރި ގިނަ ބަޔަކު ވަނީ މުހިންމު މަގުތައް ބަންދުކޮށް، ލޮރީތައް މަޑު ޖައްސައި، ލަޕާޒް އަށް ވެސް ހިމެނޭ ގޮތަށް ގިނަ ސަރަހައްދު ތަކަށް ކާބޯ ތަކެއްޗާއި، ތެޔޮ އަދި ބޭސްފަރުވާގެ ސާމާނު ފޯރު ކޮށްދިނުން ހުއްޓުވައިފައި އެވެ.

މި ހަމަނުޖެހުން ފެށުނީ ރައީސް ޕާޒް ދިގު މުއްދަތަކަށް ދެމިގެން ގޮސްފައިވާ ތެލުގެ ސަބްސިޑީ ވަގުތުން ކަނޑާލުމުންނެވެ. މިކަން ކުރީ ޑޮލަރުގެ ބޮޑު ދަތި ކަމެއް ކުރިމަތި ވެފައިވާ ދަނޑިވަޅެއްގައި ބަޖެޓުގެ ދަރަނި ކުޑަ ކުރުމަށާއި، އިންޓަނޭޝަނަލް މަނިޓަރީ ފަންޑާ މަޝްވަރާ ކުރަމުންދާ ދަނޑިވަޅެއްގައި އެވެ.

ފަހުން ތެލުގެ އަގު ހަމަޖެއްސުމަށާއި، މަގުބޫލު ނޫން ބިމުގެ އިސްލާހުތައް އަނބުރާ ގެންދިއުމަށް ފިޔަވަޅު އަޅުއްވި ނަމަވެސް، މުޒާހަރާތައް ދަނީ ބޮޑު ވަމުންނެވެ. މުވައްޒަފުންގެ އިއްތިހާދު ތަކުން މަސައްކަތްތެރިންގެ މުސާރަ އިތުރު ކުރުމާއި، ތެލާއި ޑޮލަރުގެ ދަތިކަން ނިންމުން އަދި ރައީސް ޕާޒް މަގާމުން އިސްތިއުފާ ދެއްވުމަށް ވެސް ވަނީ ގޮވާލައިފަ އެވެ. 

ބޮލީވިއާގެ ރައީސް ޕާޒް ވިދާޅުވީ މި ހާލަތު ބަދަލު ވެގެން ދިޔައީ ޑިމޮކްރަސީ ބަލިކަށި ކުރުމަށް ރާވައިގެން ކުރާ މަސައްކަތަކަށް ކަމަށެވެ. ކުއްލި ނުރައްކަލުގެ ހާލަތުގެ މަގްސަދަކީ ނިޒާމު އަލުން ގާއިމު ކުރުމާއި، ރައްޔިތުން ރައްކާތެރި ކުރުމާއި، މުހިންމު ސާމާނު ފޯރު ކޮށްދިނުން ކަށަވަރު ކުރުން ކަމަށް އޭނާ ވިދާޅުވި އެވެ. ހަމަނުޖެހުން ކުރިއަށް ގެންދާ މީހުންނަށް ގާނޫނީ ފިޔަވަޅު އަޅާނެ ކަމުގެ އިންޒާރު ވެސް ރައީސް ދެއްވި އެވެ.

ރައީސް ޕާޒް އިތުރަށް ވިދާޅުވީ މިއީ ރައްޔިތުންގެ ދިރިއުޅުން ހަނި ކުރުމަށް އިއުލާން ކުރާ ކުއްލި ނުރައްކަލުގެ ހާލަތެއް ނޫން ކަމަށެވެ. އޭގެ ބަދަލުގައި މިއީ ރައްޔިތުންނަށް މިނިވަންކަން އަނބުރާ ދިނުމަށާއި، ސިޔާސީ ހަމަ ނުޖެހުން ބޭނުން ކޮށްގެން މަގުތައް ބަންދުކޮށް ރައްޔިތުންނަށް ގެއްލުން ދޭ މީހުންގެ އަތުން ބޮލީވިއާ މިނިވަން ކުރުމަށް އިއުލާން ކުރާ ކުއްލި ނުރައްކަލުގެ ހާލަތެއް ކަމަށް ވެސް އޭނާ ވިދާޅުވި އެވެ.