ޔުނައިޓެޑުން އަނެއްކާ ވެސް 100 މިލިޔަން ޕައުންޑުގެ ބިޑަކަށް ތައްޔާރު ވަނީ!

އިނގިރޭސި ކްލަބް މެންޗެސްޓާ ޔުނައިޓެޑުން އެޓްލެޓިކޯ މެޑްރިޑްގެ ސްޓްރައިކަރް އެންޓޯނިއޯ ގްރީޒްމަން ހޯދުމަށް ޓްރާންސްފާއެއް ހުޅަހެއެޅުމަށް ތައްޔާރު ވަމުންދާ ކަމަށް މިޑީޔާތަކުގައި ޚަބަރު ފެތުރެން ފަށައިފިއެވެ.

މަޝްހޫރު ކުޅިވަރު ނޫސް "އީއެސްޕީއެން" އިން ރިޕޯޓްކޮށްފައިވާ ގޮތުގައި މިފަހަރު ޔުނައިޓެޑުން ގްރީޒްމަން ހޯދުމަށް ހުށައަޅަށް ތައްޔާރުވަމުން އަންނަނީ 100 މިލިއަން ޕައުންޑުގެ ބިޑެކެވެ.

ނިމިގެން ދިޔަ ޓްރާންސްފާ މާކެޓްގައި ވެސް ޔުނައިޓެޑުން ވަނީ ގްރީޒްމަންގެ ސޮއި ހޯދުމަށް ގިނަ މަސައްކަތްތަކެއް ކޮށްފައެވެ. އެގޮތުން ގްރީޒްމަން ހޯދުމަށް ޔުނައިޓެޑުން އެޓްލެޓިކޯ މެޑްރިޑަށް ދެ ބިޑެއް ކޮށްފައިވާއިރު މި ދެ ބިޑު ވެސް ވަނީ އެޓީމުން ބަލައިނުގަނެ ދޫކޮށްލާފައެވެ.

ރިޕޯޓްތަށް ބުނާ ގޮތުން މި ސީޒަނުގެ ކުރިޔަށް އޮތްތަނުގައި ގްރީޒްމަން އެޓްލެޓިކޯ މެޑްރިޑު ދޫކޮށް ޔުނައިޓެޑަށް ބަދަލުވާނެ ކަމަށް ނުބެލެވޭއިރު، މީގެ ކުރިން ޔުނައިޓެޑުން ގްރީޒްމަން ގަތުމަށް ހުށައަޅާފައި ވަނީ 85 މިލިއަން ޕައުންޑުގެ ބިޑެކެވެ. ގްރީޒްމަން ހޯދުމަށް ބޮޑެތި ގިނަ ކްލަބުތަކުން މަސައްކަތް ކުރަމުން ދިޔަކަމުގައި ވީ ނަމަވެސް އޭނާދަނީ ތަކުރާރުކޮށް އެޓްލެޓިކޯ ދޫކޮށް އިތުރު ކުލަބަކަށް ނުދާނެ ކަމަށް ބުނަމުންނެވެ. އެގޮތުން އޭނާ މިހާރު ވަނީ އެޓްލެޓިކޯގައި އިތުރު ފަސް އަހަރު މަޑުކުރަން ނިންމާ އެ ކުލަބުގެ އާ އެއްބަސްވުމުގައި ސޮއިކޮށްފައެވެ.

ފްރާންސްގެ ގައުމީ ޓީމުގައި ވެސް މޮޅު ކުޅުމެއް ދައްކަމުން އަންނަ ގްރީޒްމަންއަކީ އެޓްލެޓިކޯގައި ވެސް މުހިންމު ދައުރެއް އަދާކުރަމުން އަންނަ ކުޅުންތެރިއެކެވެ.