ޕާކިސްތާން އިން ޑައިމަންޑް ޖުބިލީ މުބާރާތުގެ ޗެމްޕިއަންކަން ހޯދައިފި

ރާއްޖޭގައި ކުރިއަށް ދިޔަ ޑައިމަންޑް ޖުބިލީ އިންޓަނޭޝަނަލް މުބާރާތުގެ ޗެމްޕިއަންކަން ޕާކިސްތާން އިން ހޯދައިފި އެވެ.

ޕާކިސްތާން އިން މުބާރާތުގެ ޗެެމްޕިއަންކަން ހޯދީ ބުދަ ދުވަހުގެ ރޭ ކުޅުނު ފައިނަލްގައި އަފްޣާނިސްތާން ބަލި ކޮށްގެންނެވެ. ގަލޮޅު ރަސްމީ ދަނޑުގައި ކުޅުނު ފައިނަލް މެޗުގައި ޕާކިސްތާން އިން ވަނީ 2-0 އިން އަފްޣާނިސްތާން ބަލިކޮށްފައި އެވެ. މެޗުގެ ފުރަތަމަ ހާފުގައި ޕާކިސްތާން އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗު ފަށައިގެން 24 ވަނަ މިނެޓުގައި ޕާކިސްތާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޝާޔަކް ދޯސްތު އެވެ. ޕާކިސްތާން އިން ލީޑު ނެގި ފަހުން، އަފްޣާނިސްތާން އިން ވަނީ ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފައި އެވެ. ނަމަވެސް، އެ ޓީމަށް ލިބުނު އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ.

ޕާކިސްތާން އިން އެ ޓީމުގެ ދެ ވަނަ ލަނޑު ޖެހީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެވެ. އެ ލަނޑު އެ ޓީމަށް ޖަހައިދިނީ ހާރޫން ރަޝީދު އެވެ. މެޗުގައި އޭނާ ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގައި އެވެ.

މޮޅާ އެކު ޕާކިސްތާން އިން މި ވަނީ، މެޗަކުން ބަލި ނުވެ ޑައިމަންޑް ޖުބިލީ މުބާރާތް ކާމިޔާބު ކޮށްފައި އެވެ. މުބާރާތުގެ ލީގު ބުރުގައި ޕާކިސްތާން އިން ކުޅުނު ތިން މެޗުގެ ތެރެއިން ދެ މެޗުން މޮޅުވެފައިވާއިރު، އަނެއް މެޗުން ވަނީ އެއްވަރުވެފައި އެވެ. މިއީ 35 އަހަރުގެ ތެރޭގައި ފުޓުބޯޅައިގައި ޕާކިސްތާން އިން ހޯދި އެންމެ ބޮޑު ކާމިޔާބެވެ.

ރާއްޖޭގެ ފުޓުބޯޅަ އަށް 75 އަހަރު ފުރުމުގެ މުނާސަބަތާ ދިމާކޮށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކުރި މުބާރާތުގައި ބައިވެރިވީ ހަތަރު ޤައުމެކެވެ. އެއީ ރާއްޖޭގެ އިތުރުން، ޕާކިސްތާން އާއި އަފްޣާނިސްތާން އަދި ބަންގްލަދޭޝް އެވެ. މުބާރާތުގެ ލީގު ބުރުގައި ރާއްޖެ އިން ކުޅުނު ތިން މެޗުގެ ތެރެއިން ދެ މެޗުން ބަލިވެފައިވާއިރު، އަނެއް މެޗުން ވަނީ އެއްވަރުވެފައި އެވެ.