ކޮލަމްބިއާގެ ރައީސް ކަމަށް އައުމަށް ޓްރަމްޕް ތާއީދު ކުރައްވަނީ، ފުރަތަމަ ބުރުގައި ކުރި ހޯއްދެވި ޑެ ލާ އެސްޕްރިއޭލާ އަށް
މިކަމާ ގުޅޭ ގޮތުން ސޯޝަލް މީޑިއާގައި ކުރެއްވި ޕޯސްޓެއްގައި އެމެރިކާގެ ރައީސް ޓްރަމްޕް ވިދާޅުވީ، މި އިންތިޚާބުގެ ނަތީޖާ އަކީ ކޮލަމްބިއާގެ މުސްތަގުބަލާއި، އެމެރިކާ އާއެކު އޮންނަ ގުޅުމަށް ވަރަށް މުހިންމު ނަތީޖާ އަކަށް ވާނެ ކަމަށް.
އެމެރިކާގެ ރައީސް ޑޮނަލްޑް ޓްރަމްޕް އާއި، ކޮލަމްބިއާގެ ރިޔާސީ އިންތިޚާބުގެ ފުރަތަމަ ބުރުގައި ކުރި ހޯއްދެވި އަބެލާޑޯ ޑެ ލާ އެސްޕްރިއޭލާ. | ރޮއިޓާސް
ކޮލަމްބިއާގެ ރިޔާސީ އިންތިޚާބުގެ ދެވަނަ ބުރުގައި ވާދަ ކުރައްވާ ކަނާއަތު ފިޔައިގެ ކެންޑިޑޭޓް އަބެލާޑޯ ޑެ ލާ އެސްޕްރިއޭލާ އަށް ތާއީދު ކުރައްވާކަން އެމެރިކާގެ ރައީސް ޑޮނަލްޑް ޓްރަމްޕް ހާމަ ކުރައްވައިފި އެވެ.
މި މަހުގެ ފަހުކޮޅު ބޭއްވުމަށް ހަމަޖެހިފައިވާ މި އިންތިޚާބުގެ ދެވަނަ ބުރުގައި އެސްޕްރިއޭލާ ވާދަކުރައްވާނީ، ވާއަތު ފިޔައިގެ ސެނެޓަރު ކަމަށްވާ އިވާން ސެޕެޑާއާ އެވެ.
ކޮލަމްބިއާގެ ރިޔާސީ އިންތިޚާބު ދެ ވަނަ ބުރަކަށް
މިކަމާ ގުޅޭ ގޮތުން ސޯޝަލް މީޑިއާގައި ކުރެއްވި ޕޯސްޓެއްގައި އެމެރިކާގެ ރައީސް ޓްރަމްޕް ވިދާޅުވީ، މި އިންތިޚާބުގެ ނަތީޖާ އަކީ ކޮލަމްބިއާގެ މުސްތަގުބަލާއި، އެމެރިކާ އާއެކު އޮންނަ ގުޅުމަށް ވަރަށް މުހިންމު ނަތީޖާ އަކަށް ވާނެ ކަމަށެވެ. ކޮލަމްބިއާގެ ރިޔާސީ އިންތިޚާބުގެ ފުރަތަމަ ބުރުގެ ވޯޓުލުން ނިމުނުއިރު، އެސްޕްރިއޭލާ ވަނީ 44 އިންސައްތަ ވޯޓު ހޯއްދަވާފައި އެވެ. އޭނާއާ ވާދަ ކުރެއްވި ސެޕެޑާ އަށް ލިބިވަޑައިގަތީ 41 އިންސައްތައަށް ވުރެ މަދު ވޯޓެވެ.
ގާނޫނީ ވަކީލެއްގެ ގޮތުގައި މަސައްކަތް ކުރައްވާ އެސްޕްރިއޭލާ އަކީ މީގެ ކުރިން ސިޔާސީ އެއްވެސް މަގާމެއް ފުރުއްވާފައިވާ ބޭފުޅެއް ނޫނެވެ. ނަމަވެސް، ހަތިޔާރު އެޅި ޖަމާއަތްތަކާ ދެކޮޅަށް އޭނާ ގެންގުޅުއްވާ ހަރުކަށި ސިޔާސަތު ތަކާއި، ބޮޑު 10 ޖަލު ބިނާ ކުރުމަށް ވެވަޑައި ގެންފައިވާ ވައުދުގެ ސަބަބުން، ގިނަ ބަޔަކު އޭނާ ސިފަ ކުރަނީ އެލްސަލްވަޑޯރުގެ ރައީސް ނަޔީބު ބުކޭލޭއާ އެއްގޮތް ބޭފުޅެއްގެ ގޮތުގައި އެވެ.
އެސްޕްރިއޭލާ ދެއްވި ވީޑިއޯ އިންޓަވިއުއެއްގައި ވިދާޅުވީ، ކޮލަމްބިއާގައި ހިންގާ ކުށްތަކާއި މަސްތުވާ ތަކެތީގެ ޓެރަރިޒަމްއާ ދެކޮޅަށް ކުރާ މަސައްކަތުގައި އެމެރިކާ އަކީ ވަރަށް މުހިންމު ދައުރެއް އަދާ ކުރާ ގައުމެއް ކަމަށެވެ. އަދި އޭނާ އާއި ޓްރަމްޕް އަލޯ ޑިމޮކްރަސީ އާއި، މިނިވަންކަމާއި، ގާނޫނީ އިމުގެ ތެރެއިން ކަންކަން ކުރުމަށް އެއްގަލަކަށް އަރާ ދެ ބޭފުޅުން ކަމަށްވެސް އެސްޕްރިއޭލާ ފާހަގަ ކުރެއްވި އެވެ.
ޓްރަމްޕްގެ މި ނިންމެވުމަށް ކޮލަމްބިއާގެ މިހާރުގެ ރައީސް ގުސްޓާވޯ ޕެޓްރޯ ވަނީ ވަރަށް ބޮޑަށް ފާޑު ވިދާޅުވެފައި އެވެ. ވާއަތު ފިޔައިގެ ސިޔާސަތު ތަކަށް ތާއީދު ކުރައްވާ ޕެޓްރޯ ވިދާޅުވީ، އެއް ގައުމުން އަނެއް ގައުމުގެ ދާޚިލީ ނިންމުން ތަކަށް ނުފޫޒު ފޯރުވަން މަސައްކަތް ކުރުމަކީ މިނިވަންކަން ގެއްލިގެން ދާނެ ކަމެއް ކަމަށެވެ.
ކޮލަމްބިއާޣެ ރައީސް ޕެޓްރޯ އަކީ މީގެ ކުރިން ވެސް އެމެރިކާގެ ލީޑަރުންނާ އެކި މައްސަލަ ތަކުގައި ޚިޔާލު ތަފާތުވުންތައް އުފެދިފައިވާ ބޭފުޅެކެވެ.
މަސްދަރު: ރޮއިޓާސް
