ރިޒުހާން އާއި ސާއިފް ސްކޮޑަށް ނަގާ، ގައުމީ ޓީމުގެ ފަރިތަކުރުން ފަށައިފި

އޭޝިއަންކަޕް ކޮލިފައިންގައި އަންނަ މަހު ރާއްޖެ އަދި އޮމާން ބައްދަލުކުރާ މެޗަށް ނެގި ސްކޮޑުގައި ކްލަބް ގްރީން ސްޓްރީޓްގެ އިބްރާހިމް ރިޒުހާން އާއި މުހައްމަދު ސާއިފް ހިމަނާ، ގައުމީ ޓީމުގެ ފަރިތަކުރުންތައް ފަށައިފި އެވެ.

ހޯމަ ދުވަހު ހަވީރު ގައުމީ ޓީމުގެ ފަރިތަކުރުންތައް ފަށާފައިވާއިރު، ސްކޮޑަށް ނެގި ރިޒުހާން އަދި ސައިފް ވެސް ވަނީ ބައިވެރިވެފައެވެ.

ސްކޮޑަށް މުޅިން އަލަށް ނެގި ރިޒުހާން އަކީ ގްރީން ސްޓްރީޓް ފުރަތަމަ ޑިވިޝަނަށް ގެނައުމަށް މުހިންމު ދައުރެއް އަދާކޮށްފައިވާ ކުޅުންތެރިޔެކެވެ. އޭނާ ވަނީ މާލޭ ލީގުގައި މުހިންމު ލަނޑުތަކެއް ގްރީން އަށް ކާމިޔާބު ކޮށްދީފައެވެ. މީގެއިތުރުން އޭނާ އަންނަނީ އުރީދޫ ދިވެހި ޕްރިމިއާ ލީގުގައިވެސް މޮޅު ކުޅުމެއް ދައްކަމުންނެވެ.

ސާއިފް ވަނީ މީގެކުރިން މާޒިޔާ ސްޕޯޓްސް އެންޑް ރެކްރިއޭޝަން، ނިއުރޭޑިއަންޓް ސްޕޯޓްސް ކްލަބް އަދި ވިކްޓްރީ ސްޕޯޓްސް ކްލަބަށްވެސް ކުޅެފައެވެ. އޭނާ ގްރީން އަށް ބަދަލުވީ މި ސީޒަނުގައެވެ. އެގޮތުން އޭނާ އަންނަނީ އެ ކްލަބުގައި މޮޅު ކުޅުމެއް ދައްކަމުންނެވެ.

ސްކޮޑުން މިފަހަރު ފުރުސަތު ގެއްލިފައިވަނީ ގްރީންގެ ފޯވާޑް އަހުމަދު ރަޝީދު (އައްމަޑޭ) އަދި އަސަދުﷲ އަބްދުﷲ (އަސައްކޮ) އެވެ. މި ދެ ކުޅުންތެރިންވެސް ސްކޮޑުގައި ހިމަނާފައި ނުވަނީ އަނިޔާގެ މައްސަލަތަކާ ގުޅިގެންނެވެ.

ގައުމީ ސްކޮޑަށް ނިއު އިން 8 ކުޅުންތެރިން ވަނީ ނަގާފައެވެ. އެއީ ރިލްވާން ވަހީދު (ރިލޭ)، ކީޕަރު މުހައްމަދު ފައިސަލް، މުހައްމަދު ރަޝީދު (ހޮކޭ)، އަހުމަދު އަބްދުﷲ (ލިލީ)، އަލީ ފާސިރު (ސެންޓޭ)، ހަމްޒާ މުހައްމަދު، އަކްރަމް އަބްދުލް ގަނީ އަދި އަލީ އަޝްފާގު (ދަގަނޑޭ) އެވެ.

މާޒިޔާ ޓީމުން ޤައުމީ ސްކޮޑަށް ނަގާފައި ވަނީ އަމްދާން އަލީ (އެންޑީ)، ސަމޫހް އަލީ، އަސްހަދު އަލީ (އަޑުބަރޭ)، މުހައްމަދު އުމެއިރު، އިސްމާއިލް އީސަ (މެސީ) އަދި މުހައްމަދު އިރުފާން (އިރޭ) އެވެ. މިފަހަރު ވެސް މާޒިޔާގެ މިޑްފިލްޑަރު މުހައްމަދު އާރިފް (ބަކާ) ގައުމީ ސްކޮޑަށް ނަގާފައެއް ނުވެއެވެ.

ގްރީން އިން ސާއިފް އާއި ރިޒުހާންގެ އިތުރުން ދެން ސްކޮޑަށް ނަގާފައިވަނީ އަހުމަދު ޝާފިއު (ޝާފީ) އެވެ. ތިނަދޫ ޓީމުން ޤައުމީ ސްކޮޑަށް ނަގާފައިވަނީ އިމްރާން ރަޝީދު އަދި އަހުމަދު ރިޒުވާނެވެ. މިލަންދޫ އިން ނަގާފައިވަނީ ކީޕަރު މުހައްމަދު އިމްރާންއެވެ. ޓީސީން ގައުމީ ސްކޮޑަށް ނަގާފައިވަނީ އަހުމަދު ޒާދް، މުހައްމަދު އައްޒާމް، އިބްރާހިމް ވަހީދު ހަސަން އަދި ނާއިޒް ހަސަން (ދާދު) އެވެ.

ރާއްޖެ ވަނީ ކޮލިފައިންގައި ރަށުން ބޭރު އޮމާންއާ ދެކޮޅަށް ކުޅެފައެވެ. އެ މެޗުން ރާއްޖެ ބަލިވީ 0-5 ގެ ތަފާތުބޮޑު ނަތީޖާއަކުންނެވެ. ގްރޫޕްގައި ރާއްޖެ ވަނީ ފަލަސްތީން އަތުންވެސް 0-3 ގެ ނަތީޖާއިން ބަލިވެފައެވެ. ރާއްޖެ މޮޅުވީ ހަމައެކަނި ބޫޓާން އަތުންނެވެ.