ހިޔާ ޓަވަރު 5 ގަ ލިފްޓް ބެހެއްޓުމުގެ މަސައްކަތް ކުރި އިރު ގާ ކުނޑި އެޅި ސަހަރައްދު މިހާރު ބޮޑު ގޮނޑަކަށް، އާންމުންގެ ޝަކުވާ އިންތިހާއަށް
12 މެއި 2026 | އަންގާރަ 17:37ހިޔާ ފްލެޓްގެ ފަސްވަނަ ޓަވަރުގައި އަލަށް ބެހެއްޓި ލިފްޓް ސަރަހައްދުގައި ހުރި ގާކުނޑިތައް ނުނަގައި ގިނަދުވަސްވުމުން އެތަން ކުނިގޮނޑަކަށް ބަދަލުވެ، އާންމުންނަށް ބޮޑެތި އުނދަގޫތަކެއް ވަނީ ކުރިމަތިވެފަ. މެއިންޓެނެންސް ފީގެ ގޮތުގައި ބޮޑު އާމްދަނީ އެއް އެޗްޑީސީ އަށް ލިބޭއިރު، މި މައްސަލަ ހައްލުނުވެ ދިގުލައިގެންދާތީ ރައްޔިތުން ކަންބޮޑުވުން ފާޅުކުރި ނަމަވެސް، އެ ސަރަހައްދު ސާފުކުރާނެ ސީދާ ތާރީޚެއް އެ ކޯޕަރޭޝަނުން ހާމައެއް ނުކުރޭ.
ހިޔާ ޓަވަރު 5 ގެ ލިފްޓް ކުރިމަތި ވަނީ ކުނި ގޮނޑަކަށް ވެފަ. | ރާއްޖެ އެމްވީ
ހުޅުމާލެ ފޭސް 2 ގައި ހުންނަ ހިޔާ ފްލެޓްތަކުގެ ތެރެއިން ފަސްވަނަ ޓަވަރުގައި އަލަށް ބެހެއްޓި ލިފްޓް ސަރަހައްދުގައި ހުރި ގާކުނޑިތަކެއް ނުނަގައި ގިނަ ދުވަސްވުމުގެ ސަބަބުން، އެ ސަރަހައްދު ބޮޑު ކުނިގޮނޑަކަށް ބަދަލުވެފައިވާ ކަމުގެ ޝަކުވާ އާންމުން ކުރަން ފަށައިފި އެވެ.
މި މައްސަލައާ ގުޅޭގޮތުން މައުލޫމާތު ލިބިފައިވާ ގޮތުގައި، އެ ސަރަހައްދުގައި ކުނި ގިނަވާން މެދުވެރިވީ ލިފްޓް ބެހެއްޓުމުގެ މަސައްކަތް ކުރިއިރު އެތަނަށް އުކާލާފައި ހުރި ގާފުނިތައް ނުނަގައި ހުރުމުންނެވެ. އެ ގާފުނިތައް ހުރި ދިމާލަށް އާންމުން ކުނި އަޅަމުން ގޮސް، މިހާރު އެތަން އޮތީ ލިފްޓްގެ ދޮރުމައްޗަށް އަރާ ވަރަށް ކުނިން ފުރިފަ އެވެ. މިއީ އިންސާނުން ވަދެ ނިކުމެ ހަދާ ތަނަކަށް ވާއިރު، މިކަމުގެ ސަބަބުން ދިރިއުޅޭ މީހުންނަށް ބޮޑެތި އުނދަގޫތަކަކާ ވަނީ ކުރިމަތިލާން ޖެހިފަ އެވެ.
އެ ޓަވަރުގައި ދިރިއުޅޭ ރައްޔިތުން ފާހަގަކުރާ ގޮތުގައި، ކޮންމެ އެޕާޓްމެންޓަކުން މެއިންޓެނެންސް ފީގެ ގޮތުގައި މަހަކު 1,000 ރުފިޔާ ދައްކައެވެ. ޖުމްލަ 6,000 ފްލެޓުން ބޮޑު އާމްދަނީ އެޗްޑީސީ އަށް ލިބޭއިރު، މިފަދަ އަސާސީ ކަންކަން ހައްލުނުވެ ދިގުލައިގެން ދިއުމަކީ ބަލައިގަނެވޭނެ ކަމެއް ނޫން ކަމަށް އެފަރާތްތަކުން ބުނެއެވެ.
އެތަނުގައި ހުރި ގާފުނި ހުރީތީވެ މީހުން އެތަނަށް ކުނިއަޅަން ފެށީ. މިހާރު އެހެރީ ލިފްޓް ދޮރުމައްޗާ އެއްކޮށް ކުނިން ފުރިފަ. ދެން ބުނާނެ މިސާލަކަށް މީހުން ކުނިއަޅަނީ ނޫންހޭ. އޯކޭ ކުނި އަޅައިގެން ނުވާނެ. އެކަމަކު އެ ޓަވަރުގައި އުޅޭ ހުރިހާ އެންމެނެއް އެތަނަށް ކުންޔެއް ނާޅާނެ ނޫންތޯ. ދެން މިސާލަކަށް އެހެން ބަޔަކު އެޅީއޯ. ދެން އުޅޭ ބަޔަކު ހަމަ އެހެން ބަޔަކު ކުނި އެޅީތީއޭ ކިޔާފައި އެ ކުނިގަނޑުގެ ތެރޭގަ އުޅޭކަށް ނުޖެހޭނެ. މިސާލަކަށް ބަޔަކު ކުނި އަޅަނީ. ދެން އެކަން ބަލަހައްޓަން ވީނޫންތޯ. ކުނި އަޅާ މީހުން ޖޫރިމަނާ ކުރަންވީނޫންތޯ. ތަން ބަލަހައްޓަނީކީ ވެސް ނޫން. ސެކިއުރިޓީ ވެސް ބަލަހައްޓަނީ ކީނޫން. ސާފެއް ކުރަނީކީ ނޫން. ދެން ކީއްކުރަން ނަގާ މެއިންޓެނެންސް ފީއެއް.ކަންބޮޑުވުން ފާޅުކުރި ރައްޔިތެއް
މި މައްސަލައިގެ ޝަކުވާ އެތައް މަހެއް ކުރިން ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އަށް ހުށަހަޅާފައިވާ ކަމަށްވެސް ރައްޔިތުން ބުނެ އެވެ. ނަމަވެސް މިހާތަނަށް އެ ސަރަހައްދު ސާފުކުރުމުގެ އެއްވެސް މަސައްކަތެއް ކޮށްފައި ނުވާތީ، ގިނަ ބަޔަކު ދެކެނީ އެޗްޑީސީ އޮތީ މިކަމުގައި "ގަދަ ނިދީގައި" ކަމަށެވެ.
މިކަމާ ގުޅޭގޮތުން އެޗްޑީސީ އިން ބުނީ، އެ ސަރަހައްދުގެ މައުލޫމާތު ކުރިންވެސް ލިބިފައިވާ ކަމަށާއި، މިހާރު އެ މައްސަލަ ކަމާބެހޭ ޑިޕާޓްމެންޓުގެ ސަމާލުކަމަށް ގެނެސްފައިވާ ކަމަށެވެ. އެހެންނަމަވެސް، އެ ސަރަހައްދު ސާފުކޮށް ނިމޭނެ ސީދާ ތާރީޚެއް އެ ކޯޕަރޭޝަނުން ހާމަކޮށްފައެއް ނުވެ އެވެ.
