ޕިއްޒާއެއް ކުރަހައިގެން ޕިއްޒާއެއް ހޯދުމުގެ ފުރުސަތު ޕިއްޒާ ބޯނާ އިން

ކުޑަކުދިންގެ ދުވަހާ ގުޅުވައިގެން ޕިއްޒާ ބޯނާ އިން ކުޑަކުދިންނަށް ޚާއްޞަ ކުރެހުމުގެ މުބާރާތެއް  އިއުލާންކޮށްފި އެވެ.

ކުޑަކުދިންގެ ދުވަހުގެ އާޓް ޗެލެންޖް ގެ ނަމުގައި ކުރިއަށްގެންދާ މި ހަރަކާތަކީ ކުޑަކުދިންގެ ހިތްތަކުގައި ކުރެހުމަށް އޮތް ލޯބި އިތުރުކޮށް، އެކުދިންގެ އުފެއްދުންތެރިކަން ދައްކާލުމަށް ހުޅުވާލި ފުރުސަތެކެވެ.

މި މުބާރާތުގެ ތީމަކަށް ކަނޑައަޅާފައިވަނީ "ޑްރޯ ޔުއަރ ޑްރީމް ޕިއްޒާ" ނުވަތަ އެކުއްޖަކު އެންމެ ބޭނުންވާ ކަހަލަ ޕިއްޒާއެއްގެ ކުރެހުން ކުރެހުމެވެ. މި ހަރަކާތުގައި ބައިވެރިވާ ކޮންމެ ކުއްޖަކަށް ވެސް ހިލޭ ޕިއްޒާއެއްގެ އިތުރުން ސްޓިކާ ޕެކެއް ލިބޭނެ ކަމަށް ޕިއްޒާ ބޯނާ އިން ބުނެ އެވެ.

މި މުބާރާތުގައި ބައިވެރިވުމަށް ކުދިންނަށް އޭ 4 ސައިޒުގެ ކަރުދާހެއްގައި އެކުދިން އެންމެ ބޭނުންވާ ފަދަ ޑްރީމް ޕިއްޒާއެއް ކުރަހާލަން ޖެހެ އެވެ. އެ ކުރެހުން ހިފައިގެން ޕިއްޒާ ބޯނާގެ އައުޓްލެޓަކަށް އައިސް، އެތަނުގައި ހުންނަ ފޮޓޯ ފްރޭމްގައި ފޮޓޯއެއް ނެގުމަށްފަހު، ޕިއްޒާ ބޯނާ ޓެގްކޮށް ސޯޝަލް މީޑިއާގައި ޕޯސްޓްކޮށްލަން ޖެހެ އެވެ. އެ ޕޯސްޓް އެ އައުޓްލެޓްގެ މުވައްޒަފުންނަށް ދައްކާލުމުން، ބައިވެރިވި ކޮންމެ ކުއްޖަކަށް ހިލޭ ޕިއްޒާ ލިބޭނެ ވައުޗަރެއް ލިބޭނެ އެވެ.

މިއީ ކުޑަކުދިންނާ ގުޅޭނެ ފަދަ މަޖާ އަދި ޝައުގުވެރި ގޮތަކަށް ފަރުމާކޮށްފައިވާ މުބާރާތެކެވެ. ޕިއްޒާ ބޯނާ އިން ބުނި ގޮތުގައި މި މުބާރާތުގެ މަގްސަދަކީ ކުޑަކުދިންގެ ދުވަހުގެ އުފަލުގައި ހުރިހާ ކުދިންނަށްވެސް ބައިވެރިވެވޭނެ ފަދަ މާހައުލެއް ގާއިމުކޮށްދިނުމެވެ. އަދި ކުރެހުމުގެ ތެރެއިން ކުދިންގެ ޚިޔާލީ ދުނިޔެ ސިފަކޮށްދިނުމަށް މި ހަރަކާތުގެ ސަބަބުން ބާރު ލިބިގެންދާނެ ކަމަށްވެސް އެ ކުންފުނިން ފާހަގަކުރެ އެވެ.

މި ހަރަކާތް ޕިއްޒާ ބޯނާގެ ހުރިހާ އައުޓްލެޓެއްގައި ކުރިއަށްދާނެ އެވެ. މި މުބާރާތް ކުރިއަށްދާނީ މި މަހުގެ އެގާރަވަނަ ދުވަހާއި ބާރަވަނަ ދުވަހު، ހެނދުނު 8:30 އިން ރޭގަނޑު 8:00 އަށެވެ.