ތެލެސީމިއާ އާއިލާތަކަށް ބޭނުންވާ ސިއްހީ އަދި އިޖްތިމާއީ ރައްކާތެރިކަމާއި ފުރުސަތުތައް ފަހިކޮށްދިނުމަކީ ސަރުކާރުގެ ޒިންމާއެއް: ރައީސް މުއިއްޒު

ތެލެސީމިއާ އާއިލާތަކަށް ބޭނުންވާނެ ސިއްހީ އަދި އިޖްތިމާއީ ރައްކާތެރިކަމާއި ފުރުސަތުތައް ފަހިކޮށްދިނުމަކީ ސަރުކާރުގެ ޒިންމާއެއް ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެ އެވެ. 

ބައިނަލްއަގުވާމީ ތެލެސީމީއާ ދުވަހާއި ގުޅިގެން ހުކުރު ދުވަހު އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ތެލަސީމިއާ ދުވަސް ހަނދާކޮށްދެނީ އިންސާނިއްޔަތުކަމާއި އޯގާތެރިކަމުގެ ސިފަތައް އިސްކުރުމަށް ކަމަށެވެ. އަދި ކޮންމެ ދިވެހި ދަރިއަކާއި އާއިލާއަކަށް ވެސް އެހީތެރިކަމާއި އެއްބާރުލުންދޭންޖެހޭ ކަމަށް އެމަނިކުފާނު ވިދާޅުވި އެވެ. 

ތެލެސީމިއާ ތަހައްމަލުކުރަމުންދާ ކޮންމެ ދިވެއްސަކީ އަޅުގަނޑުމެންގެ ދަރީންކަން ފާހަގަކުރައްވައި ރައީސް މުއިއްޒު ވިދާޅުވީ، އެ އާއިލާތަކަށް ބޭނުންވާ ސިއްހީ އަދި އިޖްތިމާއީ ރައްކާތެރިކަމާއި ފުރުސަތުތައް ފަހިކޮށްދިނުމަކީ ސަރުކާރުގެ ޒިންމާއެއް ކަމަށާއި، މަސްއޫލިއްޔަތެއް ކަމަށެވެ. 

ބައިނަލްއަގުވާމީ ތެލެސީމީއާ ދުވަސް ކޮންމެ އަހަރެއްގެ މޭ މަހުގެ 8 ވަނަ ދުވަހު ފާހަގަކުރެ އެވެ. މި އަހަރުގެ ޝިއާރަކީ "ހިޑެން ނޯ މޯ: ފައިންޑިންގ ދަ އަންޑައިގްނޯސްޑް" މި ޝިޔާރެވެ. ސަޕޯޓިންގ ދަ އަންސީން، ނުވަތަ އިތުރަށް ފޮރުވުމެއް ނެތި ބަލި ތަހައްމަލުކުރާ މީހުން ދެނެގަނެ އެހީތެރިކަން ފޯރުކޮށްދިނުން" މި އެވެ.

ތެލެސީމީއާ ތަހައްމަލު ކުރަމުންދާ މީހުންގެ ހައްގުގައި މިދުވަސް ފާގަގަކުރަމުންދާއިރު، ރައީސް މުއިއްޒުގެ ސަރުކާރުގައި 2025 ވަނަ އަހަރުގެ ތެރޭގައި، މޯލްޑިވްސް ބްލަޑް ސަރވިސްއަށް ލިބިފައިހުރި ފިލްޓަރތަކުގެ މައްސަލައެއް ދިމާވެ، ބްލަޑް ބޭންކުން ލޭ އުކާލަން ޖެހޭ މައްސަލަ ބޮޑުވެ އިހްތިޖާޖް ކޮށްފައިވެ އެވެ. އަދި ރަނގަޅަށް ޚިދުމަތް ނުދެވޭތީ، ހުޅުމާލޭ ފޭސް 1 ގައި ހުންނަ އޮރެންޖު ހިޔާއަށް ތެލެސީމިއާ ސެންޓަރު ބަދަލުކޮށްފައިވެ އެވެ. 

މީގެ އިތުރުން މިދިޔަ އޭޕްރީލް މަހުގެ ތެރޭގައި، ރާއްޖޭގެ ސިއްހީ ނިޒާމުގެ ތެރޭގައި މުއްދަތު ހަމަވެފައިވާ ޓެސްޓް ކިޓް ބޭނުން ކުރުމާއި، ތެލެސީމިއާ ކުދިންނަށް ކުނިވެފައިވާ ލޭ އެޅުން ފަދަ ނުރައްކާތެރި އިހުމާލުތައް ފެންމަތިވެފައިވެ އެވެ.