އިސްތިއުފާ ނުދިނުމުން ޑީޖޭއޭގެ ދެ ވެރިޔަކު މުއްދަތެއް ނެތް ގޮތަށް ސަސްޕެންޑުކޮށްފި
ޑީޖޭއޭގެ އިސް މަގާމުތަކެއްގައި ތިއްބެވި ޒަކަރިއްޔާ ހުސައިން އާއި އަހުމަދު އަލީ، މަގާމުން އިސްތިއުފާ ދެއްވުމަށް އެންގުމުން އެކަން ނުކުރެއްވުމާ ގުޅިގެން މުއްދަތެއް ނެތް ގޮތަށް ސަސްޕެންޑުކޮށްފި. އެ އިދާރާއިން ބަލަމުންދާ މައްސަލައަކާ ގުޅިގެން މި ދެ ބޭފުޅުން ސަސްޕެންޑުކުރިއިރު، މިއީ ދާދި ފަހުން އިސްތިއުފާ ދެއްވި ޗީފް ޖުޑީޝަލް އެޑްމިނިސްޓްރޭޓަރު އަމްޖަދު މުސްތަފާގެ ދައުރުގައި މަގާމުތަކަށް އައްޔަންކުރެއްވި ދެ ބޭފުޅުން. މީގެ ކުރިން ވެސް ސަރުކާރުގެ އެކި އިދާރާތަކުގައި އިސް މަގާމުތައް ފުރުއްވާފައިވާ މި ދެ ބޭފުޅުންނަށް ފިޔަވަޅު އަޅާފައި މިވަނީ ޑީޖޭއޭގެ ހިންގުން ހަރުދަނާކުރުމަށް ސަރުކާރުން މަސައްކަތް ކުރަމުންދާ ދަނޑިވަޅެއްގަ.
އިސްތިއުފާ ނުދިނުމުން ޑީޖޭއޭ އިން ސަސްޕެންޑުކުރި ޒަކަރިއްޔާ ހުސައިން (ކ) އަދި އަހްމަދު އަލީ (ވ) | އަދަދު
ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އިސް ދެ މަގާމެއްގައި ތިއްބެވި ބޭފުޅުން މަގާމުން އިސްތިއުފާ ދެއްވުމަށް އެންގުމުން އެކަން ނުކުރެއްވުމާ ގުޅިގެން، އެ ދެ ބޭފުޅުން މުއްދަތެއް ނެތް ގޮތަށް ސަސްޕެންޑުކޮށްފި އެވެ.
ސަސްޕެންޑުކޮށްފައި ވަނީ ޑީޖޭއޭގެ ޖެނެރަލް އެޑްމިނިސްޓްރޭޝަން އެންޑް ފްރަންޓް އޮފީހުގެ އިސްވެރިޔާ ޒަކަރިއްޔާ ހުސައިން އަދި ޖުޑީޝަލް އެކަޑަމީގެ ޑިރެކްޓާ ޖެނެރަލް އަހުމަދު އަލީ އެވެ.
މައުލޫމާތު ލިބިފައިވާ ގޮތުގައި މި ދެ ބޭފުޅުންނަށް މަގާމުން އިސްތިއުފާ ދެއްވުމަށް އަންގާފައިވަނީ މިދިޔަ އަންގާރަ ދުވަހު އެވެ. ނަމަވެސް، އެ ބޭފުޅުން އިސްތިއުފާ ނުދެއްވުމުން އެ ރޭގެ ވަގުތެއްގައި ވަނީ ސަސްޕެންޝަންގެ ޗިޓު ހަވާލުކޮށްފަ އެވެ. ޑީޖޭއޭގެ އިންފޮމޭޝަން އޮފިސަރު ވިދާޅުވީ މި ދެ ބޭފުޅުން ސަސްޕެންޑުކުރީ ބަލަމުންދާ މައްސަލައަކާ ގުޅިގެން ކަމަށެވެ. ނަމަވެސް އެއީ ކޮން މައްސަލައެއް ކަމެއް އަދި ތަފްސީލެއް ހާމައެއް ނުކުރެ އެވެ.
މި ދެ ބޭފުޅުންނަކީ ޑީޖޭއޭގެ ޗީފް ޖުޑީޝަލް އެޑްމިނިސްޓްރޭޓަރުގެ މަގާމުން މިދިޔަ މަހު އިސްތިއުފާ ދެއްވި އަމްޖަދު މުސްތަފާގެ ވަރަށް ގާތް ދެ ބޭފުޅުން ކަމަށް ރާއްޖެ އެމްވީ އަށް ވަނީ މައުލޫމާތު ލިބިފަ އެވެ. ޒަކަރިއްޔާ އާއި އަހުމަދު އަލީ އެ މަގާމުތަކަށް އައްޔަންކޮށްފައިވަނީ ވެސް އަމްޖަދު އެ އިދާރާގެ ވެރިޔަކަށް ހުންނެވި ދުވަސްވަރު އެވެ. އަމްޖަދު މަގާމުން ވަކިވެވަޑައިގަތީ އަމިއްލަ ސަބަބުތަކަކާ ހުރެ ކަމަށް އޭނާ ވަނީ ވިދާޅުވެފަ އެވެ.
ސަސްޕެންޑުކުރި ޒަކަރިއްޔާ ހުސައިން އަކީ މީގެ ކުރިން ސިވިލް ސާވިސް ކޮމިޝަން (ސީއެސްސީ) ގެ މެމްބަރުކަން ވެސް ކުރައްވާފައިވާ ބޭފުޅެކެވެ. އޭނާ އެ މަގާމުން އިސްތިއުފާ ދެއްވީ މުވައްޒަފުންނާ މެދު ތަފާތުކުރުމާއި ގަވާއިދާ ހިލާފަށް އަމަލުކުރާ ކަމަށް ބުނެ މަޖިލީހުން އޭނާ ވަކިކުރަން ތައްޔާރުވެފައި ވަނިކޮށެވެ. އަދި އަހުމަދު އަލީ އަކީ އެޑިއުކޭޝަން މިނިސްޓްރީގެ ޕާމަނެންޓް ސެކެޓްރީގެ މަގާމުގައި ހުންނަވަނިކޮށް، ސީއެސްސީން ބަލަމުންދިޔަ މައްސަލައެއްގައި ސަސްޕެންޑުކޮށްފައި ހުއްޓާ އިސްތިއުފާ ދެއްވި ބޭފުޅެކެވެ.
ޑީޖޭއޭ އަކީ ރާއްޖޭގެ ކޯޓުތަކުގެ އިދާރީ ކަންކަން ބަލަހައްޓާ މައި އިދާރާ އެވެ. މިހާރު ޖޭއެސްސީގެ ދަށުން ހިންގަމުންދާ އެ އިދާރާގެ ހިންގުން ހަރުދަނާކުރުމަށްޓަކައި، އެ ތަން އަލުން އެކުލަވައިލުމުގެ ވިސްނުންފުޅު ގެންގުޅުއްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފަ އެވެ.
