އޯޕެކް އިން ޔޫއޭއީ ވަކިވެއްޖެ

އޯޕެކް އާއި އޯޕެކް ޕްލަސް އިން ވަކިވާން ނިންމާފައިވާ ކަމަށް، އެކުވެރި އަރަބި އިމާރާތް (ޔޫއޭއީ) އިން ހާމަ ކޮށްފި އެވެ.

އަންގާރަ ދުވަހު ޔޫއޭއީ އިން ވަނީ އެ ޤައުމު އޯޕެކް އާއި އޯޕެކް ޕްލަސް އިން ވަކިވާން ނިންމާފައިވާކަން އިއުލާން ކޮށްފަ އެވެ. އެ ޤައުމުގެ ރަސްމީ ނޫސް އެޖެންސީ ވާމް އިން ބުނީ، މި ނިންމުން ނިންމީ އެ ޤައުމުގެ ދިގު މުއްދަތުގެ ސްޓްރެޓީޖިކް އަދި އިޤްތިޞާދީ ވިޝަން އަދި ބަދަލުވަމުން އަންނަ އެ ޤައުމުގެ ހަކަތައާ ގުޅުންހުރި ސިޔާސަތުތައް ދެނެގަތުމަށް ފަހު ކަމަށެވެ.

މީގެ ތެރޭގައި ޤައުމީ ހަކަތައާ ގުޅުން ހުރި އުފެއްދުންތެރި ކަމަށް އިތުރު އިންވެސްޓްމަންޓް ހޯދުމަށް ކުރަމުންދާ މަސައްކަތްތައް ހިމެނޭ ކަމަށާއި، އެ ނިންމުމަކީ ބައިނަލްއަޤުވާމީ ހަކަތައާ ބެހޭ ބާޒާރުގައި ޒިންމާދާރު، އިތުބަރު އަދި ކުރިއަރަމުންދާ ދައުރެއް އަދާ ކުރުމުގެ އަޒުމު އިތުރަށް ވަރުގަދަ ކުރުމަށް ނިންމި ނިންމުމެއް ކަމަށް ބުނެފައިވެ އެވެ. 

މީގެ އިތުރުން ވާމް އިން ބުނެފައި ވަނީ، އެ ނިންމުން ނިންމީ ޔޫއޭއީގެ އުފެއްދުންތެރި ކަމުގެ ސިޔާސަތަށް ފުރިހަމަ ގޮތެއްގައި ރިވިއު ކުރުމަށް ފަހު ކަމަށާއި، މިހާރުގެ އަދި ކުރިއަށް އޮތް ތަނުގެ އުފެއްދުންތެރި ކަމުގެ ޤާބިލުކަން ދެނެގަނެ، ޤައުމީ މަސްލަހަތު ރައްކާތެރިކޮށް، ބާޒާރުގެ ޙާލަތަށް ބަލައި ބޭނުންތައް ފުއްދުމަށް އަމަލީ ގޮތުން އެހީތެރިވުމުގެ އަޒުމުގެ މައްޗަށް ބިނާކޮށް ކަމަށެވެ.

އޯޕެކް ޖަމާއަތުން ވަކިވުމަށް ފަހު، ޔޫއޭއީ އިން ބުނީ ކުރިއަށް އޮތް ތަނުގައި ވެސް އެ ޤައުމުން ޒިންމާދާރު ގޮތެއްގައި އަމަލު ކުރާނެ ކަމަށާއި، ބާޒާރުގެ ޙާލަތަށް އަދި ބޭނުން ތަކަށް ބަަލައި، އިތުރު އުފެއްދުންތައް ބާޒާރަށް ގެނައުމުގައި ވަރުގަދަ އަދި ހަމަހަމަކޮށް ކުރިއަށް ދާނެ ކަމަށެވެ. 

ޔޫއޭއީގެ މި ނިންމުމަކީ ބައިނަލްއަޤުވާމީ ތެލުގެ ބާޒާރަށް ބޮޑު އަސަރެއް ކުރާނެ ނިންމުމެއްގެ ގޮތުގައި ވިޔަފާރިވެރިން ދެކެމުންދާއިރު، ޔޫއޭއީ އަކީ ދުނިޔޭގެ އެންމެ ބޮޑު ތެލުގެ ރިޒާވްހުރި ޤައުމު ތަކުގެ ތެރޭގައި ހިމެނޭ ޤައުމެކެވެ. އޯޕެކް ޕްލަސް ޖަމާއަތުގައި ހިމެނޭ ޤައުމު ތަކުން ދުނިޔޭގެ ތެލުގެ އެފެއްދުންތެރި ކަމުގެ ބޮޑު ބައެއް ކޮންޓްރޯލް ކުރެ އެވެ.