އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ އާދީއްތަ ދުވަހު ޖެރޫސަލަމްގައި އިސްރާއީލުގެ ބޮޑުވަޒީރާ ބައްދަލުކުރައްވައިފިއެވެ. މި ބައްދަލުވުމުގައި ޣައްޒާގެ ހަނގުރާމަ ހުއްޓާލުމާ ބެހޭގޮތުން މަޝްވަރާކުރެއްވި ކަމަށް ރިޕޯޓުތައް ބުނެއެވެ.

ވޮޝިންގްޓަންގެ އެންމެ އިސް ޑިޕްލޮމެޓްގެ ގޮތުގައި މި ސަރަޙައްދަށް ކުރެއްވި ފުރަތަމަ ދަތުރުގައި، ރޫބިއޯ، ދުނިޔޭގެ ނުރުހުން އަމާޒުވެފައިވާ އެމެރިކާގެ ރައީސް ޑޮނަލްޑް ޓްރަމްޕް ޣައްޒާ ރައްޔިތުން އެ ބިމުން ބޭލުމާ ބެހޭ ހުށަހެޅުން ޕްރޮމޯޓު ކުރައްވާނެ ކަމަށް ވަނީ ބެލިފައެވެ.

ޓްރަމްޕްގެ ޕްލޭނަކީ ޣައްޒާ އެމެރިކާ އިން ހިސޯރުކޮށް، އެތަނުގައި ދިރިއުޅޭ ދެ މިލިއަނަށްވުރެ ގިނަ މީހުން އެހެން ތަނަކަށް ބަދަލުކުރުމެވެ.

އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވަނީ ދާދި ފަހުން ވައިޓް ހައުސް އަށް ކުރެއްވި ޒިޔާރަތުގައި މި ޚިޔާލަށް މަރުޙަބާ ކިޔުއްވާފައެވެ. ނަމަވެސް އަރަބި އަދި މުސްލިމް ގައުމުތަކުގެ އިތުރުން އދ އާއި ދުނިޔޭގެ އެތައް ގައުމަކުން ވަނީ ޓްރަމްޕްގެ މި ޕްލޭނަކީ ޣައިރު ގާނޫނީ އަދި ނަސްލު ނައްތާލުމާ އެއްފަދަ ޕްލޭނެއް ކަމަށް ބުނެ ނުރުހުން ފާޅު ކޮށްފައެވެ.

ރޫބިއޯ އިސްރާއީލަށް ވަޑައިގަތް އިރު އޭގެ ކުރީ ދުވަހު ހަމާސްއިން ޣައްޒާގައި ހިފަހައްޓާފައި ތިބި މީހުންގެ ތެރެއިން އިޒްރޭލުގެ 3 މީހުން ދޫކޮށްލައި، އޭގެ ބަދަލުގައި 369 ފަލަސްޠީނު މީހުން އިސްރާއީލުން ވަނީ ދޫކޮށްލާފައެވެ. މިއީ ނާޒުކު ހަނގުރާމަ ހުއްޓުމުގެ ދަށުން ހަވަނަ ފަހަރަށް އިސްރާއީލާއި ހަމާސް އާ ދެމެދު ކުރެވުނު މުޢާމަލާތެވެ.

ހަނގުރާމައަށް ދާއިމީ ނިމުމެއް ގެނައުމަށް އަމާޒުކޮށްގެން ހަދާފައިވާ އެއްބަސްވުމުގެ ދެވަނަ ފިޔަވަހީގެ މަޝްވަރާތައް އަންނަ ހަފްތާގައި ދޯހާގައި ފެށޭނެ ކަމަށް ބެލެވެއެވެ.

އިސްރާއީލުގެ އެންމެ ގާތް އެކުވެރިޔާ އަދި ހަތިޔާރު ފޯރުކޮށްދޭ ބައިވެރިޔާ އެމެރިކާއިން ބުނެފައިވަނީ އަރަބި ސަރުކާރުތަކުން ހުށަހަޅާ އެހެން ހުށަހެޅުންތަކަށް އެމެރިކާ ހުޅުވިފައި އޮތް ނަމަވެސް، މިވަގުތަށް "ހަމައެކަނި ޕްލޭނަކީ ޓްރަމްޕްގެ ޕްލޭން" ކަމަށެވެ.

ސަޢޫދީ އަރަބިއްޔާ އަދި ޔުނައިޓެޑް އަރަބް އެމިރޭޓްސްއަށް ވެސް ރޫބިއޯ ވަޑައިގަންނަވާނެ ކަމަށް ބެލެވެއެވެ.

އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ އިޒްރޭލުގެ ބޮޑުވަޒީރު ބެންޖަމިން ނެތަންޔާހޫއާ ބައްދަލުކުރައްވައިފި