ތެޔޮ އުފައްދާ މިންވަރު މަދުކުރަން ނިންމި ނިންމުމަށް ރާއްޖެއިން ތާއީދު ކޮށްފި
18 އޮކްޓޯބަރު 2022 | އަންގާރަ 13:58ސައުދީން އެޅި ފިޔަވަޅަކީ މުހިންމު ފިޔަވަޅެއް ކަމަށް ފޮރިން މިނިސްޓްރީން ފާހަގަކުރި
ފޮރިން މިނިސްޓަރު އަބްދުﷲ ޝާހިދު ސައުދީގެ އިސް ބޭފުޅަކާ ބައްދަލު ކުރައްވަނީ
ތެޔޮ އުފައްދާ މިންވަރު މަދުކުރުމާއި ގުޅޭގޮތުން އޯޕެކް ޕްލަސް އިން ނިންމި ނިންމުމަށް ދިވެހި ސަރުކާރުން ތާއީދުކޮށްފިއެވެ.
ފޮރިން މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނީ ސައުދީ އަރަބިއްޔާ ސަރުކާރުން އިސްވެ، އޯޕެކް ޕްލަސް ޤައުމުތަކުން 5 އޮކްޓޯބަރު 2022 ގައި ނިންމި ނިންމުމަށް ދިވެހި ސަރުކާރުން ތާއީދު ކުރާ ކަމަށެވެ. އަދި އެ ނިންމުމުގައި ސައުދީއާއެކު ރާއްޖެ އޮތް ކަމަށް އެ ބަޔާނުގައި ވަނީ ބުނެފައެވެ.
ފޮރިން މިނިސްޓްރީގެ ބަޔާނުގައި ބުނީ އޯޕެކް ޕްލަސް އިން ތެޔޮ އުފައްދާ މިންވަރު މަދު ކުރުމަށް ނިންމި ނިންމުމަކީ ދުނިޔޭގެ އިގްތިސާދީ ހާލަތާއި ތެލުގެ ބާޒާރާއި އެހެނިހެން ފަންނީ ކަންތައްތަކެއްގެ މައްޗަށް ބިނާކޮށް ނިންމާފައިވާ ނިންމުމެއް ކަމަށެވެ. އަދި އެ ނިންމުމަކީ އޯޕެކް ޕްލަސްގެ ހުރިހާ މެމްބަރުންގެ އިއްތިފާގުން ނިންމާފައިވާ ނިންމުމެއް ކަން ފާހަގަކޮށް އެ މިނިސްޓްރީން ބުނީ މިއީ ސިޔާސީގޮތުން ނިންމާފައިވާ ނިންމުމެއް ނޫން ކަމަށާއި މިއީ ދުނިޔޭގެ ތެލުގެ ބާޒާރު ހަމައަކަށް އެޅުވުމަށް އެޅުނު ހެޔޮ ފިޔަވަޅެއްގެ ގޮތުގައި މި ނިންމުން ބަލައިގަންނަންޖެހޭ ކަމަށެވެ.
މީގެ އިތުރުން ދިވެހިރާއްޖެ ފަދަ ހަކަތަ އިމްޕޯޓްކުރުމަށް ބަރޯސާވެފައިވާ ކުޑަ ގައުމަކަށް ދުނިޔޭގެ ހަކަތަ ބާޒާރުގެ ހަމަޖެހުމާއި ރައްކާތެރިކަން ލިބުމަކީ ކޮންމެހެން ބޭނުންތެރި ކަމެއް ކަމަށް ވެސް މިނިސްޓްރީގެ ބަޔާނުގައި ވަނީ ބުނެފައެވެ. އަދި ދުނިޔޭގެ އިގްތިސާދު ކުރިއަރުވައި، ހަރުދަނާކުރުމަށް ސައުދި އަރަބިއްޔާ އިން ކުރާ މަސައްކަތްތަކަށް ރާއްޖޭގެ ފުރިހަމަ އެއްބާރުލުމާއި ތާއީދު ސައުދީ ސަރުކާރަށް ލިބޭނެ ކަމަށްވެސް ފޮރިން މިނިސްޓްރީގެ ބަޔާނުގައި ބުނެފައިވެއެވެ.
އޯޕެކް ޕަލްސްގެ ޤައުމުތަކުން ވަނީ މި މަހުގެ 5 ވަނަ ދުވަހު ދުވާލަކު ތެޔޮ އުފައްދާ މިންވަރުން ދެ މިލިއަން ފީފާ އަށް މަދު ކުރުމަށް ނިންމާފައެވެ. މީގެ ސަބަބުން ދުނިޔޭގެ އެންމެ ބޮޑު އެއް އިގްތިސާދު ކަމަށްވާ އެމެރިކާއަށް ވަނީ އޭގެ އަސަރު ކޮށްފައެވެ. އެގޮތުން އެމެރިކާގައި ތެލުގެ އަގު އުފުލި އިންފްލޭޝަން ރޭޓް މައްޗަށް ގޮސްފައިވާއިރު އެ ޤައުމުގެ ސަރުކާރުން ވަނީ އޯޕެކް ޕްލަސްގެ އެ ނިންމުމާ މެދު ނުރުހުން ފާޅުކޮށްފައެވެ. އަދި ތެޔޮ އުފެއްދުން މަދުކުރުމުގެ ނިންމުމަށް ޔޫރަޕްގެ ނުރުހުންވެސް ވަނީ އަމާޒުވެފައެވެ.
