ސްޕެޝަލް އޮލިމްޕިކްސް މޯލްޑިވްސްގެ އެއް ވަނަ ނެޝަނަލް ސްވިމް މީޓް ބާއްވައިފި

ސްޕެޝަލް އޮލިމްޕިކްސް މޯލްޑިވްސް (އެސްއޯ މޯލްޑިވިސް)ގެ އެއް ވަނަ ނެޝަނަލް ސްވިމް މީޓް ބާއްވައިފި އެވެ.

ހުޅުމާޅެ ސްވިމިން ޕޫލް ޓްރެކްގައި ދެ ދުވަހުގެ މުއްދަތަކަށް ކުރިއަށް ގެންދިޔަ މި މުބާރާތުގައި ނުވަ އިވެންޓަކުން ޖުމްލަ 38 ކުދިން ފަތާފައިވެ އެވެ. އެއީ އަންހެން ނުވަ ކުދިންނާއި ފިރިހެން 29 ކުދިންނެވެ. މި އިވެންޓު ކުރިއަށް ގެންގޮސްފައި ވަނީ އޭޕްރީލް މަހުގެ 24 ވަނަ ދުވަހުން 25 ވަނަ ދުވަހުގެ ނިޔަލަށެވެ. 

މިއީ އެސްއޯ މޯލްޑިވިސް އިން ސްވިމިން ކޮމްޕެޓިޝަން ގެންދިޔަ ތިން ވަނަ އަހަރެވެ. މި އަހަރުގެ މުބާރާތުގެ ފެންވަރު އިތުރަށް ހަރުދަނާކޮށް މުބާރާތުގެ ނަން ވެސް ވަނީ "ނެޝަނަލް ސްވިމް މީޓް" އަށް ބަދަލުކޮށްފަ އެވެ.

މިގޮތުން މުބާރާތުގެ ޤަވާޢިދު އިތުރަށް ހަރުދަނާކޮށް އެތުލީޓުން ވަނީ ޤަވާއިދު ތަކަށް ހޭލުންތެރި ކުރުވާފައިވެ އެވެ. މިމުބާރާތުގެ ނިންމުން ފާހަގަ ކުރުމުގެ ގޮތުން ހޮނިހިރު ބޭއްވި ޚާއްޞަ ރަސްމިއްޔާތު ޝަރަފުވެރި ކޮށްދެއްވާފައި ވަނީ ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރު ޢަބްދުއް ރައްޒާޤު އިބްރާހީމް އެވެ.

މި މުބާރާތުގެ މެއިން ސްޕޮންސަރ ބޭންކް އޮފް މޯލްޑިވްސްގެ ފަރާތުން ހެޑް އޮފް ރީކޮންސިލިއޭޝަން އަދި ރިޕޯޓިންގް އައިމިނަތު ޖީހާން އާއި ރީކޮންސިލިއޭޝަން މެނޭޖަރ އަލްފާޟީލާ އައިޝަތު މަނާލް ޙާލިދް ވަނީ ނިންމުމުގެ ރަސްމިއްޔާތުގައި ބައިވެރިވެ، ވަނަ ވަނަ އަށް އައި އެތުލީޓުންނަށް މެޑަލް ހަވާލު ކޮށްފަ އެވެ.

ސްޕެޝަލް އޮލިމްޕިކްސް މޯލްޑިވްސް އަކީ ސިކުނޑީގެ ނުކުޅޭދުންތެރިކަން ހުންނަ ފަރާތްތަކަށް ކުޅިވަރާއި ކަސްރަތުގެ ތެރެއިން ދުޅަހެޔޮ ޞިއްޙަތެއް ހޯދައިދިނުމަށް މަސައްކަތް ކުރުމަށް 2019 ވަނަ އަހަރު ސަރުކާރުން އުފައްދާފައިވާ އެސޯސިއޭޝަނެކެވެ.

ރާއްޖޭގައި އޮތް އެންމެ ބޮޑު އިންކްލޫސިވް ސްޕޯޓްސް މޫވްމަންޓް، ސްޕެޝަލް އޮލިމްޕިކްސް މޯލްޑިވްސް އިން ދަނީ ވަރަށް ފުޅާ ދާއިރާއެއްގައި މުޅި ރާއްޖޭގައި ސިކުނޑީގެ ނުކުޅެދުންތެރިކަން ހުންނަ ފަރާތަތަކަށާއި އެ ފަރާތްތަކުގެ ޢާއިލާތަކަށް އެކިއެކި ޙާރަކާތްތައް ހިންގަމުންނެވެ.