ރައީސްގެ ސްކޮލަޝިޕް ލިބޭ ދަރިވަރުންނަށް ދެން ކިޔެވޭނީ، ރައީސް ބޭނުންފުޅުވާ ދާއިރާއަކުން އެކަނި
30 މާރިޗު 2026 | ހޯމަ 14:34ރައީސުލްޖުމްހޫރިއްޔާގެ ހާއްސަ ސްކޮލަރޝިޕްގައި ކިޔެވޭނީ ރާއްޖެއަށް ބޭނުންވާ ތަމްރީނުތަކުގެ ލިސްޓުގައި ހިމެނޭ ދާއިރާތަކުން އެކަނި ކަމަށް ކަނޑައަޅައި، އެ ފުރުސަތު ހަނިކުރުމާ ގުޅިގެން ދަރިވަރުންނާއި ބެލެނިވެރިންގެ ކަންބޮޑުވުން ވަނީ އިތުރުވެފަ. މި ބަދަލާއެކު ސްކޮލަރޝިޕްގެ ޝަރުތުތަކަށް ވެސް ވަނީ ބައެއް ބަދަލުތައް ގެނެސްފަ.
އައިޔޫއެމްގެ ގްރެޖުއޭޝަންގެ ތެރެއިން | ރައީސް އޮފީސް
ރައީސުލްޖުމްހޫރިއްޔާ ދެއްވާ ހާއްސަ ސްކޮލަރޝިޕްގެ ދަށުން މަތީ ތައުލީމު ހާސިލްކުރާ ދަރިވަރުންނަށް، މީގެ ފަހުން ކިޔެވޭނީ ރާއްޖޭގެ "ޓްރެއިނިންގ ނީޑްސް ރިކުއަރމަންޓް ލިސްޓުގައި" ހިމެނޭ ދާއިރާތަކުން އެކަނި ކަމަށް މިނިސްޓްރީ އޮފް ހަޔަރ އެޑިއުކޭޝަން އިން ކަނޑައަޅައިފި އެވެ.
މިނިސްޓްރީން އާދީއްތަ ދުވަހުގެ ރޭ އާންމުކުރި އާ އުސޫލުގައިވާ ގޮތުން، ރައީސްގެ ސްކޮލަރޝިޕް ދޭނީ އެ ވަގުތަކު މިނިސްޓްރީން ޝާއިއުކޮށްފައިވާ ރާއްޖެއަށް ބޭނުންވާ ތަމްރީނުތަކުގެ ލިސްޓުގައި ހިމެނޭ ދާއިރާތަކަށް އަމާޒުކޮށްގެންނެވެ. މިއީ މީގެ ކުރިން އަމަލުކުރަމުން އައި އުސޫލަށް ގެނައި ބޮޑު ބަދަލެކެވެ. ކުރިން މި ސްކޮލަރޝިޕް ލިބޭ ދަރިވަރުންނަށް އެ ދަރިވަރަކު ބޭނުންވާ ކޮންމެ ދާއިރާއަކުން ދުނިޔޭގެ ކޮންމެ ގައުމެއްގައިވެސް ކިޔެވުމުގެ އިހުތިޔާރު އޮވެ އެވެ.
އާ އުސޫލުގައި ބަޔާންކޮށްފައިވާ ގޮތުގައި، މިދިޔަ އަހަރު ރާއްޖޭގެ ސްކޫލްތަކުން ގްރޭޑް 12 ނިންމައި، މަތީ ސާނަވީ އިމްތިހާނުގައި ބައިވެރިވެގެން ސްކޮލަރޝިޕް ހޯދާ ދަރިވަރުންނަށް މި ފަހަރު ކިޔަވަން ބޭނުންވާ ކޮންމެ ދާއިރާއަކުން ކިޔެވުމުގެ ފުރުސަތު ދޭނެ އެވެ. ނަމަވެސް އޭގެ ފަހުން މި ފުރުސަތު ލިބޭ ދަރިވަރުން އަމަލުކުރަން ޖެހޭނީ އަލަށް އެކުލަވާލި އުސޫލަށެވެ.
މި ސްކޮލަރޝިޕްގެ ދަށުން ރާއްޖޭގެ މަރުކަޒުތަކުގައި ތައުލީމު ހާސިލްކުރާ ދަރިވަރުންނަށް، އާންމުކޮށް ކަނޑައަޅާފައިވާ ސްޓައިޕެންޑް ރޭޓުގެ އިތުރުން މަހަކު 6،000 ރުފިޔާގެ ހާއްސަ އެލަވެންސެއް ދިނުމަށް ވެސް ސަރުކާރުން ވަނީ ނިންމާފައެ ވެ.
ރައީސުލްޖުމްހޫރިއްޔާގެ ހާއްސަ ސްކޮލަރޝިޕް ލިބޭ ޝަރުތުތަކަށް ބަލާއިރު، މަތީ ސާނަވީ އިމްތިހާނު ނިންމާ ދަރިވަރުންގެ ތެރެއިން އޭލެވެލްގެ މަދުވެގެން އެއް މާއްދާ އިން "އޭ ސްޓަރ" ހާސިލްކުރަން ޖެހެ އެވެ. މީގެ އިތުރުން، އެޗްއެސްސީ އިމްތިހާނުގެ ދިވެއްސާއި އިސްލާމް ހިމެނޭހެން ޖުމްލަ ފަސް މާއްދާ އިން "އޭ ސްޓަރ" ހޯދަން ޖެހޭއިރު، އޯލެވެލް ނުވަތަ އެއަށްވުރެ މަތީ އިމްތިހާނަކުން އިނގިރޭސި މާއްދާއިން "ސީ" އަށް ވުރެ މަތީ ފާހެއް ލިބިފައި އޮންނަން ޖެހޭނެ ކަމަށް އުސޫލުގައިވެ އެވެ.
ރައީސްގެ ސްކޮލަރޝިޕަކީ ރާއްޖޭގެ ގިނަ ދަރިވަރުންތަކެއް އެންމެ ބޮޑު އުންމީދަކާއެކު މަސައްކަތް ކުރާ ފުރުސަތަކަށް ވާއިރު، ކިޔަވާނެ ދާއިރާ އިހުތިޔާރު ކުރުމުގެ ފުރުސަތު ހަނިކުރުމާ ގުޅިގެން ގިނަ ދަރިވަރުންނާއި ބެލެނިވެރިން ދަނީ ކަންބޮޑުވުން ފާޅުކުރަމުންނެވެ. ގިނަ ދަރިވަރުން ބުނަމުންދަނީ މިއީ އެ ދަރިވަރުންގެ މުސްތަގުބަލަށް އެޅުނު ހުރަހެއް ކަމަށާއި، މީގެ ސަބަބުން ކިޔެވުމަށް އޮތް ޝައުގުވެރިކަން ކުޑަވެގެންދާނެ ކަމަށެވެ.
